Hydra Focus On Revival Of Ponds In Hyderabad : హైదరాబాద్‌లో చెరువుల పునరుద్దరణలో హైడ్రా మరో ముందడుగు వేసింది. తొలి దశలో నగరంలోని 6 చెరువులకు పునరుజ్జీవనం కల్పించేందుకు చర్యలు చేపట్టింది. సుమారు 150 నుంచి 200 కోట్లతో ఆ చెరువులను సమీప ప్రజలకు ఉపయోగపడేలా అన్ని హంగులతో ప్రతిపాదనలు సిద్ధం చేసిన హైడ్రా జులై నాటికి పూర్తి చేసేందుకు ముమ్మరంగా పనులు చేస్తోంది.
హైదరాబాద్‌లో కబ్జాకోరల్లో చిక్కుకున్న చెరువులను విడిపిస్తోన్న హైడ్రా వాటి పునరుద్దరణకి పక్కా ప్రణాళిక సిద్ధం చేసింది. ఈ మేరకు 12 చెరువులను గుర్తించి అభివృద్ధి చేయాలని నిర్ణయించింది. అందులో భాగంగా తొలి దశలో 6 చెరువులకు సంబంధించి ఆక్రమణలు, అనధికారిక నిర్మాణాలను తొలగించిన హైడ్రా వాటికి పునరుజ్జీవం కల్పించేందుకు పనులు మొదలుపెట్టింది. అంబర్పేట బతుకమ్మకుంట, శాస్త్రిపురంలోని బుమ్‌రుక్‌దౌలా, మాదాపూర్ తమ్మిడుకుంట, గుట్టలబేగంపేటలో సున్నంచెరువు, కూకట్పల్లి, ఉప్పల్‌లోని చెరువులు అభివృద్ధి చేయనుంది.
3డీ విజువల్స్, ఫొటోలు విడుదల : ఇప్పటికే ఉప్పల్‌లోని నల్లచెరువులో హైడ్రా పనులు ప్రారంభించింది. సుమారు 150 నుంచి 200 కోట్ల ప్రభుత్వ నిధులతో పునర్జీవం కల్పించే దిశగా ప్రత్యేక కార్యాచరణ సిద్ధం చేసింది. ఈ చెరువులకు సంబంధించిన పూర్తి నివేదికలను సిద్ధం చేసి ప్రభుత్వానికి పంపింది. ముఖ్యమంత్రి రేవంత్ రెడ్డి ఆదేశాలతో హెచ్ఎండీఏ నిధులతో త్వరలోనే టెండర్లు పిలిచి పనులు మొదలు పెట్టనున్నట్లు హైడ్రా కమిషనర్ రంగనాథ్ వెల్లడించారు. ఈ మేరకు ఆరు చెరువులకు సంబంధించిన 3డీ విజువల్స్, ఫొటోలను విడుదల చేశారు.
బతుకమ్మకుంటలో లోతు తవ్వగానే నీరు : కూకట్పల్లి నల్లచెరువులో చెత్తాచెదారం తొలగించగా ఉప్పల్ నల్లచెరువులో ఉన్న నీటిని బయటికి వదులుతున్నారు. అంబర్పేట బతుకమ్మకుంటలో జేసీబీలతో పూడిక తీత మొదలుపెట్టగా మోకాలు లోతు తవ్వగానే నీరు ఉబికిరావడం స్థానికులతో పాటు హైడ్రా అధికారులు ఆశ్చర్యపోయారు. మొదట పైపులైన్ పగిలిందని అనుమానాలు రావడంతో జలమండలి అధికారులు బతుకమ్మకుంటకు చేరుకొని పరిశీలించారు. ఆ నీరంతా భూగర్భ జలమేనని, ఎలాంటి పైపులైన్లు పగలలేదని నిర్ధారించారు.
జులై నాటికి పనులు పూర్తి చేయాలని లక్ష్యం : హైడ్రా ఎంపిక చేసిన ఆ ఆరు చెరువుల పునరుద్దరణలో భాగంగా చుట్టూ వాకింగ్ ట్రాక్స్, జిమ్, పిల్లలు ఆడుకునే విధంగా ఏర్పాట్లతో పాటు చుట్టూ ఆహ్లాదకరమైన అనుభూతిని పంచేలా తీర్చిదిద్దనున్నారు. జులై నాటికి ఈ పనులను పూర్తి చేయాలని లక్ష్యంగా హైడ్రా పని చేస్తోంది.
బతుకమ్మకుంట బతికే ఉంది - హైడ్రా మోకాల్లోతు తవ్వగానే ఉప్పొంగిన పాతాళగంగ
చెరువుల పరిరక్షణకు హైడ్రా పిలుపు - ఈ నంబర్కు ఫోన్, వాట్సప్ చేస్తే చాలు
హైడ్రా అలర్ట్ : అక్కడ ప్లాట్లు కొని ఇబ్బందులు పడొద్దు : ప్రజలకు రంగనాథ్ కీలక సూచన
