US Election 2024 Trump Kamala : అమెరికా ఎన్నికల పోలింగ్ చివరి నిమిషంలో రిపబ్లికన్‌, డెమొక్రటిక్‌ పార్టీల అధ్యక్ష అభ్యర్థులు డొనాల్డ్ ట్రంప్, కమలా హారిస్‌ హోరాహోరీగా ప్రచారం నిర్వహించారు. ఎన్నికల్లో విజయానికి అత్యంత కీలకమైన పెన్సిల్వేనియాపై ప్రత్యేక దృష్టిపెట్టారు. దాదాపు ఒకే సమయంలో ఇద్దరూ పిట్స్బర్గ్ నగరంలో ప్రచారం చేపట్టడం గమనార్హం. స్థానిక పీపీజీ పెయింట్స్‌ అరీనాలో ట్రంప్ సభ జరిగింది. అదే సమయంలో క్యారీ ఫర్నేస్లో కమలా హారిస్‌ ర్యాలీ నిర్వహించారు.
పిట్స్బర్గ్ రావడాన్ని తాను థ్రిల్‌గా ఫీల్‌ అవుతున్నట్లు డొనాల్డ్ ట్రంప్ చెప్పారు. బైడెన్ కార్యవర్గం లోపాలపై విరుచుకుపడ్డారు. ఇప్పటికంటే ప్రజలు గత నాలుగేళ్ల క్రితమే బాగున్నారని అన్నారు. తాను అధికారంలోకి వస్తే ద్రవ్యోల్బణాన్ని కట్టడి చేస్తానని, సరిహద్దు భద్రతను పెంచుతానని హామీ ఇచ్చారు. అమెరికాలో ఏటా మూడు లక్షల మంది ప్రాణాలు తీస్తున్న డ్రగ్స్‌ను అరికడతానని తెలిపారు. ప్రభుత్వం చెబుతున్నట్లుగా మాదక ద్రవ్యాల కారణంగా మరణాల సంఖ్య 90వేలు కాదు అంతకంటే ఎక్కువగానే ఉందని అన్నారు. గుండు సూది మొనంత ఫెంటనిల్‌ చాలు ప్రాణాలు తీయడానికి! తన పదవీకాలంలో అత్యధిక మంది క్రిమినల్స్‌ను అమెరికా నుంచి సాగనంపని తెలిపారు. వలసదారులు ఎవరైనా అమెరికన్లను హత్య చేస్తే వారికి మరణదండన విధించాలని, ఆ విధానాన్ని కమల నాశనం చేసిందని ఆరోపించారు. తాను దానిని సరిచేస్తానని వెల్లడించారు.
కచ్చితంగా ముగింపు పలకాల్సిందే!
మరోవైపు, కమలా హారిస్‌ కూడా జోరుగా ప్రచారం నిర్వహించారు. తాము శ్రమించడాన్ని ఇష్టపడతామని తెలిపారు. గత కొన్నేళ్లుగా అమెరికన్లు పరస్పరం నిందించుకొంటున్నారని, సంకుచితమైపోతున్నారని అన్నారు. దానికి కచ్చితంగా ముగింపు పలకాల్సిందేనని నినదించారు. కుటుంబసభ్యులు, స్నేహితులు, ఇరుగు పొరుగు, సమూహాలుగా కదలమని పిలుపునిచ్చారు. సమష్టి సమాజాన్ని నిర్మిద్దామని, విభజనలను కాదని పేర్కొన్నారు.