ట్రాక్టర్​తో స్టంట్స్- చక్రాల కిందపడి అక్కడికక్కడే యువకుడు మృతి

Young Man Crushed In Tractor Accident Viral Video : రోడ్డుపై ట్రాక్టర్​తో స్టంట్స్ చేస్తూ యువకుడు మృతి చెందిన ఘటన ఉత్తర్​ప్రదేశ్​లోని సంభల్ జిల్లాలోని జరిగింది. ఒక్కసారిగా ట్రాక్టర్ బోల్తాపడడం వల్ల చక్రాల కింద నలిగి యువకుడు అక్కడికక్కడే మృతి చెందాడు. దీంతో అతడి కుటుంబసభ్యులు కన్నీరుమున్నీరవుతున్నారు.

అసేలం జరిగిందంటే?
జిల్లాలోని నఖాసా ప్రాంతంలోని దిల్లీ రోడ్‌లో ఈ ఘటన జరిగింది. మొహల్లా నఖాసాకు చెందిన హాజీ చిద్దా కుమారుడు జాకిర్ (25) ఆదివారం సాయంత్రం పొలానికి వెళ్లాడు. పనులు పూర్తి చేసుకుని తిరిగి ఇంటికి ట్రాక్టర్​పై బయలుదేరాడు. ఇంటికి సమీపంలో రోడ్డు మీద ట్రాక్టర్‌తో విన్యాసాలు చేయడం ప్రారంభించాడు. అతివేగంతో ట్రాక్టర్‌ను తిప్పాడు.

దీంతో ట్రాక్టర్ ఒక్కసారిగా అదుపుతప్పి బోల్తా పడింది. ట్రాక్టర్ చక్రాల కిందపడి జాకిర్ మృతిచెందాడు. వెంటనే ఘటనాస్థలికి చేరుకున్న స్థానికులు అతడిని ఆస్పత్రికి తరలించారు. అప్పటికే అతడు చనిపోయినట్లు వైద్యులు ధ్రువీకరించారు. ప్రస్తుతం ఘటనకు సంబంధించిన వీడియో సోషల్ మీడియాలో వైరల్​గా మారింది. ఎనిమిది మంది సోదరీమణులకు జాకిర్ ఏకైక సోదరుడు. దీంతో వారి ఇంటి రోదనలు మిన్నంటాయి.