పాండ్య బ్రదర్స్ టఫ్ డేస్​- మూడేళ్లు మ్యాగీతోనే- టాలెంట్​ను ముంబయి గుర్తించింది ఇలా!

హార్దిక్‌ పాండ్య బ్రదర్స్ టాలెంట్‌ ఎలా గుర్తించారో తెలిపిన నీతా అంబానీ

Pandya Brothers Mumbai Indians : టీమ్ఇండియా ఆటగాళ్లు పాండ్య బ్రదర్స్ కెరీర్ తొలినాళ్లలో తీవ్ర ఆర్థిక కష్టాలు ఎదుర్కొన్నారు. భోజనానికి డబ్బుల్లేక మూడేళ్లపాటు మ్యాగీ, న్యూడిల్స్​తోనే కడుపు నింపుకున్నారు. ఆ తర్వాతి కాలంలో ఐపీఎల్ ఫ్రాంచైజీ ముంబయి ఇండియన్స్ దృష్టిలో పడడం వల్ల వారి తలరాత మారిపోయింది. ఇదే విషయంపై రిలయన్స్ ఫౌండేషన్ ఛైర్ పర్సన్ నీతా అంబానీ తాజాగా కీలక వ్యాఖ్యలు చేశారు.

'ఐపీఎల్‌లో ప్రతి ఫ్రాంచైజీకి ఫిక్స్​డ్ బడ్జెట్ ఉంటుంది. అందుకే ప్రతి జట్టు అంతే మొత్తంలో ఆటగాళ్లను కొనుగోలు చేయడానికి ఖర్చు చేయాలి. అందుకే ప్రతిభ ఉన్న ప్లేయర్ల కోసం వెతికాం. దేశవాళీ, రంజీ మ్యాచ్‌లను వీక్షించడం వల్ల నాణ్యమైన క్రికెటర్లను గుర్తించడం ఈజీగా ఉంటుందని మా టీమ్ అర్థం చేసుకుంది. ఒక రోజు ప్రతిభ ఉన్న ఇద్దరు అబ్బాయిలను ముంబయి ఇండియన్స్ శిబిరానికి తీసుకొచ్చారు. అప్పటికి వాళ్లిద్దరూ చాలా సన్నగా ఉన్నారు. వారే హార్దిక్ పాండ్య, కృనాల్ పాండ్య'
'వారి దగ్గర డబ్బులు లేకపోవడం వల్ల మూడు సంవత్సరాలపాటు మ్యాగీ, నూడుల్స్ తప్ప మరేమీ తినలేదని చెప్పారు. కానీ, వారిలో ఉన్నతస్థాయికి ఎదగాలనే స్ఫూర్తి, కసిని చూశాను.దీంతో 2015లో హార్దిక్ పాండ్యను ఐపీఎల్ వేలంలో రూ.10 వేల డాలర్లకు కొనుగోలు చేశాను. ప్రస్తుతం అతడు ముంబయి ఇండియన్స్‌కు గర్వకారణమైన కెప్టెన్' అని బోస్టన్‌ వేదికగా జరిగిన ఓ కార్యక్రమంలో నీతా అంబానీ తెలిపారు. అలా 10వేల డాలర్లకు జట్టులోకి వచ్చిన హార్దిక్​ను ముంబయి ఈ సీజన్​కు రూ.16.35 కోట్లకు అట్టిపెట్టుకుంది.

#WATCH | Boston, US: Reliance Foundation Founder-Chairperson Nita Ambani tells how she scouted for new talent for the Mumbai Indians team and included Hardik Pandya, Krunal Pandya, Jasprit Bumrah and Tilak Varma in the team

She says, " in ipl, we all have a fixed budget, so every… pic.twitter.com/v0HriPJH8T

— ANI (@ANI) February 17, 2025

అలాగే ముంబయి ఇండియన్స్​లో అద్భుతమైన క్రికెటర్లు ఉన్నారని నీతా అంబానీ తెలిపారు. జస్ప్రీత్ బుమ్రా, తిలక్ వర్మ లాంటి ప్లేయర్లను ఇలా టాలెంట్​ చూసి ఎంపిక చేసుకున్నామని చెప్పుకొచ్చారు. 'యంగ్ ప్లేయర్​ తిలక్ వర్మను కూడా పరిచయం చేశాం. అతడు ఇప్పుడు టీమ్ఇండియాలో గర్వించదగిన ప్లేయర్. అందుకే ముంబయి ఇండియన్స్‌ భారతదేశంలో క్రికెట్ నర్సరీ అని చాలా మంది పిలుస్తారు. అలా పిలవడం సముచితమే అని నేను భావిస్తున్నాను' అని నీతా అంబానీ పేర్కొన్నారు.