Champions Trophy Tickets : ఫిబ్రవరి 19 నుంచి ఐసీసీ ఛాంపియన్స్ ట్రోఫీ ప్రారంభం కానుంది. దాదాపు ఎనిమిదేళ్ల తర్వాత ఈ ఐసీసీ టోర్నీ జరగబోతోంది. ఈ టోర్నీకి పాకిస్థాన్ ఆతిథ్యం ఇస్తుండగా, భారత్ ఆడే మ్యాచులన్నీ దుబాయ్ వేదికగా జరగనున్నాయి. అయితే దుబాయ్లో భారత్ ఆడనున్న మూడు లీగ్ మ్యాచ్ లు, అలాగే సెమీ ఫైనల్ మ్యాచ్ టికెట్ల విక్రయ వివరాలను ఐసీసీ వెల్లడించింది.
తొలి మ్యాచ్లో బంగ్లాతో ఢీ
ఐసీసీ ఛాంపియన్స్ ట్రోఫీ ఫిబ్రవరి 19 నుంచి ప్రారంభం కానుండగా, భారత్ మరుసటి రోజే(ఫిబ్రవరి 20) బంగ్లాదేశ్ను దుబాయ్లో ఢీకొట్టనుంది. అలాగే ఫిబ్రవరి 23న దాయాది దేశం పాకిస్థాన్ ను, మార్చి 2న కివీస్తో తలపడనుంది. ఒకవేళ భారత్ సెమీస్కు చేరితే ఆ మ్యాచ్ కూడా దుబాయ్లోనే మార్చి 4న జరగనుంది. ఈ మ్యాచ్ లను గ్రౌండ్లో వీక్షించేందుకు ఫిబ్రవరి 3(సోమవారం) సాయంత్రం 4 గంటల నుంచి ఆన్ లైన్ లో టికెట్లు బుక్ చేసుకోవచ్చని ఐసీసీ తెలిపింది.
ఆన్ లైన్, ఆఫ్ లైన్లో టికెట్లు
ఐకానిక్ దుబాయ్ ఇంటర్నేషనల్ క్రికెట్ స్టేడియంలో జరిగే మ్యాచ్ల కోసం అభిమానులు ఆన్లైన్లో టికెట్లను బుక్ చేసుకోవచ్చు. జనరల్ స్టాండ్ టికెట్ ధరలు 125 దిర్హమ్ (భారత కరెన్సీలో దాదాపు రూ.3,000) నుంచి ప్రారంభమవుతాయి. ఫిజికల్ టికెట్స్ కూడా ఫిబ్రవరి 3వ తేదీ సాయంత్రం 4గంటల నుంచి అందుబాటులో ఉంటాయి. ఇవి పాకిస్థాన్లోని 26 నగరాల్లోని 108 టీసీఎస్ సెంటర్లలో లభించనున్నాయి. దుబాయ్లో మొదటి సెమీ ఫైనల్ ముగిసిన తర్వాత మార్చి 9న జరగబోయే ఫైనల్ టికెట్లు విడుదల అవుతాయి.
ఐసీసీ ఛాంపియన్స్ ట్రోఫీ ఫిబ్రవరి 19 నుంచి మార్చి 9 వరకు జరగనుంది. 8 జట్లు 15 మ్యాచ్ల్లో తలపడనున్నాయి. పాకిస్థాన్ ఆతిథ్యం ఇస్తున్నప్పటికీ, భారత్ ఆడే మ్యాచులన్నీ హైబ్రిడ్ మోడల్లో దుబాయ్ వేదికగా జరగనున్నాయి. ఒకవేళ భారత్ సెమీస్, ఫైనల్కు చేరినా ఆ మ్యాచ్లన్నీ దుబాయ్లోనే జరుగుతాయి.
భారత్ ఆడే మ్యాచ్లు
ఫిబ్రవరి 20 : బంగ్లాదేశ్ వర్సెస్ ఇండియా (దుబాయ్)
ఫిబ్రవరి 23 : పాకిస్థాన్ వర్సెస్ ఇండియా (దుబాయ్)
మార్చి 2: న్యూజిలాండ్ వర్సెస్ ఇండియా (దుబాయ్)
మార్చి 4 : సెమీ ఫైనల్- 1 (భారత్ అర్హత సాధిస్తే దుబాయ్లో)
మార్చి 9 : ఫైనల్ (లాహోర్) (భారత్ అర్హత సాధిస్తే దుబాయ్లో)
