కేటీఆర్ క్వాష్‌ పిటిషన్​పై తీర్పు రిజర్వు - అప్పటి వరకు అరెస్టు చేయవద్దని ఉత్తర్వులు

కేటీఆర్ క్వాష్‌ పిటిషన్‌పై హైకోర్టులో ముగిసిన వాదనలు - కేటీఆర్‌ క్వాష్‌ పిటిషన్‌పై తీర్పును రిజర్వు చేసిన హైకోర్టు - అప్పటి వరకు కేటీఆర్‌ను అరెస్టు చేయవద్దంటూ ఉత్తర్వులు

TG High Court On KTR Formula E Car Race Case : ఫార్ములా-ఈ రేసు వ్యవహారంపై ఏసీబీ నమోదు చేసిన కేసును కొట్టివేయాలంటూ మాజీ మంత్రి కేటీఆర్‌ దాఖలు చేసిన క్వాష్‌ పిటిషన్‌పై తీర్పును హైకోర్టు రిజర్వు చేసింది. ఇవాళ ఈ పిటిషన్​పై వాదనల అనంతరం తీర్పును రిజర్వ్ చేస్తున్నట్లు ధర్మాసనం ప్రకటించింది. అప్పటివరకు కేటీఆర్​ను అరెస్ట్ చేయవద్దని ఆదేశించింది.

ఇవాళ కేటీఆర్ పిటిషన్‌పై ఇప్పటికే ఏసీబీ కౌంటర్‌ దాఖలు చేసింది. అందులో కేసుకు సంబంధించి పలు అంశాలు పేర్కొన్న ఏసీబీ, నిబంధనలకు విరుద్ధంగా డబ్బు చెల్లించారని కోర్టుకు తెలిపింది. అవినీతి నిరోధక చట్టం, నేరపూరిత కుట్ర సెక్షన్లు పెట్టినట్లు పేర్కొంది. ప్రజాధనం దుర్వినియోగం చేసినందుకు కేటీఆర్‌పై కేసు నమోదు చేశామనని ఏసీబీ తెలిపింది. ఫార్ములా-ఈ ఆపరేషన్స్ సంస్థను ఎఫ్​ఐఆర్​లో చేర్చారా అని అడిగిన హైకోర్టు, ఇందులో ఎవరెవరి మధ్య ఒప్పందం జరిగిందని ప్రశ్నించింది.

విదేశీ సంస్థకు పౌండ్ల రూపంలో రూ.46 కోట్లను చెల్లించారని, ఇందులో ఆర్బీఐ నిబంధనలను పాటించలేదని ఏసీబీ ఆరోపించింది. హెచ్​ఎండీఏ నుంచి రూ.10 కోట్లకు మించి చెల్లిస్తే ఆర్థికశాఖ అనుమతి ఉండాలన్న ఏసీబీ, ఎవరి అనుమతి లేకుండానే 54 కోట్లు చెల్లించారని కౌంటర్‌లో పేర్కొంది. కేటీఆర్​ తరపున సుప్రీంకోర్టు సీనియర్ లాయర్‌ సిద్ధార్థ్ దవే వాదనలు వినిపించారు. ఏసీబీ అధికారులు నమోదు చేసిన సెక్షన్లు ఎఫ్​ఐఆర్​కు వర్తించవని వాదించారు. ఫార్ములా-ఈ కార్ల రేసు నిర్వహణ ఒప్పందంపై పురపాలక శాఖ ముఖ్య కార్యదర్శి సంతకం చేశారని తెలిపారు. ఆ శాఖకు మంత్రిగా ఉన్న కేటీఆర్‌ను ఎఫ్‌ఐఆర్‌లో నిందితుడిగా చేర్చడం తగదని వాదించారు.

ఇప్పటివరకు ఎవరిని అరెస్టు చేయలేదు : కేటీఆర్‌ ఎక్కడా లబ్ధి పొందలేదని వాదించిన సీనియర్ లాయర్‌ సిద్దార్థ్ దవే, అవినీతి జరిగినట్లు ఎక్కడా ఆధారాలు చూపించలేదని తెలిపారు. ఈ మేరకు ఎఫ్‌ఐఆర్‌ కొట్టివేయాలని కోరారు. భోజన విరామం తర్వాత ఏజీ, గతంలో జీహెచ్​ఎంసీ కమిషనర్​గా ఉన్న దానకిషోర్ లాయర్‌ కోర్టుకు వాదనలు వినిపించారు. ఏసీబీ తరఫున వాదనలు వినిపించిన ఏజీ ఎ.సుదర్శన్‌రెడ్డి, ఈ-కార్ల రేసింగ్ సీజన్-10 ఒప్పందానికి ముందే చెల్లింపులు చేశారని తెలిపారు. రూ.46 కోట్లను బ్రిటన్ పౌండ్లు రూపంలో చెల్లించారని వివరించారు. ఈ క్రమంలో దర్యాప్తు ఏ దశలో ఉందని అడ్వకేట్‌ జనరల్‌ను హైకోర్టు ప్రశ్నించింది. ఫిర్యాదుదారు దానకిషోర్ వాంగ్మూలం సేకరించినట్లు ఏజీ తెలిపారు.

నిందితులు ఏమైనా పిటిషన్లు దాఖలు చేశారా ?, ఈ కేసులో నిందితులుగా ఉన్న అర్వింద్ కుమార్, బీఎల్‌ఎన్‌ రెడ్డి పిటిషన్లు దాఖలు చేశారా అని హైకోర్టు ప్రశ్నించింది. నిందితులు పిటిషన్లు దాఖలు చేయలేదని చెప్పిన అడ్వకేట్ జనరల్, కేసులో ఇప్పటివరకు ఎవరిని అరెస్టు చేయలేదని కోర్టుకు తెలిపారు. కేసు దర్యాప్తు ప్రాథమిక దశలోనే ఉందని, అన్ని ఆధారాలు బయటపడతాయని ఏజీ తెలిపారు. గవర్నర్ అనుమతి తర్వాతే ఎఫ్‌ఐఆర్‌ నమోదు చేశామని వివరించారు.

తీర్పు ఇచ్చేవరకు కేటీఆర్‌ను అరెస్టు చేయవద్దంటూ : దానకిశోర్ తరఫున సీనియర్ న్యాయవాది మోహన్‌రెడ్డి హైకోర్టుకు వాదనలు వినిపించారు. మంత్రి పర్యవేక్షణలోనే పురపాలకశాఖ అధికారులు విధులు నిర్వహిస్తారని, రేసింగ్‌కు చెల్లింపుల దస్త్రాన్ని అప్పటి మంత్రి కేటీఆర్‌ ఆమోదించారని న్యాయవాది కోర్టుకు తెలిపారు. రేసింగ్‌ అంశంలో అన్నిరకాలుగా నిబంధనలు ఉల్లంఘించారని వివరించారు. ఈ నేపథ్యంలో ఇరువురి వాదనలు విన్న హైకోర్టు కేటీఆర్‌ క్వాష్‌ పిటిషన్‌పై తీర్పును రిజర్వు చేసింది. తీర్పు ఇచ్చేవరకు కేటీఆర్‌ను అరెస్టు చేయవద్దంటూ ఇచ్చిన మధ్యంతర ఉత్తర్వులను పొడిగించింది.