Chandrayaan 3 Replica With Chocolate : చాక్లెట్​తో 'చంద్రయాన్-3' రాకెట్​ నమూనా.. దృష్టిలోపం ఉన్నా పట్టువదలకుండా..

Chandrayaan 3 Replica With Chocolate : ఒడిశా.. భువనేశ్వర్​లో దృష్టిలోపం ఉన్న ముగ్గురు వ్యక్తులు చాక్లెట్​తో చంద్రయాన్-3 నమూనా తయారు చేశారు. చంద్రయాన్-3 రాకెట్​ను తయారు రూపొందిస్తున్న క్రమంలో రెండు సార్లు విఫలమయ్యారు. అయినా పట్టువదలకుండా శ్రమించిన మూడో ప్రయత్నంలో రాకెట్​ నమూనాను విజయవంతంగా తయారు చేశారు. దీనికి ముందు ఓ చెఫ్​ వద్ద శిక్షణ తీసుకున్నారు.  

తమకు దృష్టిలోపం ఉన్నా.. స్పర్శ, వాసన ద్వారా చాక్లెట్ చంద్రయాన్-3 నమూనాను తయారుచేశామని అన్నారు. 12 కిలోల చాక్లెట్​తో రెండు రోజులు కష్టపడి ఈ రాకెట్​ను రూపొందించామని చెప్పారు. ఇలా చేయడం తమకు చాలా సంతోషాన్ని ఇచ్చిందని తెలిపారు. 'క్లబ్​ చాక్లెట్​' అనే సంస్థ వివిధ సందర్భాల్లో వివిధ సందేశాలతో చాక్లెట్​ థీమ్​ నమూనాలను రూపొందిస్తుంటుంది. ఈసారి ఇస్రో శాస్త్రవేత్తల గౌరవార్థం చంద్రయాన్-3 రాకెట్ నమూనాను తయారు చేశారు. దీనిపై 'క్లబ్​ చాక్లెట్​' నిర్వాహకుడు రాకేశ్​ కుమార్​ సాహు మాట్లాడారు. సాధారణ వ్యక్తులు ఏది నేర్పిస్తే అది త్వరగా నేర్చుకుంటారని.. కానీ దృష్టిలోపం ఉన్న వాళ్లు త్వరగా నేర్చుకోలేకపోతున్నారని చెప్పారు. అయితే తమ దృఢ సంకల్పం, నిరంతర శ్రమ వల్ల కష్టపడి నేర్చుకుంటున్నారని తెలిపారు. అలా వారు అనుకున్నది చేయగలరని నిరూపించుకున్నారని అన్నారు. అందుకే వారి ఆసక్తిని పరిగణలోకి తీసుకుని వారికి శిక్షణ ఇచ్చామని చెప్పారు.