అవసరాల శ్రీనివాస్ సీక్రెట్ టాలెంట్.. హాలీవుడ్​ సినిమాకు డైలాగ్​ రైటర్​గా..

టాలీవుడ్​ స్టార్ హీరో అవసరాల శ్రీనివాస్​ ఇటీవలే దర్శకుడిగా తన మూడో సినిమాతో ప్రేక్షకుల ముందుకొచ్చారు. నాగశౌర్య హీరోగా 'ఫలానా అబ్బాయి ఫలానా అమ్మాయి' అనే సినిమాను మార్చి 13న ఈ సినిమాను థియేటర్​లో రిలీజ్​ చేశారు. సినిమా ప్రమోషన్లలో భాగంగా ఈటీవీలో రన్ అవుతున్న సుమా అడ్డా షోలో మూవీ టీమ్​తో కలిసి దర్శకుడు అవసరాల శ్రీనివాస్​ సందడి చేశారు. ఈ సందర్భంగా శ్రీనివాస్​ను యాంకర్ సుమ కొన్ని ఆసక్తికర ప్రశ్నలు అడిగారు. హాలీవుడ్ సినిమాలకు పని చేయడం గురించి ఆరా తీశారు. గతేడాది రిలీజై బాక్సాఫీస్​ వద్ద సెన్సేషన్​ క్రియేట్​ చేసిన 'అవతార్​ ద వే ఆఫ్​ వాటర్'​ సినిమాకు తెలుగు డైలాగ్స్​ తానే రాశారని అవసరాల శ్రీనివాస్ తెలిపారు. దీంతో యాంకర్ సుమ ఆయన్ను పాన్​ వరల్డ్​ స్టార్​ అంటూ కొనియాడారు. ఇదే షోకు హాజరైన అబ్బాయి ఫలానా అమ్మాయి చిత్రబృందానికి ఇదే తరహాలో మరికొన్ని సరదా ప్రశ్నలు వేశారు సుమ.

2022లో రిలీజ్ అయిన ప్రముఖ బాలీవుడ్ సినిమా 'బ్రహ్మాస్త్ర' కోసం కూడా పని చేశారు అవసరాల శ్రీనివాస్. ఆ సినిమా తెలుగు వెర్షన్​కు డైలాగ్స్​ ఆయనే రాశారు. ఇక దర్శకుడిగా శ్రీనివాస్​ తీసిన 'ఊహలు గుసగుసలాడే', 'జో అచ్యుతానంద' సినిమాలకు థియేటర్లలో మంచి టాక్​ లభించింది. ఫలానా అబ్బాయి ఫలానా అమ్మాయి సినిమాతో  హీరో నాగశౌర్యను మరోసారి తన సినిమాకు హీరోగా తీసుకోవడం విశేషం. వీరిద్దరి కాంబోలో ఇదివరకే 'ఊహలు గుసగుసలాడే' అనే క్లాసిక్​ హిట్​ రిలీజయ్యింది.