తీన్మార్‌ మల్లన్నకు టీపీసీసీ షాక్ - ఆ వ్యాఖ్యలపై వివరణ ఇవ్వాలంటూ షోకాజ్‌ నోటీసులు

వరంగల్‌ సభలో చేసిన వ్యాఖ్యలపై వివరణ కోరిన క్రమశిక్షణ కమిటీ - కులగణన నివేదికపై చేసిన చర్యలపై వివరణ కోరుతూ నోటీసులు

PCC Disciplinary Committee Issues Show Cause Notices : గ్రాడ్యుయేట్​ ఎమ్మెల్సీ తీన్మార్‌ మల్లన్న (చింతపండు నవీన్​) ఇటీవల వరంగల్​ బీసీ గర్జన సభలో చేసిన వ్యాఖ్యలపై తెలంగాణ ప్రదేశ్​ కాంగ్రెస్​ కమిటీ షోకాజ్‌ నోటీసులు జారీ చేసింది. వరంగల్‌ సభలో ఓ వర్గంపై చేసిన వ్యాఖ్యలపై కాంగ్రెస్​ క్రమశిక్షణ కమిటీ ఆయనను వివరణ కోరింది. కులగణన నివేదికపై ఇటీవల మల్లన్న చేసిన వివాదాస్పద వ్యాఖ్యలపై వివరణ కోరుతూ నోటీసులు ఇచ్చింది.

కరీంనగర్​ సీపీకి ఫిర్యాదు : మరోవైపు ఓ వర్గంపై అనుచిత వ్యాఖ్యలు చేసిన ఎమ్మెల్సీ మల్లన్నపై చట్టపరంగా చర్యలు తీసుకోవాలని కరీంనగర్ సీపీకి ఆ సామాజిక వర్గం వారు ఫిర్యాదు ఇచ్చారు. రాష్ట్రంలో ఒక సామాజిక వర్గంపై ఇష్టానుసారంగా మల్లన్న చేసిన వ్యాఖ్యలను ఖండిస్తున్నట్లు తెలిపారు. తీన్మార్​ మల్లన్నపై శాఖాపరమైన చర్యలు తీసుకోవాలని డిమాండ్ చేశారు.