Citadel - Honey Bunny Trailer : బాలీవుడ్ హీరో వరుణ్ ధావన్‌, హీరోయిన్ సమంత జంటగా నటించిన యాక్షన్ థ్రిల్లింగ్‌ వెబ్‌సిరీస్‌ సిటడెల్‌: హనీ-బన్నీ. రాజ్‌ అండ్ డీకే దర్శకత్వంలో ఇది తెరెకక్కింది. తాజాగా ఈ చిత్ర ట్రైలర్‌ను మేకర్స్ రిలీజ్ చేశారు. ముంబయిలో లాంఛ్ ఈవెంట్ నిర్వహించి దీనిని విడుదల చేశారు. ఈ ప్రచార చిత్రంలో యాక్షన్ సన్నివేశాల్లో వరుణ్, సమంత అదరగొట్టారు.
ఈ లాంఛ్ ఈవెంట్లో సమంతకు 'ఇండస్ట్రీలో మహిళల భవిష్యత్తు ఎలా ఉంటుందన్న' ప్రశ్న ఎదురైంది. దీనిపై సామ్ మాట్లాడుతూ ప్రపంచ వ్యాప్తంగా ఉన్న ప్రతిభావంతులతో కలిసి పని చేసే అవకాశం ఉన్న ఫిల్మ్ ఇండస్ట్రీలో భాగమైనందుకు ఆనందంగా ఉందని పేర్కొంది. "చిత్ర పరిశ్రమలో అందరికీ సమాన అవకాశాలు రావాలని కోరుకుంటున్నాను. ఇప్పటికే కొంత మార్పు కనపడుతోంది. అందులో నేనూ భాగమైనందుకు ఆనందంగా ఉంది. మన టాలెంట్ మనం ఏంటనేది తెలియజేస్తుంది" అని చెప్పింది.
'సిటడెల్‌' సిరీస్ గురించి కూడా సమంత మాట్లాడింది. "స్పై జానర్‌కు చెందిన వెబ్‌ సిరీస్ అయినా లేదా సినిమా అయినా ఎప్పుడూ మగ పాత్రలకే ఎక్కువ ప్రాధాన్యం కనిపిస్తుంది. ఎందుకంటే వారే యాక్షన్ సీక్వెన్స్లను చేస్తుంటారు. డైలాగ్స్‌ చెబుతుంటారు. కానీ దానికి భిన్నంగా ఈ సిటాడెల్ సిరీస్‌లో నేను కొంత యాక్షన్ సన్నివేశాలను చేశాను" అని సమంత చెప్పుకొచ్చింది.