Jamakaya Masala Curry : కొంతమంది మసాలా కూరలను ఎక్కువగా ఇష్టపడుతుంటారు. రోటీ, నాన్, బిర్యానీ, పులావ్లకు మంచి కాంబినేషన్గా నిలుస్తుంటాయి. ఈ క్రమంలోనే ఎక్కువ మంది పనీర్, గుడ్డు, చికెన్, గుత్తొంకాయ, ఆలూతో మసాలా కర్రీలను ప్రిపేర్ చేసుకుంటుంటారు. కానీ, ఈసారి వాటికి బదులుగా కాస్త డిఫరెంట్గా ఈ కర్రీని ట్రై చేయండి. అదే, "జామకాయ మసాలా కర్రీ". నాన్వెజ్ రుచులను మించిన టేస్ట్తో ఆహా అనిపిస్తుంది. అంత రుచికరంగా ఉంటుంది ఈ కర్రీ! మరి, అందుకు కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- జామకాయలు - పావు కిలో
- ఉల్లి తరుగు - అర కప్పు
- పచ్చిమిర్చి - 3
- టమాటాలు - 3
- వెల్లుల్లి - అరపాయ
- అల్లం - అంగుళం ముక్క
- కారం - తగినంత
- శనగపిండి - 1 చెంచా
- ధనియాల పొడి - 1 చెంచా
- గరంమసాలా - 1 చెంచా
- జీలకర్ర - 1 చెంచా
- ఉప్పు - రుచికి సరిపడా
- పసుపు - అర చెంచా
- పెరుగు - పావు కప్పు
- బిర్యానీ ఆకులు - 2
- దాల్చినచెక్క - అరంగుళం ముక్క
- లవంగాలు - 3
- యాలకులు - 2
- మెంతి ఆకుల పొడి - 1 టేబుల్ స్పూన్
- ఎండుకొబ్బరి తురుము - 1 టేబుల్ స్పూన్
- నూనె - 3 టేబుల్ స్పూన్లు
జామకాయలను నేరుగా తినడమే కాదు - ఇలా పచ్చడి ప్రిపేర్ చేసుకుంటే టేస్ట్ వేరే లెవల్!
తయారీ విధానం :
- ఇందుకోసం ముందుగా జామకాయలను శుభ్రంగా కడిగి, పీల్ చేసి నిలువుగా ముక్కలు కట్ చేసుకొని పక్కన పెట్టుకోవాలి.
- ఆ తర్వాత కట్ చేసిన జామ ముక్కలను ఒక మిక్సింగ్ బౌల్లోకి తీసుకొని అందులో ఉప్పు, పసుపు, కారం, ధనియాల పొడి, గరం మసాలా, శనగపిండి, పెరుగు వేసి బాగా కలిపి 15 నిమిషాల పాటు పక్కనుంచాలి.
- ఇప్పుడు అల్లం, పచ్చిమిర్చి, టమాటలను తరిగి పక్కన పెట్టుకోవాలి. అనంతరం వాటిని మిక్సీ జార్లోకి తీసుకొని వెల్లుల్లి రెబ్బలు యాడ్ చేసుకొని పేస్ట్లా గ్రైండ్ చేసుకొని పక్కన పెట్టుకోవాలి.
- ఆ తర్వాత స్టౌపై కుక్కర్ పెట్టుకొని ఆయిల్ వేసుకోవాలి. నూనె వేడయ్యాక దాల్చిన చెక్క, లవంగాలు, యాలకులు, జీలకర్ర, బిర్యానీ ఆకులు వేసి లో ఫ్లేమ్ మీద కాసేపు వేయించుకోవాలి.
- అవి వేగాక అందులో ఉల్లిపాయ తరుగు వేసుకొని మరికాసేపు ఫ్రై చేసుకోవాలి. ఆనియన్స్ వేగిన తర్వాత ముందుగా గ్రైండ్ చేసుకున్న టమాటా మిశ్రమం యాడ్ చేసుకొని మూడు నిమిషాల పాటు వేయించుకోవాలి.
- ఆవిధంగా వేయించుకున్నాక అందులో మ్యారినేట్ చేసి పక్కన పెట్టుకున్న జామకాయ ముక్కలు, కొద్దిగా వాటర్, మెంతి ఆకుల పొడి, ఎండుకొబ్బరి తురుము వేసి అన్నీ కలిసేలా ఒకసారి చక్కగా కలియబెట్టాలి.
- ఆపై మూత పెట్టి మీడియం ఫ్లేమ్ మీద ఒక విజిల్‌ వచ్చే వరకు ఉడికించి దింపేసుకోవాలి. ఆ తర్వాత కుక్కర్లోని ప్రెషర్ మొత్తం పోయాక మూత తీసి నెమ్మదిగా ఒకసారి కలిపి వేడివేడిగా సర్వ్ చేసుకుంటే చాలు. అంతే, ఘుమఘుమలాడే "జామకాయ మసాలా" మీ ముందు ఉంటుంది!
