Father Son Bike Ride To Maha Kumbh : కర్ణాటకకు చెందిన 25 ఏళ్ల యువకుడు తన తండ్రిని బైక్పై ప్రయాగ్రాజ్ కుంభమేళాకు తీసుకెళ్లాడు. త్రివేణి సంగమంలో తండ్రీకొడుకులు ఇద్దరూ పుణ్య స్నానమాచరించి తిరిగి క్షేమంగా ఇంటికి చేరుకున్నారు. ప్రయాణం సమయంలో తండ్రీకొడుకులు రాత్రివేళ పెట్రోల్ బంకుల వద్ద టెంట్లు వేసుకుని బస చేశారు. ఉదయాన్ని బైక్పై ప్రయాణాన్ని సాగించారు.
3వేల కి.మీ ప్రయాణించి కుంభమేళాకు
ఉడుపి జిల్లాలోని శిర్వాకు చెందిన ప్రజ్వల్ షెనాయ్(25) తన తండ్రి రాజేంద్ర షెనాయ్(52)తో కలిసి బైక్పై ఫిబ్రవరి 6న ఉదయం 4 గంటలకు మహాకుంభమేళాకు బయలుదేరాడు. శిర్వ నుంచి బయలుదేరి యల్లాపూర్, హుబ్బళ్లి మీదుగా విజయపుర, షోలాపుర్, లాతూర్, నాందేడ్, నాగ్పుర్, జబల్పుర్ మీదుగా బైక్పై 3,000 కి.మీ ప్రయాణించి ప్రయాగ్రాజ్ చేరుకున్నారు. ఫిబ్రవరి 10న త్రివేణి సంగమంలో తండ్రీకొడుకులు ఇద్దరూ పవిత్ర స్నానం చేసి ఫిబ్రవరి 13కి స్వగ్రామానికి మళ్లీ తిరిగి వచ్చేశారు.
'భారీగా ట్రాఫిక్ జామ్- కానీ బైక్కు అనుమతి'
తాము ప్రయాగ్రాజ్ చేరుకునేసరికి దాదాపు 250-300 కి.మీల దూరం ట్రాఫిక్ జామ్ అయ్యిందని ప్రజ్వల్ షెనాయ్ ఈటీవీ భారత్కు తెలిపాడు. అయితే బైక్ను వెళ్లేందుకు పోలీసులు అనుమతించారని పేర్కొన్నాడు. "పుణ్య స్నానాలు చేసే ప్రదేశంలో రద్దీ లేదు. బారికేడ్లు ఏర్పాటు చేశారు. ప్రయాణం చేసేటప్పుడు దారిలో కొందరు మమ్మల్ని ఆపి మాట్లాడేవారు. మధ్యప్రదేశ్లోని సియోని సమీపంలో కారులో వెళ్తున్న ఓ వ్యక్తి మా బైక్ను ఆపారు. తన ఖరీదైన కూల్ గ్లాసెస్, స్వీట్లు, కూల్ డ్రింక్స్, పండ్లు, ఇచ్చారు. అక్కడి పోలీసులు కూడా మాకు సహకరించారు. " అని ప్రజ్వల్ షెనాయ్ తెలిపాడు.
'రూ.20 వేలు ఖర్చు'
"144ఏళ్లకు ఒకసారి జరిగే మహాకుంభమేళాకు నా కొడుకుతో కలిసి బైక్పై వెళ్లడం గర్వంగా ఉంది. ఈ ప్రయాణానికి మాకు కేవలం రూ. 20,000 ఖర్చు అయ్యింది. మార్గమధ్యలో ఓ వ్యక్తి నా కుమారుడికి కొత్త హెల్మెట్ను బహుమతిగా ఇచ్చాడు."
-- రాజేంద్ర షెనాయ్
తన భర్త, కొడుకుకి బస్సులో ప్రయాణించడం అలవాటు లేదని ప్రజ్వల్ తల్లి రజనీ తెలిపారు. "మాకు కారు లేదు. నా భర్త, కొడుకు బైక్ పై ప్రయాణాలు చేస్తారు. కొంత డబ్బును ఆదా చేసి ప్రయాగ్రాజ్ వెళ్లమని వారికి ఇచ్చాను. నా కొడుకు, భర్త కుంభమేళాకు వెళ్లినందుకు నేను చాలా సంతోషంగా ఉన్నాను. ఇంతకంటే నాకు ఇంకేం కావాలి. " అని రజనీ పేర్కొన్నారు.
గతంలోనూ బైక్ యాత్ర
గతేడాది జూన్ లో తండ్రీకొడులిద్దరూ బైక్పై హరియాణా, పంజాబ్, హిమాచల్ ప్రదేశ్, జమ్ముకశ్మీర్, లేహ్-లద్ధాఖ్, కార్గిల్, మనాలి గుండా 10 రోజుల్లో 2,100 కి.మీ ప్రయాణించారు. సముద్ర మట్టానికి 17,982 అడుగుల ఎత్తులో ఉన్న ప్రపంచంలోనే రెండో ఎత్తైన శిఖరమైన ఖార్దుంగ్లాపై కన్నడ జెండాను ఎగురవేశారు.
