DGP Jitender Responds to Sandhya Theatre Stampede : పోలీసులు ఏ వర్గానికి వ్యతిరేకం కాదని, పౌరుల భద్రత తమకు ముఖ్యమని రాష్ట్ర డీజీపీ డా.జితేందర్ తెలిపారు. కరీంనగర్ జిల్లా కొత్తపల్లిలో కొత్తగా నిర్మించిన భరోసా కేంద్రాన్ని ఆయన ప్రారంభించారు. ఈ సందర్భంగా సంధ్య థియేటర్ ఘటనపై డీజీపీ స్పందించారు. తాము ఏ వర్గానికి వ్యతిరేకం కాదని, అల్లు అర్జున్ సినీ హీరో అయినా క్షేత్రస్థాయిలో పరిస్థితులను అర్థం చేసుకోవాల్సిన అవసరం ఉందని పేర్కొన్నారు. సమాజంలో శాంతిభద్రతలు ఫరిఢవిల్లాలంటే పౌరులు బాధ్యతాయుతంగా వ్యవహరించాల్సిన అవసరం ఉందని ఆయన గుర్తు చేశారు.
సినీ ప్రమోషన్ కంటే పౌరుల భద్రత, రక్షణే తమకు ప్రాధాన్యత అని డీజీపీ స్పష్టం చేశారు. ఇలాంటి ఘటనలు జరగటం సమాజానికి ఏమాత్రం మంచిది కాదని అన్నారు. తెలంగాణ ప్రభుత్వం స్త్రీ, పిల్లల సంరక్షణకు అత్యంత ప్రాధాన్యమిస్తుందని, అందువల్లే ప్రతి జిల్లా కేంద్రంలో భరోసా కేంద్రాన్ని ఏర్పాటు చేస్తున్నట్లు ఆయన పేర్కొన్నారు. రాష్ట్రంలో 20 ఎస్పీ కార్యాలయాలు, మరో 9 కమిషనరేట్లు ఉన్నాయని, ఇప్పటి వరకు 27 భరోసా కేంద్రాలను ప్రారంభించినట్లు డీజీపీ చెప్పారు. కరీంనగర్లో భరోసా కేంద్రాన్ని నిర్మించేందుకు ఎస్బీఐ సీఎస్ఆర్ నిధులను వెచ్చించామన్నారు. దాదాపు 6,800 చదరపు అడుగుల భవనాన్ని నిర్మించిందని వివరించారు.
"సినిమాల్లో హీరోలైనా బయట మాత్రం పౌరులే. క్షేత్రస్థాయి పరిస్థితులను కూడా తెలుసుకోవాలి. చట్టానికి లోబడి పోలీసు శాఖ పని చేస్తుంది. తప్పు ఎవరు చేసినా కేసులు నమోదు చేస్తాం. పౌరుల రక్షణే మాకు ప్రాధాన్యం. అల్లు అర్జున్‌కు మేం వ్యతిరేకం కాదు. చట్టప్రకారం అల్లు అర్జున్‌పై చర్యలు తీసుకున్నాం. సంధ్య థియేటర్ ఘటన దురదృష్టకరం."- జితేందర్, డీజీపీ