మోదీకి సపోర్ట్​గా అమెరికాలో 200కార్లతో భారీ ర్యాలీ- మళ్లీ ఆయనే ప్రధాని కావాలంటూ! - Car Rally For BJP In America

Huge Car Rally For BJP In America : అమెరికాలోని పలు నగరాల్లో బీజేపీ మద్దతుదారులు భారత ప్రధాని నరేంద్ర మోదీకి మద్దతుగా భారీ కార్ల ర్యాలీ నిర్వహించారు. ఈ ర్యాలీలో 200కుపైగా కార్లు, 300కుపైగా పార్టీ కార్యకర్తలు పాల్గొన్నారు. మేరీల్యాండ్​, అట్లాంటా సహా వివిధ రాష్ట్రాల్లోని మొత్తం 20కుపైగా నగరాల్లో ఈ ర్యాలీని చేపట్టారు నిర్వాహకులు. అట్లాంటా జార్జీయా సిటీలో ఏకంగా 150కిపైగా కార్లు ర్యాలీలో పాల్గొన్నాయి. భారత్​లో రాబోయే సార్వత్రిక ఎన్నికల్లో ఎన్​డీఏ కూటమికి 400కిపైగా మెజార్టీని కట్టబెట్లాలని మద్దతుదారులు కార్ల ర్యాలీలో భారతీయ ఓటర్లను కోరారు.

ర్యాలీలో పాల్గొన్న కార్ల అద్దాలపై బీజేపీ జెండాలు రెపరెపలాడాయి. అక్కడక్కడా అయోధ్య రామమందిరం జెండాతో పాటు త్రివర్ణ పతాకం కూడా దర్శనమిచ్చింది. ఇక ఈ కార్యక్రమంలో పాల్గొన్న ప్రతిఒక్కరూ కాషాయం రంగులో ఉన్న టోపీలు, కండువాలు, టీషర్టులను ధరించి కనిపించారు. టీషర్టులపై 'మే హూ మోదీకా పరివార్'​, 'యూఎస్​ఏ ఫర్ మోదీ 2024' లాంటి నినాదాలు రాసి ఉన్నాయి. అంతేకాకుండా కొందరు తమ వాహనాల టాప్​, బానెట్లపై 'అబ్​కీ బార్​ 400 పార్', 'తీస్రీ బార్​ మోదీ సర్కార్​' అంటూ రాసి ఉన్న ప్లకార్డులను ప్రదర్శించారు. ఈ ర్యాలీలో కార్లతో పాటు ఓ పెద్ద ట్రక్కు కూడా పాల్గొంది. 

మరోవైపు ఈ ర్యాలీలో ఓ మహిళా ఆరెంజ్​ కలర్​ కాగితంపై మోదీతో పాటు తమిళనాడు బీజేపీ అధ్యక్షుడు అన్నామలై ఉన్న ఫొటోను పట్టుకొని కనిపించారు. ఇక గతంలో ఆస్ట్రేలియాలోనూ 'ఓవర్‌సీస్‌ ఫ్రెండ్స్​ ఆఫ్​ బీజేపీ' పేరుతో ఇదే తరహా ర్యాలీని నిర్వహించారు మద్దతుదారులు.