'తండేల్' జర్నీ వైజాగ్​లోనే మొదలైంది- అక్కడికి వెళ్లాకే అసలు క్లారిటీ వచ్చింది : నాగ చైతన్య

ఆసక్తికరంగా 'తండేల్‌' ట్రైలర్‌ లాంచ్‌ ఈవెంట్‌ - ఈ సినిమా గురించి చైతూ ఏమన్నారంటే?

Thandel Trailer Launch Event : టాలీవుడ్ స్టార్ హీరో నాగచైతన్య, నేచురల్ బ్యూటీ సాయి పల్లవి లీడ్ రోల్స్​లో నటించిన లేటెస్ట్ మూవీ 'తండేల్​'. దేశభక్తి అంశాలతో పాటు ఓ ఎమోషనల్ లవ్​ స్టోరీని ప్రేక్షకులకు చూపించనున్నారు డైరెక్టర్ చందూ మొండేటి. ఇప్పటికే విడుదలైన ట్రైలర్​, సాంగ్స్​తో భారీ అంచనాలు పెంచేసిన ఈ చిత్రం ఫిబ్రవరి 7న థియేటర్లలో సందడి చేయనుంది. ఈ క్రమంలో మేకర్స్ మంగళవారం రాత్రి వైజాగ్‌లో ఈ చిత్ర రిలీజ్ ట్రైలర్ లాంచ్​​ ఈవెంట్​ను నిర్వహించారు. అందులో కొత్త ట్రైలర్‌ను విడుదల చేశారు.

"రాజు ఊర్లో అందరూ ఏటేటో మాట్లాడుకుంటున్నార్రా" అంటూ సాయిపల్లవి తన పాత్రలో ఒదిగిపోగా, చైతన్యతో ఆమె ఫోన్​లో మాట్లాడే మాటలతచో మొదలైన ట్రైలర్‌ ఆద్యంతం ఎంతో ఆసక్తికరంగా సాగింది. ఇందులో బుజ్జితల్లి - రాజుల ఎమోషనల్ లవ్ స్టోరీ, నడి సంద్రంలో నావపై రాజు చేసిన అడ్వెంచర్స్, పాకిస్థాన్ జైలులో తను చేసే యాక్షన్‌, ఇలా పలు ఎలిమెంట్స్ సినిమాపై భారీ అంచనాలే పెంచేశాయి. "తండేల్‌ అంటే ఓనర్‌ కాదు లీడర్‌" అంటూ చైతూను, సాయి పల్లవిని చూపించిన తీరు ఎంతో ఆకట్టుకుందని అభిమానులు అంటున్నారు.

"వైజాగ్‌ నుంచే ఈ సినిమా జర్నీ మొదలైంది. కథ విన్నాక నేను శ్రీకాకుళం వచ్చి అక్కడున్న మత్స్యకారులతో గడిపి వాళ్ల జీవితాలు ఎలా ఉంటాయి, వాళ్లు ఎదుర్కొనే సవాళ్లేంటి ఇలాంటివన్నీ తెలుసుకున్నాను. సముద్రంలోకి వెళ్లి వేటాడుతారన్న విషయాలను నేర్చుకున్నా. ఆ తర్వాతే నాకు ఈ సినిమాలో నా పాత్రపై ఓ క్లారిటీ వచ్చింది. వాస్తవానికి నేనిక్కడికి వచ్చి ఉండకపోతే ఈ తండేల్‌ రాజు పాత్ర అస్సలు ఉండేది కాదు. నాకు వైజాగ్‌ అంటే ఎంత ప్రేమ అంటే నేనిక్కడి అమ్మాయినే ప్రేమించి పెళ్లి చేసుకున్నాను. మా ఇంట్లోనూ రూలింగ్‌ పార్టీ వైజాగే. అందుకే ఈసారి ఇక్కడ వసూళ్లు షేకై పోవాలి. లేదంటే ఇంట్లో నా పరువు పోతుంది(నవ్వుతూ)" అని చైతూ అన్నారు.

"ఇది ఉత్తరాంధ్ర కథ. శ్రీకాకుళంలో వాస్తవంగా జరిగిన ఓ స్టోరీని ఆధారం చేసుకుని ఈ చిత్రాన్ని మేము నిర్మించాం. ఇది కచ్చితంగా మీ అందరికీ బాగా నచ్చుతుంది. కార్తీక్‌ ఇచ్చిన స్టోరీని చందూ మొండేటి ఎంతో గొప్పగా తెరపైకి తీసుకొచ్చారు. సాయిపల్లవి ఇందులో ఎంతో అద్భుతంగా నటించారు. ఇంత వరకు ఏ సినిమాలో నటించనంత స్థాయిలో చైతన్య ఇందులో నటించారు. కొన్ని సీన్స్​లో అయితే మాత్రం తన యాక్టింగ్ గుండెల్ని కరిగించేలా ఉంటుంది" అని అన్నారు నిర్మాత అల్లు అరవింద్‌.