2025 IPL RTM Card Rule :2025 ఐపీఎల్ రిటెన్షన్స్కు సమయం దగ్గరపడుతోంది. ఫ్రాంచైజీలు ఎవరెవరిని అట్టిపెట్టుకుంటున్నాయి? ఎవరిని వేలంలోకి వదిలేస్తున్నాయి? అనే జాబితాను మరో 24 గంటల్లో బోర్డుకు సమర్పించాల్సి ఉంది. గురువారం (అక్టోబర్ 31) సాయంత్రం 5.00 గంటలలోపు అన్ని జట్లు రిటెన్షన్ లిస్ట్ రిలీజ్ చేయాల్సి ఉంది.
అయితే ఈసారి రిటెన్షన్స్లో రైట్ టు మ్యాచ్ (RTM) ఆప్షన్ కూడా ఫ్రాంచైజీలకు అందుబాటులో ఉంది. ఐదుగురు ప్లేయర్లు, ఒక ఆర్టీఎమ్తో గరిష్ఠంగా ఒక్కో జట్టు ఆరుగురు ప్లేయర్లను జట్టులో కొనసాగించవచ్చు. ఇక ముగ్గురు ఆటగాళ్లను అట్టిపెట్టుకుంటే ఆ ఫ్రాంచైజీకి మూడు ఆర్టీఎమ్లు అందుబాటులో ఉంటాయి. అదే ఒక్క ప్లేయర్ను కూడా నేరుగా అట్టిపెట్టుకోకుంటే, ఆ ఫ్రాంచైజీకి ఆరు ఆర్టీఎమ్ కార్డు ఆప్షన్లు ఉంటాయి. అయితే ఈసారి ఆర్టీఎమ్ రూల్స్ కాస్త మార్చారు. మరి ఆర్టీఎమ్ కార్డు ఏంటి? మారిన రూల్ ఏంటో తెలుసుకుందాం.
- ఈ ఆర్టీఎమ్ తొలిసారి 2017 ఐపీఎల్ వేలంలో తీసుకొచ్చారు. అయితే పలు కారణాల వల్ల దీన్ని 2022 సీజన్లో తొలగించారు. ఇక 2025 మెగా వేలం సందర్భంగా మళ్లీ ఈ ఆర్టీఎమ్ కార్డును తీసుకొచ్చారు
- ఏదైనా ఫ్రాంచైజీ తమ ప్లేయర్ను వేలంలోకి రిలీజ్ చేస్తే, అతడిని ఇతర జట్లు కావాలనుకుంటే బిడ్డింగ్ వేసి దక్కించుకుంటాయి. ఆ ప్లేయర్ బిడ్డింగ్ పూర్తైన తర్వాత, పాత ఫ్రాంచైజీ మళ్లీ అతడిని కావాలని కోరుకుంటే, ఆర్టీఎమ్ ఉపయోగించి తిరిగి పొందవచ్చు. ఇదంతా పాత పద్ధతి. ఈసారి ఆర్టీఎమ్ నిబంధన మారింది
- కొత్త రూల్ ప్రకారం, ప్లేయర్ కోసం బిడ్ వేసిన ఫ్రాంచైజీకి ఆ ఆటగాడిని దక్కించుకోవడానికి అదనంగా ఛాన్స్ ఉంది. అంటే వేలంలో దక్కించుకున్న ఆ ప్లేయర్ను సదరు ఫ్రాంచైజీ కావాలనుకుంటే మరోసారి బిడ్ పెంచవచ్చు.
- ఉదాహరణకు, ముంబయి ప్లేయర్ను దిల్లీ రూ.10 కోట్లకు వేలంలో దక్కించుకుంది. వేలం ముగిసిన తర్వాత ముంబయికి ఆ ప్లేయర్ కావాలనిపిస్తే ఆర్టీఎమ్తో రూ.10 కోట్లు చెల్లించి తిరిగి జట్టులోకి తీసుకోవచ్చు
- అయితే ముంబయి అలా కావాలనుకున్నప్పుడు, దిల్లీ ఆ ప్లేయర్పై మరోసారి బిడ్ వేయవచ్చు. అలా దిల్లీ ఆ ప్లేయర్కు గరిష్ఠంగా రూ.12 కోట్ల వరకూ బిడ్ వేసింది అనుకుందాం. ఇప్పుడు ముంబయి అతడిని తిరిగి పొందాలంటే రూ.12 కోట్లు వెచ్చించాలి. లేదంటే ఆ ఆటగాడు దిల్లీకి రూ.12 కోట్లకు సొంతం అవుతాడు
- ఒకవేళ దిల్లీ రూ.10 కోట్ల వద్దే బిడ్డింగ్ ఆపేస్తే, ముంబయి అదే రూ.10 కోట్లు చెల్లించి సదరు ప్లేయర్ను తిరిగి జట్టులోకి తీసుకోవచ్చు. అలా కొత్త రూల్ ప్రకారం ఆటగాళ్లకు లాభం చేకూరే ఛాన్స్ ఉంది
- ఒక్కో జట్టు గరిష్ఠంగా ఆరుగురు (ఆర్టీఎమ్తో కలిపి) ప్లేయర్లను రిటైన్ చేసుకోవచ్చు