సూపర్ ఫామ్​లో మ్యాక్సీ- అయ్యో పాపం RCBకి ఎప్పుడూ ఇంతే!

సూపర్ ఫామ్​లో మ్యాక్సీ- పంజాబ్ కింగ్స్​కు మంచి రోజులు వచ్చినట్లే!

Maxwell Big Bash 2025 : ఆస్ట్రేలియా స్టార్ ప్లేయర్ గ్లెన్ మ్యాక్స్​వెల్ సూపర్ ఫామ్​లో దూసుకుపోతున్నాడు. ప్రస్తుతం ఆస్ట్రేలియా డొమెస్టిక్ టోర్నీ బిగ్ బాష్ లీగ్​లో ఆడుతున్న మ్యాక్సీ పరుగుల వరద పారిస్తున్నాడు. ఈ సీజన్​లో మెల్​బోర్న్ స్టార్స్ జట్టుకు ప్రాతినిధ్యం వహిస్తున్న మ్యాక్స్​వెల్ రెచ్చిపోతున్నాడు. ఆదివారం హోబార్ట్ హరికేన్స్​తో జరిగిన మ్యాచ్​లో ఆకాశమే హద్దుగా చెలరేగిపోయాడు. 32 బంతుల్లోనే 76 పరుగులతో సత్తా చాటాడు. ఈ ఇన్నింగ్స్​లో 5 ఫోర్లు, 6 సిక్స్​లు ఉండడం గమనార్హం.

ఇక ప్రస్తుత సీజన్​లో ఇప్పటివరకు 8 ఇన్నింగ్స్​ల్లో కలిపి 194.12 స్ట్రైక్ రేట్​తో 297 పరుగులు చేశాడు. ఇందులో మూడు హాఫ్ సెంచరీలు ఉన్నాయి. మొత్తం 17 ఫోర్లు, 20 సిక్స్​లు బాదడం విశేషం. దీంతో టోర్నీలో అత్యధిక పరుగులు బాదిన జాబితాలో నాలుగో స్థానంలో కొనసాగుతున్నాడు. సూపర్ ఫామ్​తో మ్యాక్స్​వెల్ తన జట్టును క్వాలిఫైయర్​కు తీసుకెళ్లాడు. కొంత కాలంగా ఫామ్​లేమితో ఇబ్బంది పడుతున్న మ్యాక్స్​వెల్ ఛాంపియన్స్ ట్రోఫీకి ముందు కమ్​బ్యాక్ ఇవ్వడం ఆసీస్ ఫ్యాన్స్​లో జోష్ నింపుతుంది.

The guy is unbelievably good.

Here's all the highlights from Glenn Maxwell's 76* off 32 balls! #BBL14 pic.twitter.com/fevthZmuS7

— KFC Big Bash League (@BBL) January 19, 2025

పాపం ఆర్సీబీ!
రాయల్ ఛాలెంజర్స్ బెంగళూరు ఫ్రాంచైజీ ఎన్నో అంచనాలతో మ్యాక్స్​వెల్​ను 2021 వేలంలో రూ.14.25 కోట్ల భారీ ధరకు కొనుగోలు చేసింది. ఆ తర్వాత 2022లో రూ.11 కోట్లకు మళ్లీ ఆర్సీబీనే అతడిని అట్టిపెట్టుకుంది. అలా గత నాలుగు సీజన్లపాటు మ్యాక్స్​వెల్ ఆర్సీబీతోనే కొనసాగాడు. అయితే 2021 సీజన్​​ మినహా మ్యాక్సీ పెద్దగా ఆకట్టుకోలేదు.

గత సీజన్​లో అత్యంత ఘోరంగా విఫలమయ్యాడు. 10 మ్యాచ్​ల్లో 5.78 యావరేజ్​తో కేవలం 52 పరుగులే చేసి జట్టుకు భారంగా మారాడు. చివరికి అతడే స్వయంగా జట్టు నుంచి తప్పుకున్నాడు. దీంతో తాజా రిటెన్షన్​లో ఆర్సీబీ అతడిని అట్టిపెట్టుకోకుండా, మెగా వేలంలోకి వదిలేసింది. ఈ నేపథ్యంలో మళ్లీ అతడు ఫామ్ అందుకోవడంతో పాపం ఆర్సీబీకి ఎప్పుడూ ఇలానే జరుగుతుందని నెటిజన్లు కామెంట్లు పెడుతున్నారు.

ఆనందంలో పంజాబ్​ ఫ్యాన్స్
ఇక 2025 ఐపీఎల్​ మెగా వేలంలోకి వచ్చిన మ్యాక్స్​వెల్​ను పంజాబ్ దక్కించుకుంది. రూ.2 కోట్ల బేస్ ప్రైజ్​తో వేలంలోకి వచ్చిన మ్యాక్సీని పంజాబ్​ రూ. 4 కోట్లకు కొనుగోలు చేసింది. గతంలోనూ మ్యాక్స్​వెల్ పంజాబ్​కు ప్రాతినిధ్యం వహించాడు. అయితే ఐపీఎల్​కు ముందు అతడు మళ్లీ ఫామ్​లోకి రావడంతో పంజాబ్ అభిమానులు హ్యాపీ ఫీలవుతున్నారు.