Monkey Viral Video : ఆఫీసర్ కుర్చీలో కూర్చుని ఫైళ్లు తిరగేసిన కోతి.. ఆరటిపండు ఇచ్చినా తలతిప్పకుండా..

Monkey Viral Video : రిజిస్ట్రార్​ ఆఫీసులో అధికారి కుర్చీపై కూర్చుని ఫైళ్లు తిప్పుతూ ఓ కోతి హల్ చల్​ చేసింది. చుట్టూ అధికారులంతా ఉన్నా ఏ మాత్రం జంకకుండా బిజీబిజీగా గడిపింది. అరటిపండుతో ఆశ చూపినా కనీసం తల తిప్పకుండా.. పనే తన మొదటి ప్రాధాన్యం అన్నట్లు బిల్డప్​ ఇచ్చింది. అరటిపండు ఒలిచి ఇచ్చినా.. తనను డిస్టర్బ్​ చేయొద్దన్నట్లు ఫైళ్లు తిరగేసే పనిలో నిమగ్నమైపోయింది. ఉత్తర్​ప్రదేశ్​.. సహారన్​పుర్ జిల్లా బెహట్​ మండలం తహసీల్​ రిజస్ట్రీ డిపార్ట్​మెంట్​ కార్యాలయంలో అక్టోబర్​ 12న ఈ ఘటన జరిగింది. దీనికి సంబంధించిన దృశ్యాలు సామాజిక మాధ్యమాల్లో వైరల్ అయ్యాయి.

ఈ ఘటనపై సహారన్​పుర్ సబ్​కలెక్టర్ దీపక్​కుమార్ స్పందించారు. ఈ వైరల్​ వీడియో తహసీల్​ కార్యాలయం పరిసరాల్లో జరిగిందని ధ్రువీకరించారు. కొద్దిసేపటి తర్వాత కోతి తనంతట తానే వెళ్లిపోయిందని తెలిపారు. ఆ వానరం కాగితాలకు, ఫైళ్లకు ఎలాంటి నష్టం కలిగించలేదని చెప్పారు. అయితే తహసీల్ కార్యాలయం ఆవరణలోకి తరచూ కోతులు వస్తున్నాయని.. కానీ కార్యాలయం లోపల కూర్చీపై కూర్చోవడం ఇదే తొలిసారి అని తెలిపారు.