రోజూ ఎంత సేపు నడిస్తే షుగర్​ కంట్రోల్​ అవుతుంది? - నిపుణుల ఆన్సర్​ ఇదే!

-డయాబెటిస్​ బాధితులకు వాకింగ్​ మంచిదంటున్న నిపుణులు -రోజూ ఇంత సమయం నడిస్తే ఎన్నో ప్రయోజనాలట

How Long Should Diabetic Patients Walk per Day: ప్రస్తుత కాలంలో టైప్-2 డయాబెటిస్ కేసులు భారీగా పెరుగుతున్నాయి. ఇక ఇది ఒక్కసారి వచ్చిందంటే జీవితాంతం చక్కెర స్థాయిలను అదుపులో ఉంచుకునే ప్రయత్నాలు చేయాలి. అయితే జీవన శైలి మార్పులు, సరైన ఆహారపు అలవాట్లు పాటిస్తే ఈ ముప్పు తగ్గుతుందని సూచిస్తున్నారు నిపుణులు. ముఖ్యంగా రోజూ వాకింగ్ చేయడం వల్ల మధుమేహులకు ఎంతో మేలు జరుగుతుందని వెల్లడిస్తున్నారు. మరి, రక్తంలో చక్కెర స్థాయులు అదుపులో ఉండాలంటే రోజుకు ఎంత సేపు నడవాలి? వారానికి ఎంత సమయం కేటాయించాలి? తీసుకోవాల్సిన జాగ్రత్తలు ఏంటి? అనే వివరాలు ఈ స్టోరీలో తెలుసుకుందాం..

పరిశోధన వివరాలు: రక్తంలో చక్కెర స్థాయులు అదుపులో ఉండాలంటే డయాబెటిస్ బాధితులు రోజుకు 30 నిమిషాలు నడిస్తే మంచిదని చెబుతున్నారు. అలాగే వారం మొత్తం కాకపోయినా కనీసం వారంలో 5 రోజులు, రోజుకి 30 నిమిషాలు వాకింగ్​ చేస్తే మంచిదంటున్నారు. ఇదే విషయం American Diabetes Association సంస్థ వెబ్​సైట్​లో ప్రచురితమైంది(రిపోర్ట్ కోసం ఇక్కడ క్లిక్ చేయండి).

ఇలా డివైడ్​ చేసుకోండి: రోజులో ఒకేసారి అరగంట వాకింగ్ చేసేందుకు సమయం లేని వారు, వీలు కాని వారు.. దాన్ని భాగాలుగా విభజించుకోవాలని చెబుతున్నారు. అంటే వాకింగ్ చేసినప్పుడల్లా 10 నిమిషాలు నడిచేలా చూసుకోవాలని సూచిస్తున్నారు. బ్రేక్​ఫాస్ట్​, లంచ్​, డిన్నర్​ అనంతరం కనీసం పది నిమిషాలు నడిస్తే రక్తంలో చక్కెర స్థాయులు అదుపులోకి వస్తాయని చెబుతున్నారు. ఇక ఆహారం తేలికగా జీర్ణం అయ్యేందుకు వీలుగా భోజనం అనంతరం పది నిమిషాలు షార్ట్ వాక్​ చేయాలని అంటున్నారు. అంతేకాకుండా నడక సమయంలో గంటకు మూడు నుంచి నాలుగు మైళ్ల వేగంతో నడిస్తే ఇన్సులిన్ స్థాయులు పెరగడంతో పాటు గుండె సంబంధిత సమస్యలు అదుపులో ఉంటాయని సూచిస్తున్నారు.

ఈ జాగ్రత్తలు: ఈ క్రమంలోనే వాకింగ్​ చేసే ముందు పలు జాగ్రత్తలు తీసుకోవాలని చెబుతున్నారు. జాయింట్లపై ఒత్తిడి పడకుండాఉండాలంటే సమాంతరంగా ఉన్న నేలపై నడక కొనసాగించాలని సూచిస్తున్నారు. ఆ తర్వాత రాళ్లలో, మెట్లు ఎక్కడం, దిగడం చేయాలని చెబుతున్నారు. వాతావరణం అనుకూలంగా ఉన్నప్పుడు ఉదయం లేదా సాయంత్రం వేళల్లో వాకింగ్​కు ప్రత్యేక సమయం కేటాయించాలని అంటున్నారు.

వాకింగ్​తో మరిన్ని ప్రయోజనాలు:

మంచి ఫిజిక్​: క్రమం తప్పకుండా వాకింగ్ చేయడం వల్ల కండరాలు దృఢంగా మారి శరీరాకృతి మారుతుందని నిపుణులు అంటున్నారు. శరీరం వంగిపోకుండా నిటారుగా నిలబడతారని.. సూపర్ ఫిజిక్ ఉంటుందని వివరిస్తున్నారు.

బరువు తగ్గుతారు: రోజూ వాకింగ్ చేయడం వల్ల బరువు తగ్గుతారని అంటున్నారు. వాకింగ్ వల్ల కెలరీలు కరిగి బరువు తగ్గుతారని, కొవ్వును కూడా కరిగిస్తుందని వివరిస్తున్నారు.

చర్మం కాంతివంతం: వాకింగ్ చేయడం వల్ల రక్త ప్రసరణ పెరిగి చర్మానికి ఆక్సిజన్, పోషకాలు సరిగ్గా అందుతాయని వెల్లడిస్తున్నారు. ఫలితంగా ముఖంలో నీరసం పోయి సహజ కాంతితో తాజాగా ఉండేలా చేస్తుందని వివరిస్తున్నారు.

NOTE: ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.