మూడు ఫార్మాట్లలో సెంచరీలు బాదిన సారథులు!- వీరి దెబ్బకు కోహ్లీ, విలియమ్సన్‌ల రికార్డులు బ్రేక్!

కోహ్లీ విలియమ్సన్‌లను వెనక్కి నెట్టి చరిత్ర సృష్టించిన కెప్టెన్లు - మూడు ఫార్మాట్లలో సెంచరీ కొట్టిన సారథులు ఎవరెవరంటే?

Captains Who Scored Centuries In All Three Formats : ఏ క్రికెటర్​కైనా దేశానికి సారథ్యం వహించడం పెద్ద సవాల్​తో కూడుకున్న పని. అయితే ఓ సారి కెప్టెన్ అయ్యాక మరింత ఒత్తిడికి లోనై సరిగ్గా పెర్ఫామ్ చేయలేని సందర్భాలను చవిచూస్తుంటారు. కానీ ఆ స్ట్రెస్​ను తట్టుకుని రాణించిన క్రికెటర్లూ ఉన్నారు. ముఖ్యంగా ఈ కోవలోకి టీమ్ ఇండియా బ్యాటర్ విరాట్ కోహ్లీ, ఆసీస్ మాజీ ఆటగాడు రికీ పాంటింగ్ వస్తారు.

తమ జట్లకు సారథ్య బాధ్యతలను చేపడుతూనే ఈ ఇద్దరూ తమ కెరీర్​లో 41 సెంచరీలు బాదారు. అయితే అవన్నీ వన్డే, టెస్టుల్లో మాత్రమే. టీ20ల్లో కెప్టెన్​గా ఉండి సెంచరీ చేయలేకపోయారు. కానీ కెప్టెన్లుగా ఉండి మూడు ఫార్మాట్లలో సెంచరీ చేసిన ప్లేయర్లు ఉన్నారు. ఇంతకీ వారెవరో తెలుసుకోవాలంటే ఈ స్టోరీని ఓ లుక్కేద్దాం పదండి.

తిలకరత్నే దిల్షాన్ (శ్రీలంక)
మూడు ఫార్మాట్లలో సెంచరీలు సాధించిన కెప్టెన్లలో శ్రీలంక మాజీ క్రికెటర్ తిలకరత్నే దిల్షాన్ ఒకరు. తాను కెప్టెన్​గా వ్యవహరించిన 5వ వన్డే, 3వ టీ20, మూడో టెస్టు మ్యాచ్​లో శతకాలు నమోదు చేశాడు. ఇంగ్లాండ్ పై జరిగిన టెస్టులో దిల్షాన్ కెప్టెన్​గానే 193 పరుగులు చేశాడు. హరారే వేదికగా జింబాబ్వేతో 2010లో జరిగిన వన్డేలో 108 రన్స్ పరుగులు నమోదు చేశాడు. 2011లో పల్లెకెలె వేదికగా ఆసీస్​తో జరిగిన టీ20లో 57 బంతుల్లో 104 పరుగులు చేశాడు. ఓవరాల్​గా దిల్షాన్ తన కెరీర్​లో టెస్టుల్లో 16, వన్డేల్లో 22, టీ20ల్లో ఒక సెంచరీ సాధించాడు.

ఫాఫ్ డు ప్లెసిస్ (దక్షిణాఫ్రికా)
కెప్టెన్​గా మూడు ఫార్మాట్లలో సెంచరీలు సాధించిన రెండో ఆటగాడిగా దక్షిణాఫ్రికా మాజీ కెప్టెన్ ఫాఫ్ డు ప్లెసిస్ నిలిచాడు. కెప్టెన్​గా టెస్టు, వన్డేల్లో చెరో 5, టీ20ల్లో ఒక సెంచరీ బాదాడు. ఓవరాల్​గా కెప్టెన్​గా డుప్లెసిస్ 11 శతకాలు నమోదు చేశాడు. 2016లో కివీస్ తో జరిగిన టెస్టులో కెప్టెన్​గా డుప్లెసిస్ తన తొలి టెస్టు సెంచరీని నమోదు చేశాడు.

ఇక 2016 అక్టోబరులో జోహన్నెస్‌ బర్గ్​లో ఆసీస్​తో జరిగిన వన్డేలో 111 పరుగులు చేశాడు. 2015లో విండీస్​తో జరిగిన టీ20లో 119 పరుగుల ఇన్నింగ్స్ ఆడాడు. ఓవరాల్​గా డుప్లెసిస్ తన కెరీర్​లో టెస్టులో 10, వన్డేల్లో 12, టీ20ల్లో ఒక శతకం చేశాడు.

బాబర్ ఆజామ్
2015లో అంతర్జాతీయ క్రికెట్‌ లోకి అడుగుపెట్టిన పాకిస్థాన్​ ఆటగాడు బాబర్ ఆజామ్ అనతికాలంలోనే జట్టులో కీలక సభ్యుడిగా మారి కెప్టెన్సీ బాధ్యతలు చేపట్టాడు. మూడు ఫార్మాట్లలో సెంచరీ చేసిన ఏకైక పాక్ కెప్టెన్ కూడా బాబర్ ఆజామే కావడం విశేషం. తాను కెప్టెన్​గా ఉన్న సమయంలో బాబర్ మొత్తం 15 సెంచరీలు చేశాడు. టీ20ల్లో 3, వన్డేల్లో 8, టెస్టుల్లో 4 శతకాలు నమోదు చేశాడు. కెప్టెన్​గా బాబర్ తొలి వన్డే సెంచరీని (125 పరుగులు) 2019లో జింబాబ్వేపై చేశాడు. దక్షిణాఫ్రికాపై టీ20ల్లో సెంచరీ బాదాడు. అలాగే ఓవరాల్​గా బాబర్ తన కెరీర్​లో టెస్టుల్లో 9, వన్డేల్లో 19, టీ20ల్లో 3 సెంచరీలు సాధించాడు

రోహిత్ శర్మ
కెప్టన్​గా మూడు ఫార్మాట్లలో సెంచరీ చేసిన మొదటి భారత కెప్టెన్ రోహిత్ శర్మ. బాబర్ ఆజామ్, తిలకరత్నే దిల్షాన్, డుప్లెసిస్‌ తర్వాత అన్ని ఫార్మాట్లలో అంతర్జాతీయ సెంచరీ సాధించిన నాలుగో ఆటగాడిగానూ హిట్​మ్యాన్ రికార్డుకెక్కాడు. అయితే కెప్టెన్​గా ఉన్న సమయంలో రోహిత్ టీ20ల్లో 3, టెస్టుల్లో 4, వన్డేల్లో 4 సెంచరీలు సహా మొత్తం 11 శతకాలు బాదాడు. అంతేకాకుండా తన కెరీర్​లో టెస్టుల్లో 12 సెంచరీలు, వన్డేల్లో 31 సెంచరీలు, టీ20ల్లో 4 సెంచరీలు సాధించాడు.