ఎంపీ కారు బానెట్​పై యువకుడు.. 3కి.మీలు లాక్కెళ్లిన డ్రైవర్​.. చివరకు..

దేశ రాజధాని దిల్లీలో ఓ మందుబాబు రెచ్చిపోయాడు. కారు బానెట్​పై పడ్డ వ్యక్తిని సుమారు 3కి.మీల వరకు ఈడ్చుకుంటూ వెళ్లాడు. ఆదివారం రాత్రి 11 గంటల ప్రాంతంలో ఆశ్రమ్ చౌక్ సమీపంలో ఈ ఘటన జరిగింది. "నేను క్యాబ్​ డ్రైవర్​ను.. ఓ ప్యాసింజర్​ను విడిచి పెట్టి తిరిగి ఇంటికి వెళ్తున్నాను. నేను ఆశ్రమ్​ చౌక్​ సమీపంలోకి చేరగానే ఓ కారు నా వాహనాన్ని కావాలని మూడుసార్లు ఢీకొట్టింది. దీంతో కారు డ్రైవర్​ను నిలదేసే ప్రయత్నం చేశాను. ఇందుకోసం నా కారు దిగి అతడి కారు ముందు నిలబడ్డాను. అయినా అతడు కారును అలానే ముందుకు పోనిచ్చాడు. దీంతో నేను కారు బానెట్​పై పడ్డాను. అలా నన్ను ఆశ్రమ చౌక్ నుంచి నిజాముద్దీన్‌ దర్గా వరకు సుమారు 3 కిలోమీటర్ల మేర ఈడ్చుకుంటూ వెళ్లాడు. కారు ఆపమని ఎంత అరిచినా డ్రైవర్​ వినిపించుకోలేదు. అప్పుడు అతడు మద్యం మత్తులో ఉన్నాడని తెలుసుకున్నాను. దారిలో నాకు పోలీసుల వాహనం కనిపించింది. వారు మమ్మల్ని చూసి నిందితుడి వాహనాన్ని వెంబడించారు. ఎట్టకేలకు పోలీసుల జోక్యంతో నిజాముద్దీన్‌ దర్గా వద్ద అతడు కారును ఆపాడు" అని బాధితుడు చేతన్​ చెప్పాడు. 

మరోవైపు.. "నా కారు అతడి కారును తాకలేదు. అతడు కావాలనే నా కారు బానెట్​పైకి దూకాడు. ఆ సమయంలో నేను డ్రైవింగ్​ చేస్తున్నాను. నేను అతడిని దిగమని అడిగాను.. కానీ అతడు దిగలేదు. అప్పుడు నేను నా కారును ఆపి ఏం చేస్తున్నావ్​ అని అడిగాను" అని నిందితుడు రాంచంద్​ కుమార్​ చెబుతున్నాడు. కాగా, ఆ కారు బిహార్‌కు చెందిన ఓ ఎంపీది అని పోలీసుల దర్యాప్తులో తేలింది. ఘటనా సమయంలో డ్రైవర్‌ మాత్రమే కారులో ఉన్నాడు.