మిత్రుడ్ని చూసిన ఆనందంలో కొంగ డ్యాన్స్.. 'జూ' నుంచి బయటకు వచ్చే యత్నం

Arif Saras news : ప్రాణాలను కాపాడి, ఎన్నో ఏళ్లు సంరక్షించిన వ్యక్తి తనను చూసేందుకు 'జూ' పార్క్​కు రాగానే ఆనందంతో డ్యాన్స్ చేసింది ఓ కొంగ. ఆ వ్యక్తి తాను ధరించిన మాస్క్ తీయగానే.. అతడిని గుర్తుపట్టిన కొంగ ప్రేమగా అరుస్తూ.. దగ్గరకు వెళ్లడం 'జూ'కు వచ్చిన సందర్శకులను ఆకర్శించింది.
ఉత్తర్​ప్రదేశ్​ అమేఠీకి చెందిన ఆరిఫ్​కు, ఓ సారస్ కొంగకు మధ్య ఉన్న స్నేహం గురించి ప్రపంచానికి తెలిసిందే. రాష్ట్ర మాజీ సీఎం అఖిలేశ్ యాదవ్ సైతం వీరి స్నేహం గురించి తెలుసుకొని.. గతంలో ఆరిఫ్​ను కలిశారు. అయితే కొన్ని నెలల కింద యోగి ప్రభుత్వం.. నిబంధనల ప్రకారం కొంగను, ఆరిఫ్​ నుంచి వేరు చేసి కాన్పుర్​ 'జూ'లో బంధించింది. చాలా రోజులకు ఆరిఫ్.. కొంగను చూడాలనిపించి తనను ఎవరూ గుర్తుపట్టకుండా మాస్క్​ ధరించి గురువారం కాన్పుర్ 'జూ'కు వెళ్లాడు. కొంగ దగ్గరకు చేరుకున్నాక ఆరిఫ్.. తన మాస్క్​ను తీసివేశాడు. వెంటనే ఆరిఫ్​ను గుర్తుపట్టిన కొంగ.. పట్టలేని సంతోషంతో ప్రేమగా అరుస్తూ.. డ్యాన్స్ చేసింది. తనను బంధించిన బోనులోంచి బయటకు వచ్చేందుకు ప్రయత్నించింది. ఆరిఫ్ తన వేళ్లను బోను దగ్గర పెట్టగానే.. కొంగ ప్రేమగా కొరికింది.

ఈ అందమైన సన్నివేశాన్ని మొత్తం ఆరిఫ్ తన ఫోన్​లో వీడియో తీసి సోషల్ మీడియాలో పంచుకున్నాడు. కాగా కొంగను 'జూ' నిర్వాహకులు సరిగ్గా చూసుకోవడం లేదంటూ ఆరోపించాడు. ప్రభుత్వం వెంటనే స్పందించి కొంగను జూ లోంచి విడిపించాలని కోరాడు. వైరల్​గా మారిన వీడియోను చూసిన 'జూ' నిర్వాహకులు ఆశ్చర్యానికి గురయ్యారు. ఆరిఫ్ - సారస్ కొంగ స్నేహం గురించి తెలుసుకోవాలంటే ఇక్కడ క్లిక్ చేయండి.