Charging Unit for Electric Vehicles by QR Code :ప్రస్తుతందేశవ్యాప్తంగా ఎలక్ట్రిక్ వాహనాల వాడకం రోజురోజుకు పెరగుతోంది. ఈ నేపథ్యంలో అందుకు తగిన ఛార్జింగ్ పాయింట్లు సైతం లేకపోవడంతో సమస్యగా మారుతోంది. ఇంటి దగ్గర ఛార్జింగ్ పెట్టుకున్నా మార్గమధ్యలో ఛార్జింగ్ అయిపోతే ఎలా అన్న సమస్యే ఇప్పుడు చాలా మంది వాహనదారుల్లో గుబులు పుట్టిస్తోంది. ప్రస్తుతం పలుచోట్ల చిన్నచిన్న ఛార్జింగ్ యూనిట్లు ప్రత్యేక పరిజ్ఞానంతో వస్తున్నాయి. హైదరాబాద్ ఎన్టీఆర్‌ మార్గ్‌లో గురువారం రాష్ట్ర ప్రభుత్వం నిర్వహించిన విజయోత్సవాల సభ ప్రాంగణంలో రవాణాశాఖ ఎలక్ట్రిక్ వాహనాల స్టాల్‌ను ఏర్పాటు చేసింది. అక్కడ ఎలక్ట్రిక్ ఆటోతోపాటు స్కాన్ చేసి డబ్బులు చెల్లిస్తే ఛార్జింగ్ అయ్యే ఛార్జింగ్ యూనిట్ను ముఖ్యమంత్రి రేవంత్రెడ్డి, రవాణాశాఖ మంత్రి పొన్నం ప్రభాకర్ పరిశీలించారు.
అన్ని రకాల వాహనాలకు : క్యూఆర్‌ కోడ్‌ను స్కాన్ చేసి డబ్బులు చెల్లిస్తే ఎలక్ట్రిక్ వాహనాలకు ఛార్జింగ్ అయ్యేలా దీన్ని రూపొందించారు. ఈ ఛార్జింగ్ యూనిట్ను థండర్‌ ప్లస్‌ సొల్యూషన్స్‌ ప్రైవేట్‌ లిమిటెడ్‌ రూపొందించింది. గతంలో ఎస్డీడీ బూత్ బిజినెస్లాగే ఈవీ ఛార్జింగ్ యూనిట్ సరికొత్త ఆదాయ మార్గం అని థండర్‌ ప్లస్‌ సొల్యూషన్స్‌ సీఈవో రాజీవ్‌ తెలిపారు. దీని నిర్వహణకు మనుషులు అక్కర్లేదని, దీన్ని ఇంటి దగ్గర కూడా ఏర్పాటు చేసుకోవచ్చని చెప్పారు.
సొంత అవసరాలకే కాకుండా ఇతరులకు, ఇంటికి వచ్చే బంధువుల ఎలక్ట్రిక్ వాహనాలకు ఈ ఛార్జింగ్ యూనిట్ సదుపాయాన్ని అందించొచ్చని థండర్‌ ప్లస్‌ సొల్యూషన్స్‌ సీఈవో రాజీవ్‌ వివరించారు. టూ వీలర్, త్రీ వీలర్, కార్లకు కూడా ఇది ఉపయోగపడుతుందని పేర్కొన్నారు. షార్ట్ సర్క్యూట్తో వైర్లు కాలిపోడం వంటి సమస్యలు కూడా ఉండవని తెలిపారు. ఈ ఛార్జింగ్ యూనిట్ ధర రూ.15 వేలు ఉందని, ప్రస్తుతం ఇది తొమ్మిది, పది వేల రూపాయలకే ఇచ్చే ఆలోచనలో ఉన్నట్లు రాజీవ్‌ అన్నారు.