Roasted Bengal Gram Chikki Recipe :మనలో చాలా మందికి బెల్లంతో చేసిన పల్లీ పట్టీలంటే చాలా ఇష్టం. పిల్లలు కూడా ఎంతో ఇష్టంగా తింటారు. ఆరోగ్యానికి మేలు చేసే బెల్లం, పల్లీలతో తయారు చేసిన ఈ చిక్కీలలో ఎన్నో రకాల పోషకాలుంటాయి. కరకరలాడుతూ ఎంతో రుచికరంగా ఉండే చిక్కీలను ఎక్కువ మంది పల్లీలతోనే చేస్తుంటారు. అయితే.. పుట్నాల పప్పుతో కూడా టేస్టీగా పట్టీలను తయారు చేసుకోవచ్చు. ఈ స్టోరీలో చెప్పిన విధంగా పుట్నాలతో చిక్కీలు చేస్తే రుచి అద్భుతంగా ఉంటుంది. మరి, ఇక లేట్ చేయకుండా పుట్నాల పప్పుతో చిక్కీలనుఎలా ప్రిపేర్ చేయాలో ఇప్పుడు చూద్దాం.
కావాల్సిన పదార్థాలు :
- పుట్నాల పప్పు- కప్పు
- బెల్లం- కప్పు
- నెయ్యి-టీస్పూన్
- వంటసోడా-పావుటీస్పూన్
- ఎండు కర్జూరం తరుగు-పావు కప్పు
- యాలకులు-3
తయారీ విధానం :
- ముందుగా ఒక కేక్ మౌల్డ్లో సిల్వర్ ఫాయిల్ వేసి మొత్తం స్ప్రెడ్ చేసుకోండి.
- తర్వాత స్టౌపై పాన్ పెట్టి బెల్లం వేయండి. స్టౌ మీడియం ఫ్లేమ్లో ఉంచి బెల్లం పూర్తిగా కరిగించుకోండి. అవసరమైనతే టీస్పూన్ వాటర్ మాత్రమే వేసుకోండి.
- కరిగిన బెల్లం మరిగి.. చిక్కగా మారాలి. చిక్కీ పర్ఫెక్ట్గా రావాలంటే పాకం చిక్కగా ఉండాలి.
- ఆపై మరుగుతున్న పాకంలో నెయ్యి వేసుకుని కలుపుకోండి. (పర్ఫెక్ట్ పాకం అని తెలుసుకునేందుకు ఓ చిట్కా. అదేంటంటే కొద్దిగా పాకాన్ని తీసుకుని గిన్నెలో ఉన్న చల్లటి నీళ్లలో వేసేయండి. కొద్దిసేపటి తర్వాత పాకాన్ని నీటిలో నుంచి తీస్తే అప్పడాలలాగా విరిగిపోవాలి.)
- ఇలా పాకం సిద్ధమయ్యాక వంటసోడా వేసి కలుపుకోండి. ఆపై ఎండు కర్జూరం తరుగు, పుట్నాల పప్పు వేసుకుని మిక్స్ చేయండి.
- కొద్దిసేపటి తర్వాత యాలకుల గింజలు వేసి కలపండి.
- పాకం చిక్కగా మారి ముద్ద కడుతున్నప్పుడు.. సిల్వర్ ఫాయిల్ మౌల్డ్లో వేసుకుని మొత్తం సర్దుకోండి. (సిల్వర్ ఫాయిల్ లేని వారు నెయ్యి రాసిన ప్లేట్ వాడుకోవచ్చు.)
- తర్వాత ఈ మిశ్రమాన్ని బయటకు తీయండి. నెయ్యి రాసిన చపాతీ కర్రను ఉపయోగించి మొత్తం సమానంగా రోల్ చేసుకోండి.
- అలాగే కత్తితో పైన మీకు ఎంత సైజ్లో కావాలో.. సగం కట్ చేసుకోండి.
- ఒక మూడు గంటల తర్వాత చూస్తే ఎంతో రుచికరంగా ఉండే పుట్నాల చిక్కీలు మీ ముందుంటాయి.
- నచ్చితే మీరు కూడా ఇలా పుట్నాల పప్పు చిక్కీలను ఓసారి ట్రై చేయండి. ఇంట్లో అందరూ ఎంతో ఇష్టంగా తింటారు.
సూపర్ క్రంచీ "పల్లీ కొబ్బరి పట్టిలు"- ఈ విధంగా చేస్తే అద్భుతంగా వస్తాయి!
ఆఫ్ట్రాల్ పల్లీ పట్టి అని తీసిపారేయకండి - ఆరోగ్యానికి ఎంత ఉపయోగమో తెలిస్తే వదిలిపెట్టరు!
