ఇజ్రాయెల్ను దాదాపు 15 ఏళ్లపాటు పరిపాలించిన బెంజమిన్ నెతన్యాహు(Benjamin Netanyahu).. వివిధ దేశాల్లో పర్యటించినప్పుడు భారీగానే కానుకలు పొందారు. అయితే ఆ గిఫ్టులను తిరిగి ప్రభుత్వానికి ఇచ్చేయాలని ఇజ్రాయెల్ ప్రధానమంత్రి కార్యాలయం(పీఎంఓ) కోరింది. ఇదే విషయాన్ని ఆ దేశ ప్రస్తుత ప్రధాని నాఫ్తాలి బెన్నెట్ సోమవారం ధ్రువీకరించారు.
42 కానుకలేవి?
సాధారణంగా దేశాధినేతలు.. ఇతర దేశాల పర్యటనలకు వెళ్లినప్పుడు కానుకలను ఇచ్చిపుచ్చుకుంటారు. అలా దాదాపు 42 కానుకలు నెతన్యాహు దగ్గర ఉన్నాయి. ఆ కానుకల్లో అమెరికా మాజీ ప్రధాని బరాక్ ఒబామా, రష్యా అధ్యక్షుడు పుతిన్లు ఇచ్చినవీ ఉన్నాయి. గిఫ్టు విలువ 300 షెకెల్స్ లేదా 90 డాలర్లు దాటితే.. అవి ఇజ్రాయెల్ ఆస్తిగా పరిగణిస్తారు. వాటిని ప్రభుత్వానికి ఇవ్వాలని ఇజ్రాయెల్ పీఎంఓ నెతన్యాహు కుటుంబాన్ని (Netanyahu news) కోరింది.
నెతన్యాహు(Benjamin Netanyahu) వద్ద ఉన్న కానుకల్లో బంగారం పూతతో ఉన్న చతురస్రాకర బాక్స్, పుతిన్ ఇచ్చిన మొదటి బైబిల్ పుస్తకం. ఇంకా ఫ్రెంచ్, జర్మనీ దేశాధినేతలు, పోప్ల నుంచి తీసుకున్న కానుకలూ ఉన్నాయి.
అయితే.. చట్టపరంగా ఇవ్వాల్సిన గిఫ్టులన్నీ ప్రభుత్వానికి ఇచ్చేశామని నెతన్యాహు కుటుంబం తెలిపింది. వ్యాపారవేత్తల నుంచీ ఖరీదైన కానుకలను స్వీకరించారన్న ఆరోపణల నేపథ్యంలో ఇప్పటికే ఆయనపై నమోదైన కేసు విచారణలో ఉంది.
ఇదీ చదవండి: స్టూడెంట్ మాస్క్ పెట్టుకోలేదని.. క్లాస్ మధ్యలోనే ప్రొఫెసర్ రిటైర్మెంట్
