కొలంబోలోని ప్రేమదాస స్టేడియం వేదికగా శ్రీలంకతో జరిగిన తొలి టీ20లో విజయబావుటా ఎగురవేసిన టీమ్ఇండియా.. రెండో మ్యాచ్లోనూ సత్తా చాటాలని సన్నాహాలు చేస్తోంది. ఇప్పటికే వన్డే సిరీస్ కోల్పోయిన లంక జట్టు.. టీ20 ఫార్మాట్లోనైనా తమను తాము నిరూపించుకోవాలని చూస్తోంది. భారత కాలమానం ప్రకారం మంగళవారం రాత్రి 8 గంటలకు ప్రారంభంకానున్న ఈ మ్యాచ్లో గెలుపు కోసం ఇరు జట్లు సన్నద్ధమవుతున్నాయి.
మనీశ్కు నిరాశే!
ఇంగ్లాండ్ పర్యటన కోసం వెళ్లాల్సిన టీమ్ఇండియా బ్యాట్స్మెన్ పృథ్వీషా, సూర్యకుమార్ యాదవ్లకు విశ్రాంతి ఇస్తే తప్ప మిగిలిన పరిస్థితుల్లో జట్టులో మార్పులు చేసే అవకాశం లేదనే చెప్పాలి. ఒకవేళ భారత జట్టు యాజమాన్యానికి ప్రత్యామ్నాయ ప్రణాళిక ఉంటే దేవ్దత్ పడిక్కల్, రుతురాజ్ గైక్వాడ్ వంటి యువ ఆటగాళ్లకు అవకాశం ఇచ్చే ఛాన్సు ఉంది. మనీశ్ పాండేకు రెండో టీ20లో తుదిజట్టులో అవకాశం రాకపోవచ్చు. ప్రస్తుతం ఉన్న బౌలింగ్ లైనప్లో ఎలాంటి మార్పులు ఉండకపొవచ్చు. వైస్కెప్టెన్ భువనేశ్వర్ సహా ఇతర బౌలర్లు చాహల్, చాహర్ వంటి వారు వికెట్లు పడగొడుతూ ఆకట్టుకుంటున్నారు. కానీ, హార్దిక్ పాండ్యా ప్రదర్శన జట్టుకు కొంత ఆందోళన కలిగిస్తోంది.
బౌలర్లు సత్తా చాటినా..
భారత్తో తొలి టీ20లో 165 పరుగుల లక్ష్యంతో బరిలోకి దిగిన లంక జట్టు.. 126 పరుగులకే కుప్పకూలిపోయింది. ఈ మ్యాచ్లో లంక బ్యాట్స్మన్ అవిష్క ఫెర్నాండో, చరిత్ అసలంక తప్ప మిగిలిన వారెంవ్వరూ ఆకట్టుకనే ప్రదర్శన చేయలేకపోయారు. తొలుత శ్రీలంక బౌలర్లు టీమ్ఇండియా బ్యాట్స్మెన్ను కట్టడి చేసిన.. లక్ష్యాన్ని ఛేదించడంలో లంక బ్యాట్స్మెన్ మాత్రం చేతులెత్తేశారు. అయితే లంక జట్టులోని యువ క్రికెటర్ల ప్రదర్శన అటు ఇటుగా అనిపించినా.. రెండో టీ20కి జట్టులో మార్పు చేసే అవకాశం లేదు.
తుదిజట్లు(అంచనా)..
భారత్: శిఖర్ ధావన్(కెప్టెన్), సంజు శాంసన్, సూర్యకుమార్ యాదవ్, ఇషాన్ కిషన్, పృథ్వీ షా, హర్దిక్ పాండ్య, వరుణ్ చక్రవర్తి, భువనేశ్వర్ కుమార్, దీపక్ చాహర్, కృనాల్ పాండ్య, యుజ్వేంద్ర చాహల్.
శ్రీలంక: దసున్ శనక(కెప్టెన్), అవిష్క ఫెర్నాండో, మినోద్ భానుక, భానుక రాజపక్స, ధనంజయ డిసిల్వా, చరిత్ అసలంక, వానిందు హసరంగ, చమీక కరుణరత్నే, అకిల ధనంజయ, దుశ్మంత చమీరా, బండారా.
ఇదీ చూడండి.. లంకలో అదుర్స్.. ఇంగ్లాండ్ పర్యటనకు సూర్యకుమార్
