DNA Confirmation : నేరం ఏదైనా సరే నిందితుడిని పట్టుకోవడం అంత తేలిక కాదు. కానీ ఒకే ఒక్క టెస్ట్ ద్వారా ఆ పరిసరాలను జల్లేడ పడుతూ చిన్న వెంట్రుక, చెమట చుక్క వంటి వాటిని దొరకబుచ్చుకొని సులభంగా నేరస్థుడు ఎవరనేది స్పష్టంగా చెప్పేస్తోంది. అదే డీఎన్ఏ నిర్ధారణ పరీక్ష. కానీ ఈ డీఎన్ఏ పరీక్షను చేయాలంటే గరిష్ఠంగా 3 నెలల వరకు సమయం పట్టేది. కానీ ఇప్పుడు ఆ సమస్యలన్నీ అధిగమిస్తూ కేవలం 24 గంటల్లో లేదా 15 రోజుల్లోనే పూర్తి నివేదిక పోలీసులకు అందుతుంది. దీన్ని ఎన్జీఎస్(నెక్ట్స్ జనరేషన్ సీక్వెన్సింగ్) అంటారు. ఈ సాంకేతిక పరిజ్ఞానాన్ని ఉపయోగించి నేరస్థులను తొందరగా గుర్తిస్తున్నారు.
తెలంగాణ ఫోరెన్సిక్ ల్యాబోరేటరీ (టీజీఎఫ్ఎస్ఎల్)లో డీఎన్ఏ నిర్ధారణ అత్యంత తక్కువ సమయంలో నివేదికలు రూపొందించే పరిజ్ఞానాన్ని వినియోగిస్తున్నారు. దీనికి నెక్ట్స్ జనరేషన్ సీక్వెన్సింగ్ సాంకేతిక పరిజ్ఞానాన్ని ఉపయోగిస్తూ సత్ఫలితాలను సాధిస్తున్నారు. ఈ క్రమంలో గతంలో మాదిరి కాకుండా కేవలం కనిష్ఠంగా అయితే 24 గంటల్లోపు, గరిష్ఠంగా 15 రోజుల్లోపు నివేదికలను పోలీసులకు అందజేస్తున్నారు. పోక్సో కేసుల్లో అయితే మాత్రం వీలైనంత తొందరగానే విశ్లేషించి నివేదిక ఇస్తున్నారు.
పక్షం రోజుల్లో రిజల్ట్ : సామూహిక అత్యాచార కేసుల్లో మాత్రం గరిష్ఠంగా 3 నెలల వరకు సమయం తీసుకుంటుండగా, ఇలాంటి కేసుల్లో పలువురి డీఎన్ఏలను విశ్లేషించాల్సిన అవసరం రావడంతో కొంత సమయం తీసుకోవాల్సి వస్తోంది. అంతకుముందు ఇలాంటి కేసుల్లో అయితే డీఎన్ఏ నిర్ధారణకు 2నుంచి3 నెలల సమయం పట్టేది, అలాగే కొన్ని కేసుల్లో అయితే ఏకంగా ఏడాది సమయం పట్టేది. ఇప్పుడు ఎన్జీఎస్ సాంకేతిక పరిజ్ఞానాన్ని అందుబాటులోకి తీసుకురావడంతో పలు ఇబ్బందులు దూరం అయ్యాయి.
తద్వారా నేరాల దర్యాప్తులో జాప్యాన్ని తగ్గించి నివారించగలుగుతున్నారు. ఈమేరకు పోలీసులు న్యాయస్థానాల్లో అభియోగపత్రాలను తొందరగా దాఖలు చేసి దర్యాప్తును ముగిస్తున్నారు. వాస్తవానికి నేరపరిశోధన క్రమంలో పలు కేసుల్లో డీఎన్ఏ నిర్ధారణే అత్యంత కీలకం. ముఖ్యంగా ఆనవాళ్లు తెలియని మృతదేహాలను గుర్తించడంలో, జీవ సంబంధాన్ని నిర్ధరించేందుకు ఇది ఉపయోగపడుతుంది. ఇలాంటి కేసులు నెలకు సగటున వంద వరకు టీజీఎఫ్ఎస్ఎల్కు వస్తుంటాయి.
అన్ని కేసుల్లోనూ పురోగతి : గతంలో ఎఫ్ఎస్ఎల్లో సరైన వనరులు అందుబాటులో ఉండేవి కావు. సాంకేతిక అంత బలంగా లేకపోవడంతో నేరాల విశ్లేషణకు చాలా జాప్యం జరిగేది. కానీ కీలకమైన కేసుల్లో మాత్రమే ప్రత్యేక చొరవ తీసుకొని తొందరగా నివేదికను ఇచ్చేవారు. గతంలో మహబూబ్నగర్ జిల్లా పాలెంలో బస్సు దగ్ధం దుర్ఘటన కేసులో రేయింబవళ్లు పనిచేసి వారం రోజుల్లోనే డీఎన్ఏ సీక్వెన్సింగ్ను పూర్తి చేశారు. ఇప్పుడు ఎన్జీఎస్ లాంటి ఆధునిక సాంకేతిక పరిజ్ఞానం అందుబాటులోకి రావడంతో దాదాపు అన్ని కేసుల్లోనూ ఇలాంటి పురోగతి వస్తుంది. దీంతో పక్షం రోజుల్లోనే నివేదికలు రూపొందించి పోలీసులకు అందజేయగలుగుతున్నారు.
