IPL 2024 DELHI CAPITALS VS SUNRISERS HYDERABAD :ఐపీఎల్ - 2024లో భాగంగా తాజాగా జరిగిన మ్యాచులో మళ్లీ సన్రైజర్స్ హైదరాబాద్ అదరగొట్టేసింది. తాజా సీజన్లో జైత్రయాత్ర కొనసాగిస్తూ మరో విజయాన్ని ఖాతాలో వేసుకుంది.267 పరుగుల లక్ష్యంతో బరిలోకి దిగిన దిల్లీ క్యాపిటల్స్ 19.1 ఓవర్లలో 199 పరుగులకు ఆలౌట్ అయింది. దీంతో హైదరాబాద్ జట్టు 67 పరుగులు తేడాతో విజయం సాధించింది. దిల్లీ జట్టులో జేక్ ఫ్రేజర్(65), అభిషేక్ పోరెల్(42), పంత్(44), పృథ్వీ షా(16) పరుగులు చేశారు. టి నటరాజన్ 4 వికెట్లతో సత్తా చాటాడు. మయాంక్ మార్కండే నితీశ్ రెడ్డి తలో రెండు, వాషింటన్ సుందర్, భువనేశ్వర్ కుమార్ తలో వికెట్ తీశారు.
దిల్లీ ఇన్నింగ్స్ - భారీ లక్ష్యమే అయినప్పటికీ దిల్లీ క్యాపిటల్స్ తన ఇన్నింగ్స్ను దీటుగా ప్రారంభించింది. మొదటి ఓవర్లో పృథ్వీ షా వరుసగా నాలుగు ఫోర్లు బాదేశాడు. కానీ అదే ఓవర్లో 16 పరుగులకు ఔట్ అయ్యాడు. డేవిడ్ వార్నర్ (1) రెండో ఓవర్లోనే పెవిలియన్ చేరాడు. కానీ జేక్ ఫ్రేజర్ మెక్ గుర్క్ చెలరేగడంతో సన్ రైజర్స్లో కాస్త టెన్షన్ కనిపించింది.
మెక్ గుర్క్ కేవలం 18 బంతుల్లోనే 65 పరుగులు చేశాడు. 5 ఫోర్లు, 7 సిక్సర్ల ధనాధన్ ఇన్నింగ్స్ ఆడాడు. మరో ఎండ్లో అభిషేక్ పోరెల్ కూడా 22 బంతుల్లో 7 ఫోర్లు, 1 సిక్స్ సాయంతో 42 పరుగులు సాధించాడు. దీంతో 7 ఓవర్లలోనే దిల్లీ స్కోరు 100 దాటేసింది. కానీ సన్ రైజర్స్ లెగ్ స్పిన్నర్ మయాంక్ మార్కండే తన బౌలింగ్తో మ్యాజిక్ చేశాడు. మెక్ గుర్క్, పోరెల్లను ఔట్ చేశాడు. కెప్టెన్ రిషబ్ పంత్ పోరాడినా ఫలితం దక్కలేదు. 44 పరుగులు చేసి చివరి వికెట్గా పెవిలియన్ చేరాడు.
సన్రైజర్స్ ఓపెనర్లు విధ్వంసం - అంతకుముందు బ్యాటింగ్కు దిగిన సన్రైజర్స్ హైదరాబాద్ నిర్ణీత 20 ఓవర్లలో 7 వికెట్లకు 266 పరుగుల భారీ స్కోరు నమోదు చేసింది. తద్వారా వరుసగా మూడు మ్యాచుల్లో 250పైగా స్కోరు చేసిన మొదటి జట్టుగా రికార్డుకెక్కింది. అలానే టీ20ల్లో అత్యధికంగా 250 ప్లస్ స్కోరు నమోదు చేసిన జట్ల జాబితాలో ఇంగ్లాండ్ కౌంటీ జట్టు సర్రే (3)తో పాటు సమంగా అగ్రస్థానంలో ఉంది..ఇంకా ఈ సీజన్లో ముంబయి ఇండియన్స్పై 277, ఆర్సీబీపై 287 పరుగులు చేసింది.