మీ ఇంటి కనెక్షన్​కు ఈ పరికరాన్ని యాడ్ చేయండి - ఇక 'కరెంట్ షాక్'​ టెన్షనే ఉండదు

ఈ ప్రత్యేక విద్యుత్ పరికరాలతో విద్యుత్ షాక్​ నుంచి రక్షణ - రెసిడ్యుయల్‌ కరెంట్ డివైజ్‌(ఆర్‌సీడీ) మీ ఇంట్లో ఉంటే మీరు సేఫ్! - ఈ పరికరాలతో విద్యుత్ ప్రమాదాలను నివారించవచ్చంటున్న అధికారులు

Electrical Shock Protections :నిత్యం ఎక్కడ చూసినా తరచూ విద్యుత్ ప్రమాదాలు జరుగుతూనే ఉన్నాయి. ఆ ప్రమాదాలు వైర్లను ఎలుకలు కొరకడం వల్లనో, షార్ట్​ సర్య్కూట్ కారణంగానే మిక్సీలు, ఇస్త్రీ పెట్టెలు, గ్రైండర్​లు, గీజర్లు, ఏసీలు, రిఫ్రిజిరేటర్లు కాలిపోవడం వంటివి చూస్తున్నాం. అలాగే వ్యవసాయ మోటార్లు కాలిపోవడం చూస్తున్నాం. ఇలాంటి ఘటనల్లో మనుషులు, జంతువులు తీవ్రంగా గాయపడటం గానీ, ప్రాణాలు కోల్పోవడం గానీ సర్వసాధారణం అయిపోయింది. మరీ ముఖ్యంగా వర్షాల సమయంలో ఈ సమస్య మరింత జఠిలంగా మారింది. అందుకే ఇలాంటి కరెంట్ షాకుల వల్ల జరిగే ప్రమాదాల నుంచి రక్షించేందుకు ప్రత్యేక పరికరాలు అందుబాటులోకి వచ్చాయి. ఇవి ప్రస్తుతం మార్కెట్​లో అనేక రకాల పేర్లతో అమ్ముడవుతున్నాయి.

రకాలు :

• ఎర్త్‌ లీకేజ్‌ సర్య్కూట్ బ్రేకర్‌ (ఈఎల్‌సీబీ)
• రెసిడ్యుయల్‌ కరెంట్ డివైజ్‌ (ఆర్‌సీడీ)
• రెసిడ్యుయల్‌ కరెంట్ సర్క్యూట్ బ్రేకర్‌ (ఆర్‌సీసీబీ)
• గ్రౌండ్‌ ఫాల్ట్‌ సర్య్కూట్ ఇంటర్రప్టర్‌ (జీఎఫ్‌సీఐ)

ఇంటిని భద్రంగా కాపాడుకోవచ్చు :గృహాలతో పాటు, లో టెన్షన్‌ విద్యుత్తు వినియోగదారులు ఈ పేర్లతో పిలిచే పరికరాలను తమ సర్వీసు కనెక్షన్లకు కలిపి ఉంచితే విద్యుత్ ప్రమాదాలు నివారించవచ్చని విద్యుత్ అధికారులు తెలుపుతున్నారు. వీటికి ఉండే ప్రత్యేకత ఏంటంటే స్వల్ప విద్యుదాఘాతం జరగ్గానే, వెంటనే ఈ పరికరం స్విచ్ ఆఫ్​ అవుతుంది. దీంతో ఇంటి మొత్తానికి కరెంట్ సప్లయి అనేది నిలిచిపోతుంది. తద్వారా ఇంటి మొత్తం విద్యుత్​ ఘాతానికి గురి కాకుండా రక్షణ దొరుకుతుంది. మళ్లీ స్విచ్ ఆన్​ చేసి తిరిగి ఉపయోగించుకోవచ్చు. ఇప్పుడు కొత్తగా కట్టే ప్రతి ఇంట్లోనూ ఈ సేఫ్టీ పరికరాల్లో ఏదో ఒకటి ఉపయోగిస్తున్నారు.

సేఫ్టీ పరికరాల్లో ఎక్కడ ఏది ఉపయోగించాలి :నివాసాలకు 30 యాంప్స్​ ఈఎల్​సీబీ సరిపోతుంది. దీని ఖరీదు సుమారు రూ.2 వేల వరకు ఉంటుంది. మోల్డెడ్​ కేస్​ సర్క్యూట్​ బ్రేకర్ (ఎంసీసీబీ), మినియేచర్​ సర్క్యూట్​ బ్రేకర్ (ఎంసీబీ) పరికరాలను ఒక్కో గదికి విద్యుత్ సరఫరా చేసే లైన్​కు కలవచ్చు. ఇది ఆ ఆ గదుల్లో జరిగే విద్యుత్​ ప్రమాదాలను నివారిస్తుంది. ఈ పరికరాలు విద్యుత్ షార్ట్ సర్క్యూట్​తో జరిగే అగ్ని ప్రమాదాలను నివారిస్తాయి.

ప్రాణాలు కాపాడుకోవచ్చు :ఈ పరికరాలను ఇళ్లలో ఏర్పాటు చేసుకుంటే ప్రాణాలు కాపాడుకోవచ్చునని టీజీఎన్పీడీసీఎల్​ డీఈ ఎన్​.రామారావు తెలిపారు. ప్రతి గృహంలో ఈఎల్​సీబీలను బిగించడం ద్వారా విద్యుత్​ ప్రమాదాలు చాలా వరకు నివారించవచ్చని పేర్కొన్నారు. అలాగే ప్రతి ఇంటికి ఎర్తింగ్​ అనేది సక్రమంగా చేయించుకోవాలన్నారు. వీటికి వెచ్చించేది తక్కువే అయినా, విద్యుత్ ఘాతం సమయంలో విలువైన ప్రాణాలను కాపాడుకోవచ్చన్నారు. ఇది అగ్ని ప్రమాదాలను నివారిస్తుందని స్పష్టం చేశారు.