ఈదురుగాలులకు కూలిన మానేరు వాగుపై నిర్మాణంలో ఉన్న వంతెన - BRIDGE COLLAPSES IN MANAIR VAGU

Under Construction Bridge Collapses in Manair Vagu : మానేరు వాగులో నిర్మాణంలో ఉన్న వంతెన గడ్డర్లు ఈదురుగాలులకు ఒక్కసారిగా కుప్పకూలిపోయాయి. ఈ ఘటన సోమవారం రాత్రి సమయంలో జరగడంతో పెను ప్రమాదం తప్పింది. పెద్దపల్లి జిల్లా ముత్తారం మండలం ఓడేడు పరిధిలో ఈ ఘటన జరిగింది.

Under Construction Bridge Girder Collapses in Manair Vagu : ఈదురుగాలులకు మానేరు వాగుపై నిర్మిస్తున్న హై లెవెల్​ వంతెన సిమెంట్​ గడ్డర్లు ఒక్కసారిగా కుప్పకూలిపోయాయి. ఈ సంఘటన పెద్దపల్లి జిల్లా ముత్తారం మండలం ఓడేడు గ్రామంలో జరిగింది. అయితే ఈ సంఘటన జరిగినప్పుడు అక్కడ ఎవరూ లేకపోవడంతో పెను ప్రమాదమే తప్పినట్లు అయింది. ప్రాణనష్టం లేకపోవడంతో అధికారులు కూడా కాస్త ఊపిరి తీసుకున్నారు. అయితే కూలడానికి గల కారణాలు ఇంకా తెలియాల్సి ఉంది. ఈ వంతెనను జయశంకర్​ భూపాలపల్లి జిల్లా, టేకుమట్ల మండలం గర్మళ్లపల్లి-పెద్దపల్లి జిల్లా ముత్తారం మండలం ఓడేడు గ్రామాల మధ్యలో మానేరు వాగుపై రాకపోకలకు ఇబ్బందులు తలెత్తకుండా నిర్మిస్తున్నారు.

స్థానికులు తెలిపిన వివరాల ప్రకారం : సోమవారం అర్ధరాత్రి వీచిన గాలి దుమారానికి మానేరు వాగుపై నిర్మిస్తున్న హై లెవెల్​ వంతెన సిమెంట్​ గడ్డర్స్​ కూలిపోయాయి. పెద్దపల్లి జిల్లా మానేరు వాగుపై దాదాపు రూ.46 కోట్లతో 2016లో వంతెన నిర్మాణానికి అప్పటి మంత్రులు తుమ్మల నాగేశ్వరరావు, ఈటల రాజేందర్​ శంకుస్థాపన చేశారు. అనంతరం 2023-24 లో మరోక రూ.11 కోట్ల నిధులను ఈ వంతెన నిర్మాణానికి అదనంగా కేటాయించారు. ఇది పూర్తి అయితే ఉమ్మడి వరంగల్​, కరీంనగర్​, ఆదిలాబాద్​ జిల్లాలకు రవాణా మెరుగుపడుతుంది.

ఈ వంతెన పూర్తయితే పెద్దపల్లి జిల్లా ముత్తారం మండలం ఓడేడు గ్రామం, టేకుమట్ల మండలం గర్మిళ్లపల్లి గ్రామాల మధ్య రాకపోకలు సాఫీగా సాగేవి. జయశంకర్​ భూపాలపల్లి జిల్లా, పెద్దపల్లి జిల్లాల మధ్య దూరం తగ్గించడానికి ఈ వంతెన నిర్మాణం చేపట్టారు. గత తొమ్మిదేళ్లుగా నిర్మాణం కొనసాగుతోందని స్థానికులు తెలిపారు.

ఈ వంతెన పక్కనే తాత్కాలిక మట్టి రహదారి నిర్మాణం చేసి ఇరువైపులా రాకపోకలు కొనసాగిస్తున్నారు. ఈ రహదారిపై రాత్రి రాకపోకలు లేకపోవడంతో పెద్ద ప్రమాదం తప్పినట్లు అయిందని స్థానికులు తెలుపుతున్నారు. నిర్మాణం పూర్తి కాకముందే నేలకొరగడంతో నాణ్యత లోపం ఉందని, పూర్తి బాధ్యత సంబంధిత గుత్తేదారు, అప్పటి ఎమ్మెల్యే, జడ్పీటీసీ పుట్ట మధుకర్​ బాధ్యత వహించాలని, ప్రభుత్వం కఠినమైన చర్యలు తీసుకోవాలని డిమాండ్​ చేస్తున్నారు.