చింతపండు తింటే "షుగర్​" పెరుగుతుందా? - కీలక విషయాలు వెల్లడించిన పరిశోధకులు!

-మధుమేహం ఉంటే చింతపండు తినవచ్చా? -పరిశోధనలో కీలక విషయాలు వెల్లడి!

Is Diabetic Patients Can Eat Tamarind: ప్రస్తుత రోజుల్లో చాప కింద నీరులా విస్తరిస్తోన్న వ్యాధి డయాబెటిస్​. వయసు, జెండర్​తో సంబంధం లేకుండా చాలా మంది షుగర్​తో బాధపడుతున్నారు. ఇక ఒక్కసారి షుగర్ ఇది ఎటాక్​ అయితే జీవనశైలిలో అనేక మార్పులు చేసుకోవాల్సి వస్తుంది. తినే ఆహారం విషయంలో మార్పులు చేసుకుంటూ, మందులు వాడుకోవడం తప్ప మరో ఛాన్స్​ లేదు. అందుకే ముందునుంచి ఈ విషయంలో జాగ్రత్తగా ఉండాలి. అయితే మధుమేహ బాధితులు చింతపండు తినొచ్చా అనే సందేహం చాలా మందికి వస్తుంది. చింతపండు తింటే షుగర్​ పెరుగుతుందని కొద్దిమంది అంటే, షుగర్​ కంట్రోల్లో ఉంటుందని మరికొద్దిమంది వాదిస్తుంటారు. మరి ఇందులో నిజమేంత? చింతపండు తినొచ్చా? లేదా? అనే వివరాలు ఈ స్టోరీలో తెలుసుకుందాం.

చింతపండు తినొచ్చా?: ఇతర పండ్ల మాదిరే చింతపండుతో కూడా మనకు చాలా లాభాలే ఉన్నాయని నిపుణులు అంటున్నారు. ఇందులో పీచు, పొటాషియం, మెగ్నీషియం, విటమిన్‌-బి, విటమిన్‌-సిలు సహా ఇతర పోషకాలు పుష్కలంగా ఉన్నాయని వివరిస్తున్నారు. ఇక డయాబెటిస్​ బాధితుల విషయానికి వస్తే చింతపండు తినడం మంచిదని చెబుతున్నారు. ఇందులోని యాంటీ ఇన్ఫ్లమేటరీ లక్షణాలు రక్తంలో చక్కెర స్థాయిలను కంట్రోల్​ చేయడానికి సహాయపడతాయని అంటున్నారు.

మధుమేహంతో బాధపడుతున్న వ్యక్తులలో ప్యాంక్రియాటిక్ కణజాలం నష్టాన్ని చింతపండు తిప్పికొడుతుందని చెబుతున్నారు. అలాగే ఇందులోని ఫైబర్, హైడ్రాక్సీసిట్రిక్ యాసిడ్(HCA) రక్తంలో చక్కెర స్థాయిలను నియంత్రించడంలో సహాయపడతాయని, ముఖ్యంగా టైప్-2 డయాబెటిస్ ఉన్నవారికి ఉపయోగకరంగా ఉంటుందని అంటున్నారు. చింతపండు ఇన్సులిన్ సామర్థ్యాన్ని పెంచుతుందని వివరిస్తున్నారు. 2018లో జర్నల్​ ఆఫ్​ మెడిసినల్​ ఫుడ్​లో ప్రచురితమైన అధ్యయనం ప్రకారం చింతపండు సారం టైప్​ 2 డయాబెటిస్​​ రోగులలో ఇన్సులిన్ సామర్థ్యాన్ని పెంచుతుందని, ఇన్​ఫ్లమేషన్​ను తగ్గిస్తుందని కనుగొన్నారు. నేషనల్​ ఇన్​స్టిట్యూట్​ ఆఫ్​ హెల్త్​కు సంబంధించిన నేషనల్​ లైబ్రరీ ఆఫ్​ మెడిసిన్​లో ప్రచురితమైన ఓ అధ్యయనంలో ఈ విషయం స్పష్టమైంది(రిపోర్ట్​ కోసం ఇక్కడ క్లిక్​ చేయండి). అయితే మంచిదికదా అని చింతపండును మోతాదుకు మించి తీసుకుంటే పలు సమస్యలు వచ్చే అవకాశమని హెచ్చరిస్తున్నారు.

చింతపండు వల్ల ఇతర లాభాలు:

• మనం తీసుకున్న ఆహారంలోని ఖనిజాల్ని శరీరం సులభంగా గ్రహించేందుకు, బాడీలోని విష పదార్థాలను తొలగించేందుకు చింతపండు సహకరిస్తుందని చెబుతున్నారు.
• అజీర్తి వల్ల కలిగే అసౌకర్యానికి చెక్‌ పెట్టడంతో పాటు శరీరంలోని కొలెస్ట్రాల్​ను తగ్గించడంలో దీని పాత్ర కీలకమని నిపుణులు అంటున్నారు.
• చింతపండు సౌందర్య పోషణలోనూ ఉపయోగపడుతుందని చెబుతున్నారు. మొటిమలు, మచ్చలు వంటి చర్మ సమస్యల్ని తగ్గించడం దగ్గర్నుంచి ముఖ కాంతిని పెంచే దాకా చింతపండు ఉపయోగపడుతుందని అంటున్నారు.
• చింతపండులో విటమిన్ సి మెండుగా ఉంటుందని అంటున్నారు. దీనిని తినడం వల్ల శరీరం ఇనుమును బాగా గ్రహిస్తుందని, దీంతో ఐరన్ లోపం తగ్గుతుందని అంటున్నారు.
• చింతపండులోని శ్లేష్మం, పెక్టిన్, అరబినోస్ జీర్ణమయ్యే ప్రక్రియని వేగంగా చేస్తుందని, పేగులో హెల్దీ బ్యాక్టీరియా ఉత్పత్తిని పెంచుతుందని అంటున్నారు. ముఖ్యంగా మలబద్ధక సమస్యని తగ్గిస్తుందని చెబుతున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.