హనుమాన్‌ జయంతి ఎప్పుడు? - ఆ రోజున భక్తులు ఏం చేయాలో తెలుసా? - Hanuman Jayanti 2024

Hanuman Jayanti 2024 : ఆంజనేయస్వామి భక్తులు హనుమాన్‌ జయంతిని ఏ స్థాయిలో జరుపుకుంటారో తెలిసిందే. మరి.. ఈ ఏడాది ఆ ఉత్సవం ఎప్పుడు వచ్చింది? ఆ రోజున ఆ పవన సుతుడి ఆశీస్సులు పొందడానికి భక్తులు ఎటువంటి పనులు చేయాలి? అన్నది ఇప్పుడు తెలుసుకుందాం.

Hanuman Jayanti Telugu 2024 : హిందువులు వైభవంగా జరుపుకునే ఉత్సవాల్లో 'హనుమాన్‌ జయంతి' ఒకటి. ఏటా చైత్ర మాసం శుక్ల పక్ష పౌర్ణమి రోజున దేశవ్యాప్తంగా హనుమాన్ జయంతిని ఘనంగా జరుపుకుంటారు. ఈ సంవత్సరం ఏప్రిల్‌ 23వ తేదీ మంగళవారం రోజున హనుమాన్ జయంతిని జరుపుకోనున్నారు. అయితే.. పురాణాల ప్రకారం ఆ పవన పుత్రుడు మంగళవారం జన్మించాడని పండితులు చెబుతారు. ఈ సారి మంగళవారం హనుమాన్ జయంతి రావడంతో ఈ పండుగ ఎంతో శుభప్రదమైనదిగా భావిస్తున్నారు. మరి.. ఆంజనేయస్వామి అనుగ్రహం ఉండాలంటే భక్తులు ఆ రోజున భక్తులు ఏం చేయాలి? అనేది ఇప్పుడు తెలుసుకుందాం.

హిందూ క్యాలెండర్ ప్రకారం హనుమాన్ జయంతిని సంవత్సరంలో రెండు సార్లు నిర్వహిస్తుంటారు. కొన్ని ప్రాంతాల్లో చైత్ర మాసంలో శుద్ధ పౌర్ణమి రోజున హనుమాన్ జయంతిని నిర్వహిస్తే.. మరికొన్ని ప్రాంతాల్లో వైశాఖ దశమి రోజున వేడుకలనుజరుపుకుంటారు. అయితే.. హనుమాన్‌ జయంతి రోజున భక్తులు నియమనిష్టలతో ఉపవాసం ఉండటం వల్ల ఆంజనేయస్వామి ఆశీస్సులు ఎప్పుడూ వెన్నంటే ఉంటాయని పండితులు చెబుతున్నారు.

హనుమాన్‌ జయంతి రోజున ఇలా చేయండి :

• సూర్యోదయాని కంటే ముందుగానే నిద్రలేచి తలస్నానం చేయాలి.
• వీలైతే నారింజ లేదా ఎరుపు రంగు దుస్తులు ధరించి, దగ్గరలోని హనుమాన్‌ ఆలయానికి వెళ్లాలి.
• అలాగే ఈ రోజున ఆ స్వామి వారికి సువాసన కలిగిన నూనె, సింధూరాన్ని అర్పించాలి.
• ఆలయంలో హనుమాన్ చాలీసాతో పాటు భజరంగీ మంత్రాలను భక్తి శ్రద్ధలతో పఠించాలి.

• ఇంట్లోని పూజా మందిరంలో కూడా హనుమంతుడికి పూజలు చేయవచ్చని పండితులు చెబుతున్నారు.
• హనుమాన్‌ భక్తులు ఈ రోజున ఉపవాసం ఉంటే ఎంతో మంచిది.
• అలాగే ఈ రోజున రాత్రి నేలపైనే నిద్రించాలి. ఇలా నేలపైన నిద్రించడం వల్ల అశాంతులు దూరమైపోయి, మానసిక ప్రశాంతత లభిస్తుందని చెబుతున్నారు.
• బ్రహ్మచర్యాన్ని కూడా అనుసరించాలని పండితులు పేర్కొన్నారు. ఇలా చేయడం వల్ల అనారోగ్య సమస్యలు తొలగిపోతాయని పండితులు చెబుతున్నారు.
• ఈ రోజున నిరుపేదలకు అన్నదానం, వస్త్రదానం వంటివి చేయాలని సూచిస్తున్నారు.
• ఈ విధంగా హనుమాన్ జయంతి రోజున పూజా కార్యక్రమాలు చేయడం వల్ల కష్టాలు అన్నీ తొలగిపోయి మంచి జరుగుతుందని పండితులు తెలియజేస్తున్నారు. జీవితంలో ఆనందం, సంపద, శ్రేయస్సు, శాంతి సమకూరుతాయని పేర్కొన్నారు.

Note :పైన తెలిపిన వివరాలు కొందరు వాస్తు నిపుణులు, వాస్తు శాస్త్రంలో పేర్కొన్న అంశాల ఆధారంగా అందించినవి మాత్రమే. అంతేకానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకూ విశ్వసించాలి అనేది పూర్తిగా మీ వ్యక్తిగత విషయం.