Rava Vada Recipe in Telugu : మార్నింగ్ బ్రేక్ఫాస్ట్లోకి ఏం చేసుకోవాలో తోయనప్పుడు ఈ సూపర్ రెసిపీని ట్రై చేయండి. ఇందుకోసం పప్పు నానబెట్టి, మిక్సీ పట్టుకోవాల్సిన పనిలేదు. అప్పటికప్పుడు చాలా ఈజీగా నిమిషాల్లో తయారుచేసుకోవచ్చు. అదే, నోరూరించే "రవ్వ వడలు". టేస్ట్ అద్దిరిపోతుంది! బయట క్రిస్పీగా, లోపల సాఫ్ట్గా ఉండే ఈ వడలనుపిల్లల నుంచి పెద్దల వరకు అందరూ ఎంతో ఇష్టంగా తింటారు. మరి, ఈ సూపర్ టేస్టీ వడల తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- బొంబాయి రవ్వ - 1 కప్పు
- బంగాళదుంప - 1(మీడియం సైజ్ది)
- ఉప్పు - రుచికి సరిపడా
- ఆయిల్ - 1 టీస్పూన్
- ఉల్లిపాయ - 1(చిన్నది)
- సన్నని అల్లం తురుము - 1 టీస్పూన్
- పచ్చిమిర్చి - 3
- సన్నని కొత్తిమీర తరుగు - 1 టేబుల్స్పూన్
- సన్నని కరివేపాకు తరుగు - కొద్దిగా
- జీలకర్ర - 1 టీస్పూన్
- పెరుగు - అరకప్పు
- వంటసోడా - పావుటీస్పూన్
- ఆయిల్ - వేయించడానికి సరిపడా
హోటల్ స్టైల్ "దహీ వడ" - ఇంట్లోనే సింపుల్గా ప్రిపేర్ చేసుకోండిలా!
తయారీ విధానం :
- ఇందుకోసం ముందుగా బంగాళదుంపను పొట్టు తీసి సన్నగా తురుముకొని పక్కన పెట్టుకోవాలి.
- ఇప్పుడు స్టౌపై పాన్ పెట్టుకొని 1 కప్పు వరకు వాటర్ పోసుకోవాలి. ఆపై అందులో ఉప్పు, ఆయిల్, ముందుగా ప్రిపేర్ చేసుకున్న సన్నని ఆలూ తురుము వేసుకొని వాటర్ని మరిగించుకోవాలి.
- నీళ్లు మరిగి పొంగు వస్తున్నప్పుడు అందులో బొంబాయి రవ్వనుకొద్దికొద్దిగా ఉండలు కట్టకుండా కలుపుతూ వేసుకోవాలి. రవ్వ మొత్తం వేశాక ఆ మిశ్రమం నీళ్లన్ని పీల్చుకొని గట్టిపడుతుంది. అప్పుడు మంటను లో ఫ్లేమ్లో ఉంచి మొత్తం కలిసేలా ఒకసారి మంచిగా కలుపుకోవాలి.
- అనంతరం స్టౌ ఆఫ్ చేసుకొని పాన్ని దింపి మూతపెట్టి కాసేపు పక్కనుంచాలి. అంటే మనం కలపడానికి వీలుగా ఆ మిశ్రమాన్ని చల్లార్చుకోవాలి.
- రవ్వ కాస్త చల్లారాక దాన్ని ఒక మిక్సింగ్ బౌల్లోకి తీసుకొని అందులో సన్నని ఉల్లిపాయ తరుగుని చేతితో మెదుపుకొని వేసుకోవాలి. ఆపై సన్నని అల్లం తరుగు, సన్నగా కట్ చేసుకున్న పచ్చిమిర్చి, కొత్తిమీర, కరివేపాకు తరుగు, జీలకర్ర ఇలా ఒక్కొక్కటిగా వేసుకోవాలి.
- అలాగే, పెరుగులో వంట సోడా కలుపుకొని దాన్ని ఆ మిశ్రమంలో వేసుకొని ఇంగ్రీడియంట్స్ అన్నీ కలిసేలా బాగా కలుపుకోవాలి. పిండి అనేది మరీ గట్టిగా కాకుండా సాఫ్ట్గా, కాస్త స్టిక్కీగా ఉండేటట్లు చూసుకోవాలి. ఒకవేళ మీకు పెరుగు తగ్గిందనిపిస్తే కాస్త వాటర్ వేసుకొని అయినా పిండిని కలుపుకోవచ్చు.
- అనంతరం స్టౌపై కడాయి పెట్టుకొని ఆయిల్ వేసి వేడి చేసుకోవాలి. నూనె వేడయ్యే లోపు చేతిని నీటిలో తడుపుకొని ముందుగా కలిపి పెట్టుకున్న పిండిని కొద్దిగా తీసుకొని పగుళ్లు రాకుండా ఉండగా చేసుకోవాలి.
- ఆపై దాన్ని వడ మాదిరిగా చేసుకొని కాగుతున్న నూనెలో వేసుకోవాలి. ఇదే ప్రాసెస్లో ఒక్కొక్క వడను ప్రిపేర్ చేసుకుంటూ ఆయిల్లో వేసుకోవాలి.
- అలాగే నూనెలో వేశాక వడల్ని వెంటనే టర్న్ చేయకూడదు. కాసేపు అయ్యాక టర్న్ చేసుకొని మీడియం ఫ్లేమ్ మీద రెండు వైపులా చక్కగా కాలే వరకు ఫ్రై చేసుకోవాలి.
- ఆపై ప్లేట్లోకి తీసుకొని వేడివేడిగా సర్వ్ చేసుకుంటే చాలు. అంతే, సూపర్ టేస్టీ అండ్ క్రిస్పీ ఇన్స్టంట్ "రవ్వ వడలు" రెడీ!
- వీటిని పల్లీ, కొబ్బరి, అల్లం చట్నీతో తింటుంటే ఆ టేస్ట్ అద్భుతంగా ఉంటుంది. మరి, నచ్చితే మీరూ ఓసారి బ్రేక్ఫాస్ట్లో వీటిని ట్రై చేయండి.
అదుర్స్ అనిపించే "మరమరాల వడలు" - కేవలం నిమిషాల్లోనే రెడీ - టేస్ట్ వేరే లెవల్!
