Maratha Reservation Agitation : ఇద్దరు ఎమ్మెల్యేల ఇళ్లు, ప్రభుత్వ కార్యాలయానికి నిప్పు.. మరాఠా కోటా నిరసనలు ఉద్ధృతం

Maratha Reservation Agitation : మరాఠా వర్గానికి రిజర్వేషన్లు కోరుతూ చేస్తున్న ఆందోళనలు తీవ్ర రూపం దాల్చాయి. నేషనలిస్ట్ కాంగ్రెస్​ పార్టీకి చెందిన ఇద్దరు ఎమ్మెల్యేల ఇళ్లకు నిప్పంటించారు నిరసనకారులు. తొలుత బీడ్​ మజల్​గావ్​లోని శాసనసభ్యుడు ప్రకాశ్ సోలంకే నివాసంపై దాడి చేసిన నిరసనకారులు.. ఇళ్లు, కార్లకు నిప్పంటించారు. ఆ తర్వాత మరో ఎన్​సీపీ ఎమ్మెల్యే సందీప్ క్షీర్​సాగర్​ ఇంటికి, కార్యాలయానికి నిప్పంటించారు.

మున్సిపల్ భవనానికి నిప్పు
దీంతో పాటు మజల్‌గావ్ మున్సిపల్ కౌన్సిల్ భవనానికి నిప్పంటించారు. అంతకుముందు ఉదయం వేలాది మంది మరాఠా నిరసనకారులు మున్సిపల్​ కార్యాలయం వద్ద గుమిగూడారు. రిజర్వేషన్​లకు అనుకూలంగా నినాదాలు చేస్తూ భవనంలోకి దూసుకెళ్లారు. అనంతరం కార్యాలయంలోని సామగ్రిని ధ్వంసం చేసి నిప్పు పెట్టారు. దీంతో ఆ ప్రాంతంలో పోలీసు బలగాలు పెద్ద ఎత్తున మోహరించాయి.

ఆడియో క్లిప్​తో మరింత తీవ్రం
ఇటీవలే ఎమ్మెల్యే ప్రకాశ్​ సోలంకే మరాఠా రిజర్వేషన్​లకు సంబంధించి జరుగుతున్న ఆందోళనలపై, మరాఠా కోటా ఉద్యమకారుడు మనోజ్ జరంగే పాటిల్​పై పలు కీలక వ్యాఖ్యలు చేశారు. ఆయన చేసిన ఈ వ్యాఖ్యలకు సంబంధించి ఓ ఆడియో క్లిప్​ సామాజిక మాధ్యమాల్లో వైరల్​గా మారింది. దీంతో ఆగ్రహించిన మరాఠా రిజర్వేషన్ ఆందోళనకారులు స్థానికంగా బంద్​కు పిలుపునిచ్చారు. ఈ క్రమంలోనే ఒక్కసారిగా ప్రకాశ్​ సోలంకే ఇంటిపైకి దాడికి దిగారు. ఈ ఘటనలో భారీ ఆస్తి నష్టం జరిగినట్లు ఎమ్మెల్యే తెలిపారు. ఘటన సమయంలో తాను, కుటుంబ సభ్యులు ఇంట్లోనే ఉన్నామని.. ఎవరికీ ఎటువంటి ప్రమాదం జరగలేదని ఆయన వివరించారు.