IRCTC Treasures of Tamil Nadu Tour:తమిళనాడులో ప్రసిద్ధి పుణ్యక్షేత్రాలు దర్శించుకోవాలని చాలా మందికి ఉంటుంది. కానీ సరిగా ప్లాన్‌ చేసుకోలేక కొందరు.. ప్రయాణ ఛార్జీల కారణంగా మరికొందరు వెనకడుగు వేస్తుంటారు. అయితే ఇలాంటి వారి కోసమే ఇండియన్‌ రైల్వే కేటరింగ్‌ అండ్‌ టూరిజం కార్పొరేషన్‌ (IRCTC) ఓ ప్యాకేజీని తీసుకొచ్చింది. మరి టూర్ ఎలా సాగుతుంది? ఏఏ ప్రదేశాలు చూడొచ్చు? ధర ఎంత? ప్రయాణం ఎప్పుడు? వంటి వివరాలు ఈ స్టోరీలో తెలుసుకుందాం..
ట్రెజర్స్ ఆఫ్ తమిళనాడు(Treasures of Tamil Nadu) పేరుతో ఐఆర్సీటీసీ ప్యాకేజీని తీసుకొచ్చింది. ఈ టూర్ మొత్తం 5 రాత్రులు, 6 పగళ్లు కొనసాగనుంది. ఈ టూర్లో తమిళనాడులోని కుంభకోణం, రామేశ్వరం, మధురై, తంజావూరు వంటి ప్రముఖ ప్రాంతాలు, దేవాలయాలను సందర్శించవచ్చు.హైదరాబాద్ నుంచి ఫ్లైట్ జర్నీ ద్వారా ఈ ప్యాకేజీని ఆపరేట్ చేస్తున్నారు.
ప్రయాణ వివరాలు చూస్తే..
- మొదటి రోజు మధ్యాహ్నం హైదరాబాద్ విమానాశ్రయం నుంచి ఫ్లైట్ జర్నీ స్టార్ట్ అవుతుంది. సాయంత్రానికి తిరుచ్చి విమానాశ్రయం చేరుకోగా అక్కడి నుంచి పికప్ చేసుకుని హోటల్కు తీసుకెళ్తారు. అక్కడ చెకిన్ అయ్యి.. ఆ రాత్రికి బస చేస్తారు.
- రెండో రోజు బ్రేక్ఫాస్ట్ తర్వాత హోటల్ నుంచి చెక్ అవుట్ అయ్యి శ్రీరంగం ఆలయాన్ని, జంబుకేశ్వర ఆలయాన్ని సందర్శిస్తారు. మధ్యాహ్నం తంజావూరుకు వెళ్తారు. అక్కడ బృహదీశ్వర ఆలయాన్ని సందర్శిస్తారు. అనంతరం కుంభకోణం వెళ్లి.. అక్కడ ఐరావతేశ్వర ఆలయాన్ని సందర్శిస్తారు. రాత్రికి కుంభకోణంలోని హోటల్లో స్టే చేస్తారు.
- మూడో రోజు హోటల్లో బ్రేక్ఫాస్ట్ అనంతరం చిదంబరానికి బయలుదేరుతారు. అక్కడ నటరాజ స్వామి ఆలయాన్ని సందర్శిస్తారు. ఆ తర్వాత గంగైకొండ చోళపురం వెళ్తారు. మధ్యాహ్నం తిరిగి కుంభకోణం చేరుకుంటారు. భోజనం అనంతరం కుంభకోణంలోని స్థానిక ఆలయాలను(కాశీ విశ్వనాథర్, సారంగపాణి, ఆది కుంభేశ్వర ఆలయం) సందర్శిస్తారు. రాత్రికి కుంభకోణంలోనే బస ఉంటుంది.
- నాలుగో రోజు హోటల్లో బ్రేక్ఫాస్ట్ తర్వాత చెక్ అవుట్ చేసి రామేశ్వరం వెళ్తారు. మధ్యాహ్నానికి రామేశ్వరం చేరుకుంటారు. హోటల్లో చెక్ ఇన్ చేస్తారు. ఆ తర్వాత రామనాథస్వామి ఆలయాన్ని సందర్శిస్తారు. రాత్రి రామేశ్వరంలో బస చేస్తారు.
- ఐదో రోజు ఉదయాన్నే దనుష్కోడిని సందర్శిస్తారు. అనంతరం హోటల్లో బ్రేక్ ఫాస్ట్ ఉంటుంది. ఆ తర్వాత అబ్దుల్ కలాం మెమోరియల్‌ని సందర్శిస్తారు. ఆ తర్వాత మధురైకి బయలుదేరి వెళ్తారు. రాత్రికి మధురైలో బస చేస్తారు.
- ఆరో రోజు హోటల్లో బ్రేక్ఫాస్ట్ చేసిన తర్వాత మీనాక్షి అమ్మవారి దర్శనానికి వెళ్తారు. దర్శనం అనంతరం మధ్యాహ్నం మధురై ఎయిర్ పోర్టుకు చేరుకుంటారు. అక్కడి నుంచి ఫ్లైట్లో సాయంత్రానికి హైదరాబాద్ చేరుకుంటారు. దీంతో టూర్ ముగుస్తుంది.