Sunil Narine IPL 2024:2024 ఐపీఎల్లో కోల్కతా నైట్రైడర్స్ ఆల్రౌండర్ సునీల్ నరైన్ అద్భుతంగా రాణిస్తున్నాడు. అటు బ్యాట్, ఇటు బంతితోనూ అదరగొడుతూ ప్రశంసలు అందుకుంటున్నాడు. ఈ సీజన్లో కేకేఆర్కు కీలక ప్లేయర్గా మారి జట్టుకు శుభారంభాలు ఇవ్వడంలో సక్సెస్ అవుతున్నాడు. ఈ నేపథ్యంలోనే తాజాగా పంజాబ్తో జరిగిన మ్యాచ్లోనూ నరైన్ అద్భతంగా ఆడాడు. ఈ మ్యాచ్లో కేకేఆర్ ఓడినప్పటికీ నరైన్ మాత్రం పలువురు మాజీల ప్రశంసలు అందుకుంటున్నాడు. ఎందుకంటే?
ఒకే ఒక్కడు
ఈ మ్యాచ్లో ఇరుజట్లు కలిపి 523 పరుగులు నమోదు చేశాయి. ఐపీఎల్ ఇది రెండో అత్యధిక మొత్తం. పరుగుల వరద పారిన ఈ మ్యాచ్లో నరైన్ బౌలింగ్ అందర్నీ ఆకట్టుకుంది. అతడు 4 ఓవర్లలో కేవలం 6.00 ఎకానమీతో 24 పరుగులిచ్చి 1 వికెట్ దక్కించుకున్నాడు. ఈ క్రమంలో మిగతా కేకేఆర్ బౌలర్లంతా కలిసి 14.4 ఓవర్లలో 16.09 ఎకానమీతో వికెట్ ఏమీ తీయకుండా ఏకంగా 236 పరుగులు సమర్పించుకున్నారు. ఇక్కడే నరైన్ సామర్థ్యం ఏంటో అర్థమైంది. మ్యాచ్ మొత్తంలో 6 అంతకంటే తక్కువ ఎకనమీ రేట్తో బౌలింగ్ చేసింది నరైన్ ఒక్కడే. ఇక హర్షిత్ రానా (కేకేఆర్) 61 పరుగులు, శామ్ కర్రన్ 60 పరుగులు (పంజాబ్) అత్యధిక పరుగులు ఇచ్చుకున్నారు.
బ్యాటింగ్లోనూ తగ్గేదేలే
తొలుత బ్యాటింగ్లో నరైన్ ఆకాశమే హద్దుగా రెచ్చిపోయాడు. పంజాబ్ బౌలర్లను ఒక్కొక్కరిని టార్గెట్ చేస్తూ స్కోర్ బోర్డను జెట్ స్పీడ్తో పరుగులు పెట్టించాడు. ఏకంగా 221.88 స్ట్టైక్ రేట్తో పరుగులు చేశాడు. కేవలం 32 బంతుల్లోనే నరైన్ 71 పరుగులతో ఔరా అనిపించాడు. అతడు ఫిల్ సాల్ట్తో కలిసి తొలి వికెట్కు 10.2 ఓవర్లలోనే 138 పరుగుల భాగస్వామ్యం నెలకొల్పాడు. అయితే సాల్ట్తో సమన్వయలోపంతో రనౌట్గా పెవిలియన్ చేరాల్సి వచ్చింది. లేకపోతే ఇంకెంత విధ్వంసం సృష్టించేవాడో.