'బ్యాడ్​లక్ అంటే నీదే బ్రో'- క్రికెట్​లో ఇలా కూడా రనౌట్ అవుతారా?

క్రికెట్ చరిత్రలోనే వింత రనౌట్- ఇలా కూడా ఔట్ అవుతారా?

Unluckiest Run Out In Cricket :క్రికెట్ చరిత్రలోనే ఓ బ్యాటర్ విచిత్రమైన విధంగా రనౌట్ అయ్యాడు. ఇందులో ఏ మాత్రం తన పొరపాటు లేనప్పటికీ బ్యాటర్ పెవిలియన్ చేరాల్సి వచ్చింది. దీనికి సంబంధించిన వీడియో ప్రస్తుతం సోషల్ మీడియాలో వైరల్ అయ్యింది. 'ఇలా కూడా ఔట్ అవుతారా?', 'బ్యాడ్​లక్​' అంటూ నెటిజన్లు కామెంట్లు పెడుతునున్నారు. మరి ఈ విచిత్రమైన ఈ రనౌట్ మీరూ చూసేయండి!

ఇదీ జరిగింది
ఇంగ్లాండ్- సౌతాఫ్రికా అండర్- 19 జట్లు అనధికార టెస్టు మ్యాచ్​లో తలపడ్డాయి. మ్యాచ్​ రెండో ఇన్నింగ్స్​ 30.4 ఓవర్ వద్ద ఇంగ్లాండ్ బ్యాటర్ ఆర్యన్ సావంత్ క్రీజ్‌లో ఉన్నాడు. అతడు సౌతాఫ్రికా బౌలర్ జాన్ రోల్స్‌ వేసిన బంతిని స్వీప్‌ షాట్‌ ఆడాడు. అయితే షార్ట్‌ లెగ్‌లో ఉన్న ఫీల్డర్ జోరిచ్ వాన్‌ హెల్మెట్‌ను తాకిన బంతి మళ్లీ స్టంప్స్‌ వైపునకు రిటర్న్​ వచ్చి, బెయిల్స్​ను పడగొట్టింది. అప్పటికే షాట్‌ ఆడిన సావంత్ క్రీజ్‌ బయట ఉన్నాడు.

బంతి బెయిల్స్‌ను పడగొట్టడం వల్ల సౌతాఫ్రికా జట్టు రనౌట్​కు అప్పీల్ చేసింది. బంతి తొలుత హెల్మెట్‌ను తాకిందని అంతా భావించినా, రిప్లేలో మాత్రం ఫీల్డర్‌ మోకాలిని బలంగా తాకినట్లు కనిపించింది. దీంతో సావంత్​ను రనౌట్​గా ప్రకటించారు. మరోవైపు, బ్యాటర్‌ సావంత్​ మాత్రం షాక్‌కు గురైనట్లు అలాగే కాసేపు క్రీజ్‌లో ఉండిపోయాడు.

ఇక బంతి బలంగా తాకడం వల్ల వాన్‌ బాధతో అక్కడే కింద పడిపోయాడు. వెంటనే జట్టు సహచరులు వచ్చి అతడికి ఫిజియో చేశారు. అయితే, ఈ రనౌట్​పై నెటిజన్లు విభిన్నంగా స్పందిస్తున్నారు. 'అది డెడ్ బాల్​గా ప్రకటించాలి', 'పాపం క్రికెట్‌లో దురదృష్టమైన బ్యాటర్‌ ఇతడేనేమో' అంటూ కామెంట్లు పెడుతున్నారు.