బాలయ్య గోల్డెన్ జూబ్లీ- మోషన్ పోస్టర్ రిలీజ్ - Nandamuri Balakrishna 50 Years - NANDAMURI BALAKRISHNA 50 YEARS

Nandamuri Balakrishna 50 Years: నటుడిగా నందమూరి బాలకృష్ణ 50 ఏళ్లు పూర్తి చేసుకున్న సందర్భంగా స్వర్ణోత్సవ వేడుకలను ఘనంగా నిర్వహించాలని తెలుగు చలన చిత్ర పరిశ్రమ నిర్ణయించింది. సెప్టెంబర్ 1న హైదరాబాద్ లోని హెచ్ఐసీసీ వేదికగా భారీ ఎత్తున వేడుకలు నిర్వహించేందుకు సన్నాహాలు చేస్తోంది. ఈ మేరకు హైదరాబాద్​లోని ఫిల్మ్ నగర్ క్లబ్​లో తెలుగు ఫిల్మ్ ఛాంబర్, తెలంగాణ ఫిల్మ్ ఛాంబర్, తెలుగు నిర్మాతల మండలి, మూవీ ఆర్టిస్ట్ అసోసియేషన్, తెలుగు సినీ కార్మికుల సమాఖ్య ఆధ్వర్యంలో ఎన్​బీకే 50 ఇయర్స్ సెలబ్రేషన్ మోషన్ పోస్టర్ తోపాటు కర్టెన్ రైజర్​ను విడుదల చేశారు.

ఈ కార్యక్రమానికి నందమూరి సోదరులు రామకృష్ణ, మోహన్ కృష్ణతోపాటు తెలుగు చిత్ర ప్రముఖులు, దర్శక నిర్మాతలు హాజరై బాలకృష్ణ 50 ఏళ్ల వేడుకల వివరాలతోపాటు ఆయనతో ఉన్న అనుబంధాన్ని షేర్ చేసుకున్నారు. కనీవినీ ఎరుగని రీతిలో జరిగే ఈ వేడుకలకు ఇరు రాష్ట్రాల ముఖ్యమంత్రులు ముఖ్య అతిథులుగా హాజరుకానున్నారు. కాగా, బాలకృష్ణ సినీ ఇండస్ట్రీలో అరంగేట్రం చేసి 2024 ఆగస్టు 30తో 50ఏళ్లు పూర్తవుతుంది. 1974 ఆగస్టు 30న వచ్చిన 'తాతమ్మ కల' సినిమాతో బాలయ్య తెరంగేట్రం చేశారు.