Shahi Chicken Korma Recipe: ఎప్పుడూ చికెన్తో రొటీన్ కర్రీ చేసుకుని బోర్ కొడుతుందా? కొత్తగా ఏదైనా మంచి ఫ్లేవర్ ఆస్వాదించాలని అనుకుంటున్నారా? అయితే, ఒకసారి షాహి చికెన్ను ట్రై చేయండి సూపర్గా ఉంటుంది. దీని గ్రేవీ, రుచి అద్భుతంగా ఉంటుంది. ఇది రైస్తో పాటు రొట్టెలు, నాన్లతోకూడా టేస్టీగా ఉంటుంది. మరి ఇంకెందుకు ఆలస్యం.. ఇందులోకి కావాల్సిన పదార్థాలు ఏంటి? తయారీ విధానం ఎలాగో ఇప్పుడు తెలుసుకుందాం.
కావాల్సిన పదార్థాలు
- అర కిలో చికెన్
- అర కప్పు ఉల్లిపాయ తరుగు
- 15 బాదం పప్పులు
- 2 టేబుల్ స్పూన్ల సారపప్పు (చిరోంజి)
- 15 జీడిపప్పు
- 4 టేబుల్ స్పూన్ల నూనె
- 3 టేబుల్ స్పూన్ల నెయ్యి
- కొద్దిగా జాపత్రి
- ఒక ఇంచు దాల్చిన చెక్క
- అర టీ స్పూన్ మిరియాలు
- 4 యాలకులు
- ఒక బిర్యానీ ఆకు
- ఒక టేబుల్ స్పూన్ అల్లం వెల్లుల్లి పేస్ట్
- ముప్పావు కప్పు మీగడ పెరుగు
- అర టేబుల్ స్పూన్ ధనియలా పొడి
- ఒక టేబుల్ స్పూన్ ఎల్లో చిల్లీ పౌడర్ లేదా కారం
- పావు టీ స్పూన్ పసుపు
- ఒక టీ స్పూన్ రోజ్ వాటర్
- అర టీ స్పూన్ కేవ్డా వాటర్
- 2 చిటికల జాపత్రి పొడి
- అర టీ స్పూన్ కశ్మీరి కారం
- లవంగాల పొడి
- అర టీ స్పూన్ నెయ్యి
- కొద్దిగా కొత్తిమీర తరుగు
తయారీ విధానం
- ముందుగా స్టౌ ఆన్ చేసి ఓ గిన్నెలో నీళ్లు పోసి అందులో బాదం, చిరోంజి, జీడిపప్పులు వేసి 15 నిమిషాల పాటు ఉడికించుకోవాలి. (వీలైతే వీటిని రాత్రంతా నానబెట్టి కూడా చేసుకోవచ్చు)
- ఆ తర్వాత వీటిని చల్లార్చి బాదం, చిరోంజి పప్పుల పొట్టును తీసేసి.. మిక్సీలో వేసి అందులోనే అర కప్పు ఎర్రగా వేయించిన ఉల్లిపాయ ముక్కలు, కొద్దిగా నీరు పోసి మెత్తగా గ్రైండ్ చేసుకోవాలి.
- మరోవైపు కడాయిలో నూనె, నెయ్యి వేడి చేసి అందులో జాపత్రి, దాల్చిన చెక్క, మిరియాలు, యాలకలు, బిర్యానీ ఆకు వేసి కాసేపు వేయించాలి.
- ఆ తర్వాత చికెన్, ఉప్పు వేసి హై ఫ్లేమ్లో నేతిలో బాగా వేయించుకోవాలి. సుమారు 8 నిమిషాల తర్వాత అల్లం వెల్లుల్లి పేస్ట్ వేసి కాసేపు ఫ్రై చేసుకోవాలి.
- ఇప్పుడు చికెన్పైన ఓ జల్లెడ పెట్టి అందులో మీగడ పెరుగు, ధనియాల పొడి, ఎల్లో చిల్లీ పౌడర్, పసుపు వేసి బాగా కలిపి వేసుకోవాలి. (ఒక వేళ ఎల్లో చిల్లీ పౌడర్ లేకపోతే మన కారం లేదా పచ్చిమిర్చి-ఉల్లిపాయ ముక్కల పేస్ట్ వేసుకోవచ్చు)
- అనంతరం ఈ పెరుగును బాగా కలిపి మూత పెట్టి 15 నిమిషాల పాటు నూనె పైకి తేలే వరకు ఉడికించుకోవాలి.
- ఇప్పుడు ఇందులో గ్రైండ్ చేసుకున్న బాదం-కాజు పేస్ట్, ఒకటింపావు కప్పు వేడి నీళ్లు పోసి కలిపి మూత పెట్టి 15 నిమిషాల పాటు ఉడికించుకోవాలి. (అడుగు అంటకుండా ఉండేందుకు మధ్యమధ్యలో కలుపుతూ ఉండాలి)
- ఆ తర్వాత ఇందులో రోజ్ వాటర్, కేవ్డా వాటర్, జాపత్రి పొడి, కశ్మీరి కారం వేసి కలిపి మూత పెట్టి 3 నిమిషాల ఉడికించాలి.
- అనంతరం చికెన్ మధ్యలో ఓ చిన్న గిన్నె పెట్టి అందులో కాల్చిన బొగ్గు లేదా కొబ్బరి పెంకును పెట్టి దానిపై లవంగాల పొడి, నెయ్యి వేసి మూత పెట్టి 4 నిమిషాల పాటు వదిలేయాలి. (ఇలా చేస్తే స్మోకీ ఫ్లేవర్ వస్తుంది)
- చివర్లో మధ్యలో పెట్టిన కప్పు తీసి కొత్తిమీర తరుగు చల్లి కలిపి దింపేసుకుంటే సూపర్ షాహి చికెన్ కుర్మా రెడీ!
'తొక్కలో పచ్చడి' మీరెప్పుడైనా తిన్నారా? తెలుగు వారి స్పెషల్ రెసిపీ ఒక్కసారి టేస్ట్ చేయండి!
ఈ 'మసాలా ఎగ్ పులుసు' ఎప్పుడైనా తిన్నారా? బ్యాచిలర్స్ కూడా ఈజీగా చేసుకోవచ్చు!
