కొత్త రేషన్‌ కార్డులో చిన్న పిల్లల పేర్లు చేర్చాలా? - అయితే ఇలా చేయండి!

మార్పులు గుర్తిస్తేనే చిన్నారులకు ఆధార్‌ కార్డు! - ధ్రువపత్రాల్లో లోపాలుంటే తిరస్కరణే

How To Register Aadhaar Card For Children In Telugu : తెలంగాణ రాష్ట్రంలో నూతన రేషన్‌ కార్డుల దరఖాస్తుల స్వీకరణ జరుగుతోంది. కొత్త రేషన్‌ కార్డులో తమ చిన్నారుల పేర్లు నమోదు చేయాలనే ఉద్దేశంతో చాలా మంది తల్లిదండ్రులు తమ పిల్లలను ఆధార్‌ కేంద్రాలకు తీసుకు వెళ్లి వివరాలు నమోదు చేయిస్తున్నారు. సరైన నిబంధనలు పాటించకపోవడంతో దరఖాస్తులు తిరస్కరణకు గురవుతున్నాయి. చాలా మంది నిబంధనలు తెలుసుకోకుండా ఆధార్‌ కేంద్రాలకు పిల్లలకు తీసుకుకెళ్లడం వల్ల వారు తీవ్ర ఇబ్బందులు ఎదుర్కొంటున్నారు. చిన్న పిల్లల ఆధార్ కార్డు తిరస్కరణకు గురికాకుండా ఉండాలంటే తల్లిదండ్రులు ఏం చేయాలో ఇప్పడు మనం తెలుసుకుందాం.

బర్త్ సర్టిఫికేట్ వివరాలే కీలకం : ఐదు సంవత్సరాలలోపు చిన్నారులకు ఆధార్‌ కార్డు నమోదు చేయాలంటే వారికి తప్పనిసరిగా డిజిటల్‌ పద్ధతిలో పొందిన జనన ధ్రువీకరణ పత్రం తప్పని సరిగా ఉండాల్సిందే. వాటిలో చిన్నారుల పేరు, డేట్ ఆఫ్ బర్త్, ఇంటి పేరు, తల్లిదండ్రుల పేర్లు, అడ్రస్ వివరాలు ఉంటాయి. ఇదే వివరాలు, చిరునామాలతో పిల్లల తల్లిదండ్రుల ఆధార్‌ కార్డులు ఉండాల్సిన అవసరం ఉంది. ఇంగ్లీష్​ అక్షరం పేర్లలో తప్పులు లేకుండా, స్పేస్‌ (గ్యాప్) లేకుండా సరి చూసుకోవాలి. పిల్లల ఆధార్‌ కార్డు నమోదుకు ముందు తల్లిదండ్రుల ఆధార్‌ కార్డును ఒక సారి సరిచూసుకోవాలి. దానిని నవీకరణ చేయించుకొని సెల్ ఫోన్​ నంబర్​తో అనుసంధానమై ఉండాలి. జనన ధ్రువపత్రం తప్పని సరిగా డిజిటల్‌గా పొంది ఉండాలి. క్యూఆర్‌ కోడ్‌ కూడా ఉండాలి.

నవీకరణను ఎలా గుర్తించాలి : పది సంవత్సరాలకు ముందు నమోదు చేసుకున్న ఆధార్‌ కార్డులకు మన పేర్లు కింది భాగంలో భర్త, తండ్రి పేర్లు ఉన్న చోట్ల వైఫ్‌ఆఫ్, సన్నాఫ్, డాటర్‌ఆఫ్‌ అని ఉంటుంది. కొత్తగా నవీకరణ చేసుకున్న ఆధార్​ కార్డులకు కేవలం కేరాఫ్‌ మాత్రమే ఉంటుంది. కేరాఫ్‌ అని లేని ఆధార్‌ కార్డులను మరోసారి నవీకరణ చేసుకోవాల్సిందే. ఆ తర్వాత చిన్నారులకు ఆధార్‌ నమోదు చేయిస్తే తిరస్కరణ గురి కాకుండా కొత్త ఆధార్ కార్డులు జారీ అవుతాయి.