ఇంట్లోనే పెళ్లిల స్పెషల్ స్వీట్ 'కద్దూ కీ ఖీర్'- ఇలా చేస్తే గిన్నె మొత్తం ఖాళీ చేసేస్తారు!

-కద్దూ కీ ఖీర్​ ఇంట్లోనే ఈజీగా చేసుకోవచ్చు -ఇలా చేస్తే అచ్చం హైదరాబాదీ స్వీట్ టేస్ట్!

How to Make Kaddu Ki Kheer Recipe in Telugu: మీరు ఎప్పుడైనా హైదరాబాద్ స్పెషల్ కద్దూ కీ ఖీర్ తిన్నారా? పెళ్లిళ్లు, స్పెషల్​ పార్టీలకు ఈ ఖీర్​ను ఎక్కువగా తయారు చేస్తుంటారు. చాలా రుచికరంగా ఉండే దీనిని.. స్వీట్​ షాపుల్లో కూడా విక్రయిస్తుంటారు. అయితే, ఎంతో కమ్మగా ఉండే ఈ ఖీర్​ను ఇంట్లోనే చాలా సులభంగా తయారు చేసుకోవచ్చు. దీనిని వేడి వేడిగా లేదంటే ఫ్రిజ్​లో పెట్టుకోని తిన్నా కూడా టేస్ట్​ బాగుంటుంది. ఇంకా ఈ పాయసాన్ని ఫ్రిజ్‌లో పెట్టుకుంటే వారం, పది రోజుల పాటు నిల్వ ఉంటుంది. మరి ఇందులోకి కావాల్సిన పదార్థాలు ఏంటి? తయారీ విధానం ఎలాగో ఇప్పుడు తెలుసుకుందాం.

కావాల్సిన పదార్థాలు

• 500 గ్రాముల సొరకాయ తరుగు
• ఒక లీటర్ చిక్కటి పాలు
• 100 గ్రాముల పచ్చి కోవా
• అర కప్పు సగ్గుబియ్యం (అరగంట నానబెట్టిన)
• 50 గ్రాముల జీడిపప్పు పేస్ట్
• 250 గ్రాముల చక్కెర
• ఒక టీ స్పూన్ యాలకుల పొడి
• కొద్దిగా పిస్తా పలుకులు
• కొద్దిగా బాదం పలుకులు
• చిటికెడ్ గ్రీన్ ఫుడ్ కలర్ (ఆప్షనల్)

తయారీ విధానం

• ముందుగా స్టౌ ఆన్ చేసి ఓ గిన్నె పెట్టుకుని అందులో సొరకాయ తురుము వేసి మంట మీడియంలో పెట్టి రెండు నిమిషాలు వేయించుకోవాలి.
• ఆ తర్వాత అందులో అరకప్పు నీళ్లు పోసి అవి ఇంకిపోయి.. సొరకాయ మెత్తగా అయ్యేవరకు ఉడికించుకుని పక్కన పెట్టుకోవాలి.
• ఇప్పుడ అడుగు మందంగా ఉన్న గిన్నెను తీసుకుని అందులో ఒక లీటరు చిక్కటి పాలను పోసి మరిగించుకోవాలి.
• పాలు రెండు పొంగులు వచ్చిన తర్వాత.. అరకప్పు వేడి పాలను ఓ గిన్నెలోకి తీసుకోని అందులో 100 గ్రాముల పచ్చికోవాను వేసుకుని ఎక్కడా గడ్డలు లేకుండా కరిగించుకోవాలి.
• ఇప్పుడు మరుగుతున్న పాలల్లో నానబెట్టిన సగ్గుబియ్యం వేసి కనీసం 15 నుంచి 20 నిమిషాల పాటు మెత్తగా ఉడికించుకోవాలి. (పాలను ప్రతి 30 సెక్లనకు ఒకసారి కలుపుతూ అంచుల వెంట ఉన్న మీగడను పాలల్లో వేయాలి)
• సగ్గుబియ్యం ఉడికిన తర్వాత ముందుగా కలిపిపెట్టుకున్న కోవా పాలు, జీడిపప్పు పేస్ట్​ను వేసుకోని బాగా కలపాలి.
• రెండు నిమిషాల మరిగించిన తర్వాత ముందుగా ఉడికించిన సొరకాయ తురుము వేసి బాగా కలిపి మంటను సిమ్​లో పెట్టి సుమారు 15 నిమిషాల పాటు ఉడికించుకోవాలి.
• పాలు చిక్కపడిన తర్వాత పావు కిలో పంచదార పోసి చిక్కగా అయ్యే వరకు సుమారు 15 నిమిషాలు ఉడికించుకోవాలి.(మీకు అవసరమైతే చిటికెడు గ్రీన్ ఫుడ్​ కలర్​ వేసుకోవాలి)
• ఆ తర్వాత యాలకుల పొడి వేసుకుని ఓ 5 నిమిషాలు ఉడికించుకోని దింపేసుకోవాలి.
• ఇప్పుడు ఖీర్​ పైన నానబెట్టుకున్న బాదం, పిస్తా పలుకులు వేసుకుంటే టేస్టీ కద్దూ కీ ఖీర్ రెడీ!