భలే భలే బీఎండబ్ల్యూ iX ఫేస్​లిఫ్ట్ వచ్చేస్తుందోచ్- సింగిల్​ ఛార్జ్​తో 700కి.మీ కంటే ఎక్కువ రేంజ్!

BMW ఆల్​-ఎలక్ట్రిక్ SUV BMW iX ఫేస్​లిఫ్ట్ మోడల్​ రివీల్- స్పెసిఫికేషన్స్ ఇవే!

BMW iX Facelift:మార్కెట్​లోకి త్వరలో BMW నుంచి కొత్త కారు ఎంట్రీ ఇవ్వబోతుంది. జర్మన్ లగ్జరీ కార్ల తయారీ సంస్థ BMW తన ఆల్​-ఎలక్ట్రిక్ SUV BMW iX ఫేస్​లిఫ్ట్​ మోడల్​ను విడుదల చేయబోతున్నట్లు ప్రకటించింది. అదిరే అప్​డేట్​లతో కంపెనీ ఈ కారును తీసుకురానుంది. దీనికి మిడ్-లైఫ్-సైకిల్ అప్‌డేట్ ఇచ్చారు. ఈ మార్పులలో బిగ్గెస్ట్ అప్​గ్రేడ్ దాని ఇంటీరియర్​లో జరిగింది. అలాగే దీని అన్ని వేరియంట్లలో మరింత పవర్​ఫుల్ అండ్ ఎఫిషియంట్ ఎలక్ట్రిక్ మోటారును అందించారు.

BMW iX ఫేస్‌లిఫ్ట్ డిజైన్:ఈ కొత్త BMW iX కారుకు కొత్త ఫ్రంట్ ఫాసియా ఇచ్చారు. ఇది మునుపటి కంటే కొంచెం ఎక్కువ మజిల్స్ లుక్​లో కన్పిస్తుంది. దీని హెడ్‌ల్యాంప్స్​ను కూడా సవరించారు. పాత మోడల్‌లోని ఐ-బ్రో లేఅవుట్‌కు భిన్నంగా LED డేటైమ్ రన్నింగ్ లాంప్‌లు ఇప్పుడు యూనిట్‌లో నిలువుగా అమర్చారు.

భారీ పరిమాణంలో ఉన్న దీని క్లోజ్డ్-ఆఫ్ గ్రిల్ విభిన్న గ్రాఫిక్స్‌లను కలిగి ఉంది. అయితే మొత్తం ఫ్రంట్ బంపర్‌ను మరింత యాంగ్యులర్ యూనిట్‌గా మార్చారు. ఇది SUV విజువల్ మాస్​ను పెంచుతుంది. ఇక కారు సైడ్ ప్రొఫైల్ గురించి మాట్లాడుకుంటే ఇందులోని అల్లాయ్ వీల్స్ తప్ప ఇక్కడ పెద్దగా మార్పులు చేయలేదు. దీని వెనక భాగంలో చేసిన మార్పులలో టెయిల్ లాంప్స్, బంపర్‌లో ఉన్నాయి.

BMW iX ఫేస్‌లిఫ్ట్ ఇంటీరియర్:ఈ కారు ఇంటీరియర్ విషయానికొస్తే దీని క్యాబిన్​లో పెద్దగా మార్పులు చేయలేదు. దీని బేసిక్ డిజైన్​లో ఎటువంటి మార్పు లేదు. ఇది ముందు సీట్లలో పెద్ద ఇంటిగ్రేటెడ్ హెడ్‌రెస్ట్‌లను కలిగి ఉంది. ఈ కారులోని ఎంపిక చేసిన వేరియంట్లలో M స్పోర్ట్స్ ప్యాకేజీతో M మల్టీఫంక్షన్ సీట్లను కూడా సెలెక్ట్ చేసుకోవచ్చు. అయితే ఈ ప్యాక్ టాప్ వేరియంట్లలో స్టాండర్డ్​గా వస్తుంది. వీటితో పాటు కారులోని డిజిటల్ ఇన్‌స్ట్రుమెంట్ క్లస్టర్ అండ్ సెంట్రల్ టచ్‌స్క్రీన్‌లకు ఇప్పుడు BMW iDrive 8.5 సాఫ్ట్‌వేర్ అందించారు.

BMW iX ఫేస్‌లిఫ్ట్ పవర్‌ట్రెయిన్: ఈ కారులో బిగ్గెస్ట్ ఛేంజ్ దాని పవర్​ట్రెయిన్​లో చేశారు. ఈ కొత్త BMW iX ఫేస్‌లిఫ్ట్ దాని పాత xDrive40, xDrive50, M60 వేరియంట్‌లను కొత్త xDrive45, xDrive60, M70 వేరియంట్‌లతో భర్తీ చేసింది. దీని కొత్త పేరుకు తగ్గట్టుగానే దీని పవర్, ఎఫిషియన్సీ కూడా పెరిగాయి. కంపెనీ తన ఫ్లాగ్‌షిప్ ఎలక్ట్రిక్ SUV ఎలక్ట్రిక్ మోటార్లను కూడా మెరుగుపరిచినట్లు చెబుతోంది.

ఈ ఇంప్రూవ్మెంట్ దాని మోటార్లను మరింత శక్తివంతంగా, సమర్థవంతంగా చేసింది. BMW xDrive45 గరిష్ట శక్తి 402 bhp, టార్క్ 700 Nm. ఇది పాత xDrive40 322 bhp శక్తి, 630 Nm టార్క్ కంటే ఎక్కువ. మరోవైపు బ్యాటరీ ప్యాక్ కొత్త సెల్ కెమిస్ట్రీని కూడా కలిగి ఉంది. ఇది బ్యాటరీని 94.8 kWhగా చేస్తుంది. దాని రేంజ్​ను 602 కిమీ (WLTP)కి పెంచుతుంది.

దీని xDrive60 వేరియంట్ 536 bhp పవర్, 765 Nm టార్క్‌ను అందిస్తుంది. ఇది పాత xDrive 50 516 bhp పవర్, 765 Nm టార్క్ కంటే ఎక్కువ. ఈ వేరియంట్‌లో బ్యాటరీ సామర్థ్యం కూడా పెంచారు. దీనిలో 109.1 kWh బ్యాటరీ అమర్చారు. ఇది కారుకు 701 కి.మీ (WLTP) రేంజ్​ను ఇస్తుంది.

ఇక కొత్త M70 ఈ రేంజ్​లో అత్యంత శక్తివంతమైన BMW iX. దీని పవర్‌ట్రెయిన్ కూడా అప్‌గ్రేడ్ చేశారు. ఇది 650 bhp శక్తిని, 1015 Nm టార్క్‌ను ఉత్పత్తి చేస్తుంది. దీని పవర్​ను 40 bhp పెంచారు. ఈ SUVలో 108.9 kWhకు పెరిగిన సామర్థ్యం గల బ్యాటరీని అమర్చారు. ఇది ఈ కారుకు 600 కి.మీ (WLTP) సర్టిఫైడ్ రేంజ్ ఇస్తుంది.