కిమ్ వెడ్స్ సుఖ్​జిత్​​.. ప్రియుడి కోసం భారత్​కు వచ్చిన దక్షిణ కొరియా యువతి

South Korean Girl Married Indian :  సీమాహైదర్​, సచిన్​ మీనా తరహా మరొక లవ్​స్టోరీ వెలుగులోకి వచ్చింది. ప్రేమించిన యువకుడ్ని పెళ్లి చేసుకునేందుకు దక్షిణ కొరియా నుంచి భారత్​ వచ్చింది కిమ్ బోహ్ ని అనే యువతి. అనంతరం ఉత్తర్​ప్రదేశ్​కు చెందిన సుఖ్​జిత్​ సింగ్​ను పెళ్లాడింది. పంజాబీ సంప్రదాయాల ప్రకారం గురుద్వారాలో ఘనంగా వీరి పెళ్లి జరిగింది. ​

షాజహాన్​పుర్​ జిల్లా పువాయం పరిధిలోని ఉడ్నా గ్రామానికి చెందిన సుఖ్​జిత్​ సింగ్.. నాలుగేళ్ల క్రితం ఉద్యోగం కోసం దక్షిణ కొరియా వెళ్లాడు. అక్కడ ఓ కాఫీ షాప్​లో పనికి కుదిరాడు. కిమ్​ బోహ్ ని కూడా అక్కడే పనిచేసేది. మొదట్లో స్నేహితులుగా మెలిగిన వీరిద్దరు.. క్రమంగా ప్రేమికులుగా మారారు. దక్షిణ కొరియాలో కేవలం ఆరు నెలల పాటే పనిచేసిన సుఖ్​జిత్​.. తిరిగి భారత్​కు వచ్చాడు. అయినా.. కిమ్​ బోహ్ నితో తరచూ ఫోన్​లో మాట్లాడుతుండేవాడు. సుఖ్​జిత్​ సింగ్​ పెళ్లి చేసుకుందామని భావించిన కిమ్.. నెలన్నర క్రితం మూడు నెలల టూరిస్ట్​ వీసాపై భారత్​కు వచ్చింది. అనంతరం సుఖ్​జిత్​ ఇంటికి చేరి.. రెండు రోజుల క్రితం అతడ్ని పెళ్లి చేసుకుంది.

భారతీయ సంప్రదాయాలంటే ఎంతో ఇష్టమని చెబుతోంది కిమ్​ బోహ్ ని. తన మూడు నెలల వీసా గడువు ముగిసిన తరువాత సుఖ్​జిత్​ సింగ్​తో​ కలిసి తిరిగి దక్షిణ కొరియా వెళ్తానని ఆమె తెలిపింది. విదేశీ యువతిని కోడలిగా పొందటంపై సుఖ్​జిత్​ సింగ్​ కుటుంబ సభ్యులు కూడా ఆనందం వ్యక్తం చేస్తున్నారు.