Viral Video : కారు ఆపమన్నందుకు ఏకంగా హోంగార్డ్ పైకి ఎక్కించాడు!

పంజాగుట్ట పరిధిలో కారు బీభత్సం - తనిఖీల సమయంలో కారు ఆపకుండా దూసుకెళ్లిన డ్రైవర్‌ - అడ్డుకోబోయిన హోంగార్డ్ పైకి ఎక్కించిన డ్రైవర్

Panjagutta Car Incident : హైదరాబాద్​లోని పంజాగుట్ట నాగార్జున సర్కిల్​లో నాలుగు రోజుల క్రితం ఓ కారు డ్రైవర్‌ చేసిన బీభత్సం తాజాగా వెలుగులోకి వచ్చింది. నాగార్జున సర్కిల్‌ వద్ద వాహనాల బ్లాక్‌ ఫిల్మ్‌ చెకింగ్‌ జరుగుతోంది. ఇందులో భాగంగా హోంగార్డు రమేశ్ ఓ కారును ఆపేందుకు ప్రయత్నించాడు. అయితే డ్రైవర్ సయ్యద్‌ నజీర్‌ కారు ఆపకుండా ముందుకెళ్లబోయాడు. దీంతో రమేశ్ కారుకు అడ్డుగా వచ్చి ఆపబోయాడు. డ్రైవర్ మరింత వేగంగా కారును పోనిచ్చి రమేశ్‌పైకి దూసుకెళ్లాడు. హోంగార్డును కారుతో కొంత దూరం ఈడ్చుకెళ్లాడు. ఈ ప్రమాదంలో రమేష్​కు తృటిలో ప్రమాదం తప్పింది.

పోలీసులు డ్రైవర్‌ను అదుపులోకి తీసుకొని ట్రాఫిక్‌ ఎస్‌ఐ ఫిర్యాదుతో కేసు నమోదు చేశారు. పోలీసులపై రోజురోజుకు ఇలాంటి వికృత చర్యలు జరుగుతూనే ఉన్నాయి. ప్రజలకు రక్షణ కల్పించే పోలీసులపైనే ఇలా చేయడం సరైనది కాదని నెటిజన్లు సోషల్​ మీడియాలో వారి అభిప్రాయాలు వ్యక్తం చేస్తున్నారు. వాహనాల తనిఖీలకు సహకరించాలని పలువురు కోరుతున్నారు. హోంగార్డుని చూసి కూడా అతనిపైకి దూసుకెళ్లడం దారుణమని, కనీసం వారి పట్ల మానవత్వం చూపించరా అనే ప్రశ్నలు తలెత్తుతున్నాయి.