Krishna Water Disputes Issue : తెలుగు రాష్ట్రాల ఉమ్మడి నీటి ప్రాజెక్టులను కేఆర్ఎంబీకి అప్పగించేది లేదని ఇటీవల జరిగిన అసెంబ్లీ సమావేశాల్లో ప్రభుత్వం తీర్మానం చేసిన విషయం తెలిసిందే. ఈ తీర్మానం తాజాగా కేంద్ర జల్శక్తి శాఖకు చేరింది. కృష్ణా జలాలపై చేసిన తీర్మానం నేపథ్యంలో నీటి పారుదల శాఖ కార్యదర్శి కేఆర్ఎంబీకి లేఖ రాయగా, ఈ మేరకు కేఆర్ఎంబీ కేంద్ర జల వనరుల శాఖ సంయుక్త కార్యదర్శికి లేఖ రాసింది.
ఇదీ అసెంబ్లీ తీర్మానం : కృష్ణా ప్రాజెక్టులు, కేఆర్ఎంబీ సంబంధిత అంశాలపై ఇటీవల జరిగిన అసెంబ్లీ సమావేశాల్లో ప్రభుత్వం తరఫున నీటి పారుదల శాఖ మంత్రి ఉత్తమ్కుమార్ రెడ్డి తీర్మానం ప్రవేశపెట్టారు. పవర్ పాయింట్ ద్వారా ఆ విషయాలను శాసనసభ్యుల వివరించారు. షరతులు అంగీకరించకుండా ఎట్టి పరిస్థితుల్లోనూ ప్రాజెక్టులను కృష్ణా బోర్డుకు అప్పగించే ప్రసక్తే లేదని మంత్రి తేల్చి చెప్పారు.
కృష్ణా ప్రాజెక్టులను కేఆర్ఎంబీకి అప్పగించే ప్రసక్తే లేదు : మంత్రి ఉత్తమ్
ఈ క్రమంలోనే రాష్ట్ర ప్రజలను తప్పుదోవ పట్టించేలా కొందరు మాట్లాడుతున్నారని మండిపడ్డారు. అసెంబ్లీ ఎన్నికల రోజున ఏపీ ప్రభుత్వం సాగర్పై పోలీసులను మోహరించిన విషయాన్ని ఉత్తమ్కుమార్ రెడ్డి గుర్తు చేశారు. ప్రత్యేక రాష్ట్రం ఏర్పడిన తర్వాత నదీ జలాల విషయంలో తెలంగాణకు న్యాయం జరుగుతుందని అంతా ఆశించామని, అయితే రోజుకు 3 టీఎంసీల నీటిని ఆంధ్రప్రదేశ్ ప్రభుత్వం అక్రమంగా తరలించుకు వెళుతుందని ఆరోపించారు. పదేళ్ల పాటు ఏపీకి 512 టీఎంసీలు, తెలంగాణకు 219 టీఎంసీలకు గత బీఆర్ఎస్ సర్కార్ ఒప్పుకుందని వివరించారు.
బీఆర్ఎస్ పాలకులది అవగాహన లోపమో, అసమర్థతో అర్థం కావడం లేదని మంత్రి ధ్వజమెత్తారు. కృష్ణా జలాల్లో 70 శాతం హక్కు పొందేందుకు తెలంగాణకు పూర్తి అర్హత ఉందని చెప్పారు. కానీ 512:219 టీఎంసీల కేటాయింపును ఏపీ శాశ్వతం చేస్తోందన్నారు. పదేళ్ల బీఆర్ఎస్ పాలనలో జరిగిన అవినీతి, స్వతంత్ర భారతంలో ఎప్పుడూ జరగలేదని విమర్శించారు. ఈ క్రమంలోనే కేసీఆర్ చాలా గొప్పవారని ఏపీ అసెంబ్లీలో జగన్ పొగిడారని, తెలంగాణ జలాలను సైతం ఏపీకి ఇస్తున్నారని జగన్ చెప్పారని ఉత్తమ్ కుమార్ రెడ్డి స్పష్టం చేశారు.
'జల విద్యుత్ కేంద్రాల ఔట్ లెట్లను స్వాధీనం చేయాలంటే ప్రభుత్వం నుంచి ఆమోదం తీసుకోవాల్సిందే'
