Martin Guptill Retirement : న్యూజిలాండ్ స్టార్ క్రికెటర్ మార్టిన్ గప్టిల్ అంతర్జాతీయ క్రికెట్‌కు వీడ్కోలు పలికాడు. ఈ మేరకు తన నిర్ణయాన్ని బుధవారం ప్రకటించాడు. జాతీయ జట్టుకు ప్రాతినిధ్యం వహించే అవకాశం దక్కడం అదృష్టంగా భావిస్తున్నట్లు గప్టిల్ పేర్కొన్నాడు. తన కెరీర్లో మద్దతుగా నిలిచిన కివీస్ క్రికెట్ బోర్డు, కోచ్లు, సహచర ఆటగాళ్లు, కుటుంబ సభ్యులు, అభిమానులకు గప్టిల్ థాంక్స్ చెప్పాడు.
'చిన్నప్పుడు న్యూజిలాండ్ తరఫున క్రికెట్ ఆడాలని కలలు కన్నాను. ఇప్పుడు 367 మ్యాచ్ల్లో కివీస్కు ప్రాతినిధ్యం వహించినందుకు గర్వంగా ఫీల్ అవుతున్నా. ఈ జ్ఞాపకాలు ఎప్పటికీ గుర్తుండిపోతాయి. నా కెరీర్లో నాతోపాటు ప్రయాణం చేసిన కోచ్లు, సపోర్టింగ్ స్టాఫ్, సహచర ఆటగాళ్లకు కృతజ్ఞతలు'
'ముఖ్యంగా అండర్ 19 స్థాయి నుంచి నాకు కోచింగ్ ఇచ్చిన మార్క్ ఓ డొనెల్, నా మేనేజర్ మెక్ గోల్డ్రిక్కు స్పెషల్ థాంక్స్. నా భార్య లారా నా కెరీర్, ఫ్యామిలీ కోసం ఎన్నో త్యాగాలు చేసింది. తను నా సపోర్టర్. ఆమెకు, నా పిల్లలు హార్లీ, టెడ్డీకు కూడా థాంక్స్. చివరగా ప్రపంచంలోని క్రికెట్ ఫ్యాన్స్, నాకు మద్దతుగా నిలిచిన అందరికీ కృతజ్ఞతలు' అని గప్టిల్ పేర్కొన్నాడు.
2009లో అంతర్జాతీయ క్రికెట్లో అరంగేట్రం చేసిన గప్టిల్ 2022 దాకా న్యూజిలాండ్కు ప్రాతినిధ్యం వహించాడు. 13ఏళ్ల కెరీర్లో మొత్తం 367 మ్యాచ్ల్లో గప్టిల్ 13,463 పరుగులు (వన్డే 7346 పరుగులు, టెస్టు 2586 పరుగులు, టీ20 3531 పరుగులు) చేశాడు. అయితే న్యూజిలాండ్ తరఫున వన్డేల్లో అత్యధిక స్కోర్ చేసిన రికార్డ్ గప్టిల్ పేరిటే ఉంది. 2015 వరల్డ్కప్లో గప్టిల్ వెస్టిండీస్పై డబుల్ సెంచరీ సాధించాడు. ఆ మ్యాచ్లో 237 పరుగులతో నాటౌట్గా నిలిచాడు.
2009 జనవరిలో వెస్టిండీస్‌తో జరిగిన వన్డే మ్యాచ్‌తో అంతర్జాతీయ అరంగేట్రం చేసిన గప్టిల్, తొలి మ్యాచ్‌లోనే 135 బంతుల్లో 122 పరుగులు చేసి సంచలనం సృష్టించాడు. దీంతో వన్డేల్లో అరంగేట్రలోనే సెంచరీ చేసిన తొలి కివీస్ బ్యాటర్‌గా రికార్డుల్లోకెక్కాడు. మొత్తం కెరీర్లో వన్డేల్లో 18, టెస్టుల్లో 3, టీ20ల్లో 2 శతకాలు బాదాడు.
