Dondakaya Pachadi Recipe : చాలా మంది ఇంట్లో టమాటా, గోంగూర, దోసకాయ వంటి రకరకాల పచ్చళ్లు తయారు చేసి పెడుతుంటారు. అలాగే దొండకాయలతోనూ పలు రకాలుగా చట్నీ పచ్చడిప్రిపేర్ చేస్తుంటారు. అయితే.. ఇప్పుడు పాతకాలం పద్ధతిలో పల్లీల కాంబినేషన్తో టేస్టీగా దొండకాయ పచ్చడి ఎలా తయారు చేయాలో చూద్దాం. ఈ స్టోరీలో చెప్పిన విధంగా పచ్చడి చేస్తే రుచి అద్దిరిపోతుంది. ఈ దొండకాయ పచ్చడివేడివేడి అన్నం, చపాతీల్లోకి చాలా బాగుంటుంది. ఫ్రిడ్జ్లో స్టోర్ చేసుకుంటే రెండు వారాల వరకు నిల్వ ఉంటుంది. మరి ఇక ఆలస్యం చేయకుండా కమ్మగా దొండకాయ రోటి పచ్చడి ఎలా చేయాలో ఇప్పుడు చూద్దాం.
కావాల్సిన పదార్థాలు :
- దొండకాయలు-పావు కేజీ
- పల్లీలు-పావుకప్పు
- పచ్చిమిర్చి-10
- వెల్లుల్లి రెబ్బలు-6
- ఉల్లిపాయ-1
- టమాటాలు-2
- చింతపండు -నిమ్మకాయ సైజంత
- నూనె-3 టేబుల్స్పూన్లు
- ఉప్పు రుచికి సరిపడా
- కొత్తిమీర తరుగు
- జీలకర్ర -టీస్పూన్
తయారీ విధానం :
- ముందుగా దొండకాయలను శుభ్రంగా కడగాలి. తర్వాత సన్నని ముక్కలుగా కట్ చేసుకోవాలి.
- ఆపై పచ్చడి చేయడం కోసం స్టౌపై కడాయి పెట్టండి. 2 టేబుల్స్పూన్ల నూనె పోసి వేడి చేయండి. నూనె వేడయ్యాక పల్లీలు, పచ్చిమిర్చి ముక్కలు, కొత్తిమీర తరుగు వేసి ఫ్రై చేయాలి.
- పల్లీలు దోరగా వేగిన తర్వాత వీటిని ఒక ప్లేట్లోకి తీసుకోండి.
- ఇదే పాన్లో కొద్దిగా ఆయిల్ వేసుకుని జీలకర్ర వేసి వేపండి. ఆపై కట్ చేసిన దొండకాయ ముక్కలు, కొద్దిగా పసుపు వేసి ఫ్రై చేయండి.
- దొండకాయలు కాస్త మగ్గిన తర్వాత టమాటా ముక్కలు, చింతపండు వేసి కలపండి.
- పాన్పై మూత పెట్టి మిశ్రమాన్ని 10 నిమిషాలు మగ్గించుకుని స్టౌ ఆఫ్ చేయండి.
- ఇప్పుడు రోటిని శుభ్రంగా నీటితో కడిగి.. పొడి వస్త్రంతో తుడవండి. ఆపై రోటిలో ఫ్రై చేసుకున్న పల్లీల మిశ్రమం, రుచికి సరిపడా ఉప్పు వేసి బాగా దంచుకోండి.
- తర్వాత ఉడికించుకున్న దొండకాయ మిశ్రమంవేసి మెత్తగా రుబ్బుకోండి.
- చివర్లో ఉల్లిపాయ ముక్కలు వేసి మరోసారి దంచుకోండి. (మీరు మిక్సీలో గ్రైండ్ చేసుకుంటే అన్నింటినీ కాస్త బరకగా గ్రైండ్ చేసుకోండి.)
- అంతే ఇలా సింపుల్గా చేసుకుంటే ఎంతో కమ్మని దొండకాయ పచ్చడి రెడీ.
- ఈ పచ్చడిని మళ్లీ తాలింపు చేయాల్సిన అవసరం లేదు.
- వేడివేడి అన్నం, చపాతీల్లోకి తింటే రుచి అద్భుతంగా ఉంటుంది.
- నచ్చితే ఈ విధంగా దొండకాయ పచ్చడి మీరు కూడా ట్రై చేయండి.
డైలీ కూరలు తిని విసుగొచ్చిందా - ఇలా "దోసకాయ పచ్చడి"ని ప్రిపేర్ చేసుకోండి - టేస్ట్ అద్భుతం!
చుక్క నూనె, తాలింపు లేకుండానే "కమ్మని జోం పచ్చడి" - ఇలా చేస్తే రుచి అద్భుతం!
