సామాజిక దూరం వద్దు.. భౌతిక దూరం ముద్దు

కరోనా జాగ్రత్తల్లో 'సామాజిక దూరం' అనే పదంపై రాజ్యసభ సభ్యులు అభ్యంతరం వ్యక్తం చేశారు. దీని వల్ల బాధితులు సామాజిక వివక్షకు గురవుతున్నారని, దానికి బదులుగా 'భౌతిక దూరం' అనే పదం వినియోగించాలని సూచించారు. ఈ అంశాన్ని అంగీకరించిన ఛైర్మన్​ వెంకయ్యనాయుడు.. 'సురక్షిత దూరం' అనే పదాన్ని సిఫార్సు చేశారు.

కరోనా నుంచి రక్షణకు 'సామాజిక దూరం' పాటించాలని నిపుణులు, ప్రభుత్వాలు సూచించాయి. అయితే, ఈ పదం వల్ల కరోనా రోగులు, వారి కుటుంబాలు సామాజిక వివక్షకు గురవుతున్నాయని రాజ్యసభ సభ్యులు అభిప్రాయం వ్యక్తం చేశారు.

దానికి బదులుగా 'భౌతిక దూరం' అనే పదాన్ని ఉపయోగించాలని డిమాండ్ చేశారు. సభ్యుల సూచనను అంగీకరించిన ఛైర్మన్​ వెంకయ్యనాయుడు.. సరైన పదాన్ని వినియోగించాల్సిన అవసరం ఉందన్నారు. 'సురక్షిత దూరం' అనే పదాన్ని సూచించారు వెంకయ్య.

రాజ్యసభ సమావేశాల్లో భాగంగా తృణమూల్​ కాంగ్రెస్ నేత శాంతను సేన్​ ఈ అంశాన్ని లేవనెత్తారు. ఆయనకు చాలా మంది సభ్యులు మద్దతు తెలిపారు.

ఇదీ చూడండి: భారత్​లో 49 లక్షలు దాటిన కరోనా కేసులు