Bharat NCAP Rating: సేఫ్టీ విషయంలో స్వదేశీ SUV తయారీ సంస్థ మహింద్రా & మహింద్రా పెట్టింది పేరు. ఇటీవలే ఈ కంపెనీకి చెందిన మూడు వాహనాలు భారత్ NCAP క్రాష్ టెస్ట్లో 5 స్టార్ రేటింగ్ సాధించగా తాజాగా మరో రెండు ఈవీ కార్లు ఇదే జాబితాలో చేరాయి. దీంతో ప్రయాణికుల సేఫ్టీ విషయంలో మహింద్రా కార్లు బెస్ట్ అని కంపెనీ మరోసారి నిరూపించుకుంది.
భారత్ న్యూ కార్ అసెస్‌మెంట్ ప్రోగ్రామ్ 'మహింద్రా XEV 9e', 'BE 6' ఎలక్ట్రిక్ SUVలకు 5-స్టార్ క్రాష్ టెస్ట్ రేటింగ్ ఇచ్చింది. ఈ రెండు మహింద్రా బ్రాండ్ ఈవీ కార్లు అడల్ట్ అండ్ చైల్డ్ భద్రతా పరంగా ఫైవ్ స్టార్ రేటింగ్ను సాధించాయి. BNCAP ఈ రెండు ఎలక్ట్రిక్ SUVల టాప్-స్పెక్ వేరియంట్లను పరీక్షించి రేటింగ్ అందించింది. ఈ సేఫ్టీ రేటింగ్ భారత మార్కెట్లో అందుబాటులో ఉన్న వీటి అన్ని వేరియంట్లకు వర్తిస్తుంది.
మహింద్రా XEV 9e:ఈ క్రాష్ టెస్ట్లో XEV 9e అడల్ట్ భద్రతలో 32 పాయింట్లకు గానూ 32 పాయింట్లు సాధించింది. అయితే చైల్డ్ సేఫ్టీ పరంగా ఇది 49 పాయింట్లకు 45 పాయింట్లనే సాధించగలిగింది. డిఫార్మబుల్ బారియర్, సైడ్ మూవబుల్ డిఫార్మబుల్ బారియర్ AOP టెస్ట్లో 16 పాయింట్లకు పూర్తిగా 16 పాయింట్లను సాధించింది. సైడ్ పోల్ ఇంపాక్ట్ టెస్ట్లో BNCAP ఈ కారుకు 'OK' రేటింగ్ను ఇచ్చింది.
మహింద్రా BE 6:XEV 9e మాదిరిగానే మహింద్రా BE 6 కూడా ఫైవ్ స్టార్ సేఫ్టీ రేటింగ్ను పొందింది. ఈ రేటింగ్‌తో ఈ ఎలక్ట్రిక్ SUV ఉత్తమ BNCAP రేటింగ్‌లు కలిగిన కార్లలో ఒకటిగా మారింది. ఈ ఎలక్ట్రిక్ SUV అడల్ట్ ప్రయాణీకుల ప్రమాద భద్రతా రేటింగ్‌లో 32 పాయింట్లకు 31.97 పాయింట్లను సాధించింది. అదే సమయంలో చైల్డ్ ఆక్యుపెంట్ క్రాష్ టెస్ట్లో 49కి 45 స్కోర్‌ను పొందింది.
మహింద్రా XEV 9e, BE 6 భద్రతా ఫీచర్లు:మహింద్రా XEV 9e, BE 6 రెండింటినీ బ్రాండ్ INGLO ప్లాట్‌ఫామ్‌ ఆధారంగా తీసుకొచ్చారు. దీంతో ఇవి అనేక భద్రతా ఫీచర్లతో లెవల్ 2 ADAS సూట్తో వస్తాయి. ఈ సూట్ లేన్ ఛేంజ్, ఎమర్జెన్సీ స్టీరింగ్ అసిస్ట్, బ్లైండ్ స్పాట్ డిటెక్షన్, క్రాస్-ట్రాఫిక్ అలర్ట్, ఫ్రంట్ కొలిషన్ వార్నింగ్ వంటి అనేక ఫీచర్లతో వస్తుంది.