నడుము నొప్పితో ఏ పని చేయలేకపోతున్నారా? ఈ మందు తీసుకుంటే రిలీఫ్ ఉండే ఛాన్స్!

-నడుం నొప్పి తరచూ ఇబ్బంది పెడుతోందా? -ఆయుర్వేద పద్ధతిలో చక్కటి పరిష్కార మార్గం!

Back Pain Treatment in Ayurveda: ఈ మధ్య కాలంలో చాలా మంది నడుము నొప్పితో తీవ్ర ఇబ్బందులు పడుతున్నారు. ఇందుకు ఎక్కువసేపు ఒకే దగ్గర కూర్చోవడం, అధిక సమయం డ్రైవింగ్​ చేయడం, పోషకాహార లోపం వంటి అనేక కారణాలు ఉన్నాయని నిపుణులు చెబుతున్నారు. అయితే, నడుము నొప్పిని తగ్గించుకునేందుకు చాలా మంది పెయిన్ బామ్స్​, పెయిన్​ కిల్లర్స్​ వినియోగిస్తుంటారు. కానీ, వీటివల్ల తాత్కాలికంగా మాత్రమే ఉపశమనం లభిస్తుందని అంటుంటారు. ఈ నడుము నొప్పి తగ్గడానికి ఆయుర్వేదంలో చక్కని పరిష్కారం ఉందని డాక్టర్​ గాయత్రీ దేవీ చెబుతున్నారు. ఈ నేపథ్యంలోనే ఔషధాన్ని ఎలా తయారు చేసుకోవాలో ఇప్పుడు చూద్దాం.

కావాల్సిన పదార్థాలు

• 50 గ్రాముల దుంపరాష్ట్రం చూర్ణం
• 25 గ్రాముల ఆముదపు వేరు చూర్ణం
• 25 గ్రాముల దేవదారు చూర్ణం
• 25 గ్రాముల పునర్నవ చూర్ణం
• 25 గ్రాముల గోక్షురా (పల్లేరు) చూర్ణం

తయారీ విధానం

• ముందుగా ఓ గిన్నెను తీసుకుని అందులో దుంపరాష్ట్రం, ఆముదపు వేరు, దేవదారు, పునర్నవ, గోక్షూరా చూర్ణాలు వేసుకుని బాగా కలపాలి.
• ఆ తర్వాత స్టౌ ఆన్ చేసి ఓ గిన్నెలో 100 మిల్లిలీటర్ల నీళ్లు, 5 గ్రాముల మిశ్రమం పోసి మరిగించాలి.
• దీనిని సన్నటి మంటపై పెట్టుకుని నాలుగో వంతు నీరు ఆవిరయ్యే వరకు వేడి చేసుకోవాలి.
• అనంతరం స్టౌ ఆఫ్ చేసుకుని ఈ మిశ్రమాన్ని వడపోసుకుని గోరు వెచ్చగా ఉన్నప్పుడే తీసుకోవాలని డాక్టర్ గాయత్రీ దేవి చెబుతున్నారు.
• దీనిని ఆహారం తీసుకున్న 10 నిమిషాల తర్వాత ఉదయం, సాయంత్రం రెండు పూటల తీసుకోవాలని అంటున్నారు.

దుంపరాష్ట్రం: ఇది కీళ్ల నొప్పులు తగ్గడానికి బాగా ఉపయోగపడుతుందని డాక్టర్ గాయత్రీ దేవి చెబుతున్నారు. అలాగే వెన్ను పూసల మధ్యలో నొప్పిని కూడా తగ్గించడంలో సహాయ పడుతుందని అంటున్నారు.

ఆముదపు వేరు; ఇది రకరకాల వాత దోషాన్ని తగ్గించడానికి ఎంతో సహాయ పడుతుందని చెబుతున్నారు. ముఖ్యంగా నడుము నొప్పి తగ్గిస్తుందని అంటున్నారు.

పునర్నవ: నడుము నొప్పి ఉన్నప్పుడు ఏర్పడే వాపు, నీటిని తగ్గిస్తుందని వివరిస్తున్నారు. ఇది వాతదోషాన్ని తగ్గించడంలో సహాయ పడుతుందని అంటున్నారు.

గోక్షూరా: ఇది వాతదోషంతో పాటు నడుము నొప్పితో ఏర్పడే వాపును తగ్గిస్తుందని చెబుతున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.